قاسد نامەکەت ئاوەرد داوە پێم
باز ئاوەرد وە سۆ زام کۆنە و نوێم
مەزموونی نامەی عەمبەرینەکەت
مەعنای عیبارەت گەوهەرینەکەت
ئەر بی دیدەکەم فەرمابێت وە ناز
خەیلی فراوان گلە و ئیعتراز
قیبلەکەم گلەت وە ناحەق کەردەن
خەتا گشت جە تۆس تا وە ڕۆی مەردەن
چەن ساڵان چەن مانگ چەن شەوان و ڕۆ
عومرم چوو وە باد دڵ وە مەیلی تۆ
جارێ ناوەردی ڕەحمێ تۆ وە دڵ
نەترسای جە سای ئەڵحەد سەرای گڵ
خەتا گشت جە تۆ خەیانەت جە تۆ
ڕەوییەی خوێنمژی و جینایەت جە تۆ
چەن جار چون خوێنی ڕام دا وە بەختت
چەن دەغالەت دام وە پایەی تەختت
چەن جەور چەن جەفا نە تۆ دیم وە چەم
چەن واتەی بەدکار چەن تانەی هاودەم
وێم کەرد وە پوول قەڵب ناڕەوای شاران
زەردەخەنەی بەزم گورۆی بەدکاران
نەترسای جە ڕۆی محاکمەی حەق
نەترسای جە زوڵم کردەوەی ناحەق
ڕایێ نەیاوا سەڵامێ جە تۆ
یا وە مەرحەمەت پەیامێ جە تۆ
ناعیلاج جە ئێش دڵەی غەمگینم
نە بێقەراری ئەروای شیرینم
جە سەردیی کەلام جە دڵ سەختی تۆ
جە بێ مروەتی و جە بەدبەختی تۆ
وە وێنەی مەجنوون ڕووم نیا وە چۆڵ
وێم کەرد وە عەوداڵ کەڵپووس دام وە کۆڵ
گەڕیام پەی یەکێ وە نازارم بۆ
وێنەی حەکیمان دەواکارم بۆ
ئاوەردم وە دەس ئی نەونەمامە
ئی تەرڵان تەواو قوومری خەرامە
ئیستەیش ئازیز گیان مایەی حەیاتم
هێزی زینگانی ڕووی سەر بساتم
مەدۆم سۆگەندت وە جوانیی وێت
وە باڵای عەر عەر دڵستانی وێت
وە وێنەی جاران وە واتەی بەدکار
کەریم وە سەر بەحس ناو کۆڵانی شار
مەدەر فرێوم مەمکەر وە تانە
مەکەرۆم وە ڕاز ناو قاوەخانە
یا خود گەر شیمەی غەدرت تەرک کەردەن
ڕەویەی زۆرداریت جە بیر وێت بەردەن
چون من گیان فیدام تۆیش دەروون کەیلی
وەک من دڵ کەباب تۆیش دڵ پڕ مەیلی
گۆش نادەی وە حەرف واتەی بەدکاران
نامکەی وە سەرمەشق گشت هەرزەکاران
شەرت بۆ ئازیز گیان شەرتی وە ڕاسی
شەرتی عاشقان وە دڵ ئیخلاسی
وە وێنەی مینە تا وە تۆی کەفەن
تەوقی غوڵامیت بخەم وە گەردەن