ئەی خودایە من لە تۆ ئەلتاف و ئیحسانم ئەوێ
دەفعی جەهلی میللەتی کوردی پەرێشانم ئەوێ
بۆ هەژاریی کوردەواری وا پڕاگەندە و زەبوون
یەکیەتی و سەربەستیی و ئەخلاق و ویجدانم ئەوێ
تا نەمێنێ باری جەهلی فەردی میللەت یەک بەیەک
ڕێگەی ڕاست و حەقیقەت، عیلم و عیرفانم ئەوێ
لەم جەوانانە کەوا هاتوونە سەر ڕووی نیشتمان
چەرچل و ڕوزفلت، ئەتاتورک و ڕەزاخانم ئەوێ
چونکە وابێ نەشئەیە خاکی وەتەن، پڕ زیللەتە
زەمزەمەی فەسڵی کەریم خان، دەوری بابانم ئەوێ
دەردی کورد زۆر بێ دەوایە باعیسی فەوتاندنە
ئەی خودایە بۆ دەوای ئەم دەردە، دەرمانم ئەوێ
ئەی ڕەفیقان گشت وەرن هەوڵێ بدەین تا سەرکەوین
لاوی زیرەک، کوڕی ئازا، شێری مەیدانم ئەوێ