گیژاوەیل دێوئاساێ گومان و
باسریشکەیل سامناک وازوەرەن
دترسنێ
داجمیان کەشتییە شکۆمەندەگەێ پایلد
ژە کەنداو دوورەپەرێزی؛
چۊن ک باێەوانە سوورەگەێ دڵت
لە بان ئەو هەڵدریاگە
ئوو چاوانت لانماێگە
ک دە لێڵ‌ترین ڕووژەیل تەمتەمەلۊلان و
بێ‌ئەسارەترین شەوەیلیش
لێوارەگان 'وڵات ئەوین' گوم نیەکەێ.
هناێ ک ئەوبان کەشتییەگەێ چەرمگت،
بتەو وسیدن و
ئاڵاێ لێوەخەنەت
ئەڵ دیلەکەگەێ هەرەبەرز هیوا دشەکنی
جەهان، قەشەنگ‌تر ئەژ هەرڤارە
شەپووڵەیل بەرز دژواری و ڕەنج
لە وەردەمت سەر دچەمنن و
گاشەبەردەیل قوت و قوژمەێ مەترسی
کز و تووزیاێە، ئەژ تاوت دڤان.
ئەسپەیل دەریایی پەژارە
وە یەێ ئاماژەت دەسەڵێن دبن و
دۆڵفینە کەوەگان شایی
لە دەورگردت دەس دکەنە هەڵبەزدابەز.
بێ چرچ و سزرگە و دڵەکوتە
ئوو وە دڵنیاییێگ ڕووناک‌تر ژە تیشک خوەر
ڕێڤار و هاودەم هەراێهەریی تونم
لە شازەریا نەناسیارەگەێ ژیان؛
چۊن ک کەشتیوانەگەێ وریا، تونی و
فەرمان وەرەو هەرلا بلڕنی
دۊرترین پەرتخ و ئامانجەیلیش
فەرە نزیکن.