هەر کەس نەی زەمان دراز بۆ ڕیشش
ماچان ئاڵچاغەن خەراوەن ئیشش
نە سەر تا وە پا مەکەن تەفتیشش
ماچان نەمەندەن قووەی قامیشش
ئەر شاگرد ئوغڵان بنەی وە تڵیشش
ئەمجارە مەوی وە خۆشەویستش
نامەرد بێزارەن جە قەوم و خوێشش
فارغ البالەن چە پاش و پێشش
غەیر چە نەفس وێش ئیدارەی عیشش
چە حاڵ فەقیر دڵ نییەن ئێشش
ئەر سەد ساحێب موڵک هەزار بۆ جەیشش
بێ قەوم و عەشرەت نمەیۆ کیشش
عالەم سەر سامەن چە فاش و فیشش
ئەختیار پیر کەفتە بڕیان کڕیشش
زەمین بە بێ ئاو نمەیۆ هێشش
شەریک گورگەن دوژمن وە هیشش
مەڵڵا چە زاری پەی دەرد ڕێشش
مەر زات موتڵەق ۆەرۆ ساڕێشش
تا کەی بشۆری... گامێشش
تەمام نمەبۆ ئەی شش و بێشش
فیرعەون هاست بەجا شەهر بابیلش
کەیخوسرەو لوا وێران کابیلش
ئەی خاکە قووت کەرد ڕۆستەم زابیلش
جیفەی فانی پیر موڵکەن دەلیلش
مەڵڵا وەکارەن چەنی حەنیفشش
کەس نەکەفۆ وەوەر زە... شیشش
یاران چەن خۆشە گ... سکیشش
خاتوون الوەقتەن وردەن تکیشش
پارە نمەکۆ ئەی فاک و فیکش
قاپی مەغلووقەن کەم بی کلیلش
بێ نامووس و نەنگ دونیا وە سیکش
عالەم هەراسان چە دەنگ زیکش
بەد ئەتواری وێش کەردەن عەلیلش
موبارەکش بۆ غەم مەلویلش
بییەن وە مامر خرووس و دیکش
شەو و ڕۆژ مەراق بییەن وە سیکش
عەجەب سەکرانەن پڕ بییەن پیکش
وەباد غەزەب مەدڕان تیکش
وەهەزار حیلە کار نمۆ ڕێکش
ساحێب کەون مەوجوود ئەجەل نەزدیکش
شەخس عەقڵ دار مەبۆ تەریکش
چون ژار مارەن مێوەی فەریکش
مەڵڵای قوڕ وە سەر بییەن خەریکش
هەزاران تفوو وەچارەی پیسش
عالەم سەرگەردان فعل خەبیسش
هەرکەس نەزدیک بۆ مەبۆ شەریکش