لە ژێر پێڵوەگانت
زۊنەترین هەڵبەست جەهان شەپووڵ دەێد؛
دەریاێگ قۊل
ک هەر ساتێگ ژە بێ‌ئارامییەگەێ
سەرەتاێ وەرز خەمناکێگ ترەک لە وارانەیل وەرزییە.
لە ژێر پێڵوەگانت
قەشەنگ‌ترین نهێنیی جەهان خەفتگە
دەریاێگ قۊل
ک ئارامیی سات‌وەسات وسان و بێ‌دەنگییێ
لێوالێو لە پشکڤین گوڵەیل ئاوەزین و ئاشناییە
بۊش! پرتووک چەوەیلت چۊ ڕاڤە بکەم؟
تا بێ‌چەتر و بێ‌داڵدە
لەناو شەقامەیلێگ ک وەسنگەێ لێزمەگان ناکاو، جێ‌گومانن
خافڵگیر نەمینم
ئوو وشەیلێ ک وەک دەنکە ڕێخەیل بۊچگ
ئەژ ناوەێن کلکەیلم دکەفنەو خوار
لە لێوارە وەرفراوانەگان بۊنت
بوون وە ماسییەیل سۊەر لێوەخەنە و
لەناو دەریاێ ژێر پێڵوەیلت
هەروا وەرەو هەرمان
مەلە بکەن...