ئیبتیدا بە نام حەیی خۆش لیقا
خالق المخلوق دنیا و ما فیها
قەرار دادەی حووت ماهی چەنی گا
حەیی لایەمووت ئەبەدەل بەقا
یا ڕەب وە دەرگات سەد حەمد و سەنا
موحتاجم نەکەی وە شەخس دەنا
بەندە موحیبەن وە اهل العبا
کەلب ئاستانەی علی الاعلىٰ
ئەر سەد مونکیران بدەرام جەفا
مەدح شای مەردان نمەکەم خەفا
بشنەودەێ یاران وە کەیف و سەفا
مەدحێ چە تەوسیف زات مستەفا
مەعلوومەن چە لای ئەهل عورەفا
چە عەشق ڕەسووڵ سازیان ئەی دونیا
ڕجا چی ئێدەن چە ڕۆز ئەو دونیا
تاج لەولاکش وەڕووی سەر نیا
کەلام قەدیم وە خەڵات دریا
موحەممەدەل ئەمین وەنامش نریا
دونیاتان نەڕووی خاک مەبۆ ڕوویا
ئیبتیدا بە نام عەلی مۆ گۆیا
نامش مونەقەش چە هەفتەم دەرگا
جبرائیل باوە غوڵام بود بیللا
ببۆ وە کاغەز گشت ئەرز و سەما
بەحران مەرەکەب ببۆ جا بە جا
جەنگەڵان قەڵەم جیهان بۆ مەڵڵا
نمەبۆ تەمام وەسف ئەهلەل عەبا
قرة العیون حەبیب خودا
فازدار بێ عەیب فاتیمەی زەهرا
مادەر حەسەن، حسێن، مجتەبا
ئەی یاران ئێدەن هەم خیر النساء
بەرزەن دەماغم دەماوەن ئاسا
قلووبم وەحوب ئێشان بی ئەحیا
شباب الجنة حەسەن خەلق ڕەزا
هەم شا حوسەینەن خواجای دوو سەرا
زین العابدین ئەعما کەرد بینا
موحەممەد باقر پەی دەرمان دەوا
جەعفەر سادق سەردار عوقبا
عومووم دیانەت وە ئەو مۆ ڕجوا
وە مووسای کازم گیانمان بۆ فیدا
تووتیان پەی چەشم خاک و پای ڕەزا
محەمەد تەقی زات ئالی جا
ئێد مەکۆ پەیمان فەردا ڕۆ ڕەجا
حەسەن عەسکەری شای عالەم پەنا
پەرێ هاشمیان مەبۆ مەلجا گا
علی النقی هەم سوخەن ڕەوا
موحیببان چە فەیزی ئەو مەبان ئەحیا
مەهدییەن ساحێب هەم تاج و لەولا
چە ڕۆژ باقی پەی مان مۆ پەنا
چە عەشق عەلی گیان مەکەم فەنا
مەدحش بوانان وە بڵند سەدا
قەومان یەزید حەسرم دان نە جا
فەردا چە مەحشەر ڕووشان مۆ سیا
فیرقەی - - - وە زەڕ و زیبا
فیرقەی - - - بێ زید و ماوا
تۆ با دوشمنان کەردەنت نیگا
دۆستان جەفا کێش پەی ڕۆژ عوقبا
ایها القریش لا تعطوا اذا
انشا الله نحن من اهل الجنا
بە غەیر چە عەلی شاه کبریا
کێن بکەرۆ وە دەردمان دەوا
یەک نوقتە ێ بی هەم چە تحت البا
وەبێ نام ئەو سەر نەگرد دونیا
انا مدینة العلم علی بابها
فەرموودەی ڕەسووڵ باوەردێ وەجا
مەزرەعەی قلوب بکەردێ ئەحیا
وەحوب عەلی سیراب مۆ ئەشیا
ئاخرش هیچەن دونیای بێ بەقا
دین و ئیمانتان مەدێ وە یاغما
القلب مومن ماچان بیت الله
دەرگاش مەپاچدێ مەندێش وەژێر پا
ئیسمی حەی بگنۆ وەهەرچی ئەشیا
موقەدەس مەبۆ وێنەی بیت الله
اسم جسم هەردوو دارۆ یەک مەعنا
قوڕەیشی دوشمن چە نامەی خودا
سمێڵەن قاپی دەروون صفی الله
لازمەن تەقبیل پەرێ زیارەت گا
بالعکس ئەغیار نەسەر تا وەپا
وە میقراز و تیغ مەکەرۆش جودا
ئینە کەی مەبۆ چەلای حەق ڕەوا
قەول بەشەر مەقبووڵ چە نامەی خودا
ئەی قەوم... بکەردێ حەیا
ڕوکن شەریعەت مەکەردێ فەنا
ناقس مەڵڵایان مەدەرۆ فتوا
مەجهوولان حازر پەی جەنگ و دەعوا
ئی شیعرە مانۆ پەی ڕۆژ عوقبا
هەنی کافییەن سوخەن کەر کۆتا
لە عەشق حۆری ئەکەن ئەی نماه
اظهر من الشمس مەعلوومەن ئی ماه
وەبەنی بەشەر هیچ ناکەم ڕیا
گفتار ڕاستی چاکە بۆ پیا
مەعلوومەن چە لای ئەهل عورەفا
بێ دین ئەو کەسەن هیچ نەبۆش وەفا
دایەمان خاکەن، باوەمان سەما
گرتەنمان مەسلەک ئەجداد و ئابا
کەفتەن نەسەرم یەک عەشق سەودا
ها چە دروونم عەجایەب غەوغا
بێ حەد و پایان کەردەنم خەتا
یا شاه مەردان چە تۆمەن عەتا
مەئیوس نەکەری بەندەت بێ نەوا
وە دوازدە ئیمام بەردەنم پەنا
شاه خوراسان ئەو مووسا ڕەزا
چە یاران دوور کۆ گشت بەڵا و خەزا
چەهاردە مەعسووم چە ڕۆژ جەزا
دەستگیرمان ببۆ چە دیوان شاه
هەفتاد و دوو تەن شەهیدان ڕاه
مەقتوول بین وەدەست - - - گومڕاه
چە دەست گەردوون سەد لا حەول وەلا
ئی نەفس زۆردار من کەرد تەوەلا
چە لام چون خاکەن ئەر سیم ئەر تەڵا
ڕەحمەت وە بابۆم من کەرد وە مەڵڵا
یە گفتەی عەباس دەروون پڕ جەلا
کەلب کەمتەرین شاه کەربەلا