سەرم سەرگەردی خۆڵ و خاکی سەقز
بە قوربانی کوڕانی چاکی سەقز

سەدی وەک من ببێتە گاو و گەردوون
لەبەر پێی میللەتی دڵپاکی سەقز

ئیلاهی هەر بژی کاوە و فەرەیدوون
لەبۆ لابردنی زوححاکی سەقز

کوڕانی مەکتەب ئەی مایەی ئومێدم
کە ئێوەن مەشعەلی ڕووناکی سەقز

مەیێڵن جاهیلی عالم نووماکان
ئەسیم و ئەرزەل و سەففاکی سەقز

بە ئەفسانە و قسەی پووچ و خۆرافات
بپۆشن ئاینەی ئیدراکی سەقز

خواحافیز قسەی خۆی کرد و ڕۆیی
'شپرزە'ی بێکەس و غەمناکی سەقز