ئیسە دی
هەر مرۆڤ، گووڕسانێگە!
چۊنکە دە ناخ هەرکاممان
سۊەرپووسێگ تیرواران کریاێە و
لە قوڵتیسەێ گڵاڵ خۊن خوەێ، دۊایین ئاوازەگەێ خوەنێیە
کوردێگ ڤە ئاخەبانوو و سەرڤەنەگەێ لە دار دریاێە و
دە ناون زەوی و ئاسمان، ئەڕا دومایین جار هەڵپەڕییە
جۊلەکەێگ دەنام کوورەێ ئاگر جەهان نوو، سووزیاێە و
ئەڵ بارگەێ خوداگەێ 'ئاشویتس'
تا دمایین وشەێ نقاگەێ، بییە ڤە خوڵەمڕ.
ئیسکە دی لە ناخ هەرکاممان
بۆمێگ تووقیاێە
شەڕ تازەێ هەڵگیرسیاێە و
'هیرۆشیما'، 'هەڵەبجە' یا 'شەنگال'ـێگ هەس.
ئێسە دی دە ناخ هەرکاممان
دارستانێگ تا دۊایین وەڵنگ هیواێ سزیاێە و
لیکە ئاسارەێگ مردگە
پیرە دەلیاێگ، وشکەڵاتێیە و
کەژێگ نەمر داخروومیاێە.
ئێرەنگە دی لە ناخ هەرکاممان
سێیاپووسێگ ئەڵ دەسەل شەو ڤە چوارمێخە کیشریاێە
یارسانێگ وە تاوان 'ئەنەلحەق' وتن تەمیرەگەێ
لەناو گڵپەگڵپ سەردێگ، سووتیاێە
مەسیحییێگ، وە مدووم نادیارێگ مسڵمانێگ کوشتێیە
مسڵمانێگیش هەر وە ئەو مدووم نادیارە
خۊن مەسیحییێگ ڕژانێیە.
ئمکە دەێ هەرچی فرەتر دەبارەێ ژین چنە دێمن
کەشتیی وشەل، ئاوەژوو دبێ و
ئەژ دەریاپەڕەیل حەقیقەت، دیرترەو دووێمن
ئوو دەنگمان جۊ نوقمەوبۊەێگ لە وەردەڵەک گێژاو ناهمێدی
فێشتر و فەرەتر بوو مردن دەێدن!