چەترەکەێ زەردت ئەۊکردی
هەنێ ئەژ لاکیچە تاریکەکەێ زمسان پلیای ـــ
گوڵەبەڕووژەێ ئەڵ شوون خوەر بین!
گرد یە دین
دەروەچەل
دۊکەڵگیرەل
شەقامەل.
دەناو زڵەزڵ جەماوەر
دەناو دەلیا دەلیا لەف
لۆ کردن دو باڵنە دەناو نێیەت
یەکێ ئمێ
یەکێ ئژەو خەم!
گرد یە دین
واێ سەرد
پەلەکەێ ڕیت درەخت
دارتەێلەل.
پەنجە بیچگەکەت گورمچەو کردی
پڕۊکە وەفرەیل دەنام هڵم و گڕەێ هناسەیلت تاویان
زەردەخەنە کردی ئەڕا ئاسمان
ئەڕا زەۊ
ئەڕا جەماوەر
ئمجا دەنگ هاوارت وەردێیان بەرزەو کردی:
'بژی ئازادی! '...
'بمرێ چەکمەبوور! '...
گولە و ئاگر بی
خۊن بی و قیلتاو.
گرد یە دین
دەروەچەیل
شەقامەیل
پەلەکەێ ڕیت درەخت.
سی ساڵ وێیەرد
دەمەڵوەس ملهوڕەکەێ چەکمەبوور نوویش کەفت
بەڵام سوورەگوڵەکەێ دەنگ ت
هێمانیش جوور بڵێسەێ ئاگرێ
ئەڵ ناوڕاس ئاسمانە کەوەکەێ شار
باڵەپیتە کەرێ!
گرد یە دڤینن
م
ڤەگەرد دو باڵنە ک دەناو نێیەم لۆ کردنە
یەکێ ئمێ
یەکێ ئژەو خەم!