سەلام بۆ وەنەت ئەی برای گیانی
مەحرەم ئەسرار ڕاز نیهانی
موحەبەت خاسەن چەندێ ئەتوانی
یاران قەدیم وەکۆ لوانی
غەواسەی فیکرم کەفت وە عەمانێ
دەریاهان بێ پەی عەجەب سەیرانێ
ئازیزی عادڵ نیان دیوانێ
یەک یەک مەستانۆ هەق فەقیرانێ
هەزار موڵک و ماڵ جەی دونیای فانی
مەمانۆ وە جا وە پەشیمانی
باوەرە وەجا شەرت و پەیمانی
وەرنە جە مەنزڵ وەجا مەمانی
شادومان لاهوور حرس و نەفسانی
ئیمان فیرار کەرد پەی بیابانی
دین شەهید کریان جە خوون غەڵتانی
جە هەزار یەکێ دیندار کوانی
دەخیلەن برا قوڕەت عەینانی
زنهار مەگێرە ڕاگەی چەفتانی
کامل الکمال هەم مەلەوانی
ڕەفێقی مەکەر چەنی نەزانی
موخڵیس دەرگای شای هەورامانی
مۆ زیارەت کەری قیبلەی حەقانی
قاپی هەقیقەت جای حاجیانی
وێت حازر بکەر برای ئیمانی
پەی لوای تەواف وەجا نەمانی
سەراپا پەرێت کەردم بەیانی
عاجز نەوی لێم وەدڵ گومانی
غافڵ نەنیشی دەست وە زرانی
ئافاقە مەبۆ فەردا بەیانی
مەواچە ئەسرار پەرێ بێگانی
نەوا جە حزوور بی پەشیمانی
درەخت کامڵ مێوە یاوانی
مەفرۆشە گەوهەر وەقەوم یەمانی
دەست و دڵ تەیار مەکەر زیانی
سیڕڕێ بپۆشە تۆ بەیاز خوانی
دەروون گەورە بەر هەتا مەتوانی
وەجا باوەرە عەهد و پەیمانی
تا داخڵ مەوین وە جاویدانی