جە سوب سەحەردا دیم غونچە دەمێ
جە پەردەی عیسمەت نمانا چەمێ
وە سەد نەزاکەت دەهەن واز مەکەرد
وە یەک ناز ئیزهار سەد نیاز مەکەرد
دەماغ نیسبەت موعەتتەر کەردە
گرد وەجهە توغڕایی موعتەبەر بەردە
گوڵ چون ساحێب دڵ گردین دییاربێ
وە هەوای فەیزش نە ئینتیزار بێ
لاچەمێ کەمێ وەلاو مەکەردی
نە جام گوڵدا گوڵاو مەکەردی
پەی غونچەغونچەی ئەو نازک نەوگوڵ
گیان نشت نە عازاو، دڵ شین سەرچڵ
وەسەر پەنجەی ناز نیقاو هەڵداوە
ئاهرێ نەتۆی جەرگم وەرداوە
شیم وە خزمەتیش و ڕووی شەرمەوە
وە دوعا و سەلام لەفز نەرمەوە
جە ڕووی ئیلتفات جواو سەندەوە
دڵ نە داغ و دەرد هیجران سەندەوە
وە دیدەی تەحقیق چون تاموڵ کەردم
جەو بۆ جەو نیسبەت تەحقیق ئاوەردم
تۆمەز یە نیشان بۆی کۆی کەنعانەن
نەسیم ئاوەردی «پیر بورهانەن»
بە بۆی پیراهەن یۆسف نەژادەن
پەرێو چەم کووران کەعبەی مورادەن
ئەو بۆ موخلیسان یەعقووب ئاسا کەرد
مونکیران گردین دەس وەدوعا کەرد
سەفایێ پەی دڵ، زیبایێ پەی دین
ئەربۆها جە لای شاه شەمسەددین
دەک نەسیم فیدای سۆزەی ڕاهت بام
یا پیر تویچ وەفیدای سۆز ڕاهت بام
قووەی بیناییم وەگەرد پاتەن
دیدە و بیناییم سەرگەرد ڕاتەن
ددان جە سوحبەت ئەغیاران کەندم
چون وەدڵ دڵبەند شای «شەڕەفکەندم»
بەشق بولوەفا شای وەفاداران
سەر حەلقەی گردین نازک نازداران
ڕەحمێ چەنیم کەر جە هەر حاڵەتێ
نە گێج عیسیان، هەر جەهالەتێ
ئەر ڕەحمێ نەکەی وە جەستە و حاڵم
وە داغ عیسیان دەروون زووخاڵم
چون پیردانا مەعدووم مەحرووم
فەرمایش کەردەن فەردی خۆش مەفهوم
«ساقی ئامانە نەشۆ جە ویرت»
«فەریاد ڕەسیم کەر تۆ بەشقی پیرت»
پیر ڕەوشەن دڵ منیچ دەخیلم
ڕاگە گوم کەردە و وێڵ و زەلیلم
ئێستە وەهەرحاڵ پڕ خەجاڵەتم
خاکم وەسەر بۆ پەی قییامەتم
پەی دڵوەشی وێم گاگا مواچۆم
ئەر سەد ڕەنجەڕۆم سەگی قافڵەی تۆم
حەریق کافییەن پەی دنیا و دینم
سەگی ئاستانەی شای شەمسەددینم