ئەمجار سەختتەرەن زامم جە جاران
چڵ مدۆ دایم چون گەستەی ماران
هەر وە زۆر مەندەن ڕای ئامای نەفەس
تای ڕیشەی تاقەت شییەنم جە دەس
بڵێسەی فیراق سۆچنان جەستەم
ناسۆرەن زامان گازی خەم بەستەم
دووی کەواوی دڵ پۆشان سەر هەردان
زەرد کەردەن ڕوخسار پاییزی دەردان
سەرسامەن عاڵەم یەکسەر جە ناڵەم
فەڵەک مۆرەی بەد شانا وە تاڵەم
مەینەت سەر بەرزەن، شادیم زگارەن
ساقی! جامەکەت ئەمجار وەکارەن
بۆرێ وە مەجلیس لا بەر پەردەی شەرم
وە دەورێ دیسان بەزمێ کەرمێ گەرم
تا موتریب وە ساز حەنجەرەی بێگەرد
هوردۆ مەقامێ دەوا کەرۆ دەرد
بەڵ ناکا نەیچی بەیۆ جە لاوە
وە مەقامەکەی قەقنەس ئاساوە
بەزمێمان جەم بۆ چون هەردە جاران
بنۆشین جامێ وە یادی یاران
هەر وە زۆر مەندەن نیم نەفەس باقی
پڕ کەر جامەکت، دەخیلم ساقی!
ئەر ئازیز وەی تەور لێم کەرۆ ستەم
خەلاسیم نییەن ئەمجار خاتر جەم
عەرەق چون شەونم نیشتەن نە ڕووی گوڵ
تەڕ کەردەن تاتای توغراکەی سونبوڵ
جە قازانی خەم، دڵ کەردەن وە ئاو
وە درۆ ماچۆ مەگێروو گوڵاو
ئازیزم! گوڵاو بۆی خۆی کوڵمی تۆن
ئەر بۆی تۆ نەبۆ بۆی گوڵاو جەکۆن؟
زەڕەی بۆی زوڵفت کەفتەن نە بەرزان
بۆی گوڵان کەردەن جە بەرزان هەرزان
ئازیز، وە مەرگت گەر ئینسافت بۆ
هەنی کافییەن بۆی زوڵفت پەی تۆ
ئیتر چ حاجەت وێت مەدەی عەزاو
قەبووڵ کەری جەور مەگێری گوڵاو؟