ئەێ وا!
بۊشە ژنە بەێت‌ئەڵوەسەگەێ شیراز
کراس زەرد بکەێدە وەر هەڵوەس
هەناێ لەبارەێ هاوسا زاگرۆسییەگەێ هەڵوەسێد.
لێرە، تەنانەت گامەیل ڕووباریش زەردن
کوچگ، وە لاوەلاوەێ زەرد زەمان، چوودە خەو
کۊە، وە بڵووزەیل زەرد پاییز، خەمین خوەنێد و
هەڵاڵەیل، وە پژنگ و سەروەن زەرد کوردییان،
وە هەڵپەڕگە دچنە پیری سووا
وەی خەێاڵە ک بەشکا هەر ئی سووە وهار بوو
... وهار سوور و سەوز!
ئەێ باێ!
بیشە ژنە بڤەشەکەێ دەشت و ناوڕووەل پڕ ساز و ئاڤاز ئاناتۆلی
دەناو وشە وە وشەێ هەڵبەسەیل زەرد،
سەفەرنامەێ ئاهیی چەوەیلێ [وە یادگار بێلێ]
ئەڵ هەر کڕێ ژەێ، بەرف کوت‌و‌پڕ لێوەخەنەێ و
ئەڵ هەر بەرزکردنەوە و نیشتنەوەێ پێنووس،
جگێ لە لۊل زڵف مەدیتەرانە
ڤە یادگار بێلێ
چۊن ک لە وڵاتەکەێ زەرد م، ماوەێ فرەێکە وهار نەهاتێیە
هەڵاڵەیل، چەوەڕێین و
زام کۊ نا‌ئارامە و بێ‌تاوی کەد
ــ فێر داربەلییەیل پیر بکە! ... چ سەرەتاتگی دکەن
پەێ دیین تەنانەت یەێ جوڕەپووپنەێ فرەڤەش! ــ
ئەێ ڤا!
بووشە ژەنە هەڵبەستڤانەکەێ هەزار و یەک شەو بەغدا
هەریە گ ئەڕا کەش‌کۊ ئەتر چەویر و نەعنا بارێ، بەسە
چۊن ک ئێ نام ڤڵاتەکەێ زەرد م،
تەنانەت گوڵەمئاو گوجین لاوانن و لەۊەخەنەێک
ئەر ئاشکرایی هوشکەڕوو زەمەلمان مەڵهەمە
چۊن ک ئیمە، ژە نام ڕەنگینییەل کەشکەشانە کەڵنەکەێ ئەڤین،
فرەتر خوەشمان ئێ لەۊەخەنە ماێ...
هەرچەن تەنانەت نزیک‌ترین لەۊەخەنەیژ،
دەس‌مەڕەس‌ترین هەسارە [ئێ نام ئاسارەل] بوو.
وڵاتەگەێ من، پڕە لە جوڕەپووپنەیل لاڵ
هەر وەی بوونەوە، شێعر باڵەوگرتن بهوونەوە
ئەێ ژنە بۊیشەگەێ شیراز!
جوڕەپووپنەیل، لە قسیەێ تو ک ئەڵگەردان ڕەوان ئاسمانە،
خاس ڕەسنەو.
ڤڵاتەکەێ م، پڕ ئەژ ئاوەخت و ئارزووەل گوم‌بییەو
هەێ ڤەی مدووە، ئەڵوەسەکەێ دڵت بخۆ
ئەێ ژنە بڤەشەکەێ دەشت و ناوڕووەل پڕ ساز و سروو ئاناتۆلی!
ئارەزووەیل، وەرد داڵانەگەێ تووئەڵتوو دڵ ت
ک وەرەو ڕووژنا ئەوکریاێە،
ئاشنان.
وڵاتەگەێ م، نەتڵ پەژارەیل زەردە
ئەسە، هەڵبەس واران بخوەن
ئەێ ژنە بوێژەگەێ بێ‌ناو و کەسنەناس بەیرووت و شام!
پەژارەیل زەرد جەهان، زڕدۊت ئەسرەیل تونن
ــ ک ئەڵ پشت و ئەۊلاێ ئانە، شایی ڕووژەیل بانان نیشتێیە ــ
وڵاتەگەێ من، زەردە
زەرد، وەرد دەنگ سمکوو ئاسکەیل تێژپا و گورج ژان
زەرد، وەگەرد وەفر کوت‌و‌پڕ خەما
زەرد، وەل لۊل نەرم گیسەیل شیرازا
زەرد، ڤگەرد زەێتوونەل مێرەبان مەدیتەرانە
هەنێ شانەیل بریندار چیا ماچ دکەن.
لە وڵاتەگەێ من، وەی هەمکە کەژاڵ و کانی و سروەێ زەردە
بەڵام، وەهار سوور و سەوز ها کوو؟ !
وەهارەگەێ سوور و سەوز ئێمە هەڵبوەس
ئەێ ژنە هەڵبەستڤانەگەێ هەزار و یەک شەو کەسەر!
دە ڤڵاتەکەێ م،
تەنیا باێە ک بێ گوزەرنامە و ڤیزا سەفەر کەرێ! ...
بێ ڕێدان و وشکانن.
لە وڵاتەگەێ من، 'میزۆپۆتامیا'
ئازادی، ژنە خوداوەن خوەتەن‌ڕەژیدەێگە
ک لە زەردەخەنەێ ئەو ئەسارەێ دۊۊۊۊۊۊۊرە
وە دەسماڵە زەردەگەێ ئاێر، هەڵپەڕکە کەد
ئوو ڕووژێگ، لە هەر کات و سات شێعر، دێیاێ و
گرد ئاسۆگەل ژە بووخوەش چەویر و نەعنا، پڕەو کەێ.
دە ڤڵاتەکەێ من،
هەر ژنە بەێت‌ئەڵوەس خەمبار جەهان
هەڵبەسەیل زەرد فرەێ چنێ و
سەوەتەکەێ خوەێ پڕاپڕ ئەژ لەۊەخەنە دەرێ
پڕاپڕ ژە هەڵاڵە سوورەیل
ئەڕا شەوییەکەێ سەوز خەوەیلێ
تا کشکڵە زەڕەدار و ڕەنگینەکەێ ڕووژەیل بانان
بووخوەش هەزوەیل کۊیی ڤڵاتەکەێ م بێ
بوو ئازادی... بوو دووسی... ئەتر ئەڤین!
پاش دمایین چای هەر ئی سەرئێوارەێ دڵتەنگکەر و خەمبارە
ڤە چەمەدانێک پڕ ژە هەڵاڵە زەردەیل
ئەژ ئیسگا زەرد و وەجاهێشتەێ چووڵێ
ڤرەێ ڤهار سەفەرە مەکەم...
ئوو ڤهار بەم ئەڕا لێوارەیل مەدیتەرانە،
ئڕا دەروازەیل شیراز،
ڤەر دڵەکەێ ڕپڕەپکەر 'ئۆرووک'!
بلیت وا گرتمە و
گوزەرنامەێ سۊر هەڵبەس
دەناو گیرفان کراسەکەێ زەردم، مۊر کریاێە.
... قەتار زەردێ، لە وەر واران وە فیکەکیشانەو تێد
ئاهـ هـ هـ! ... شیراز چەنێ نزیکە و
زەێتۊن‌زار دیەکەگەێ هامسا، چ مێمان‌دووس!