ئێوارانێ بۆنی بەخوردەکەی بەر ماڵان دێ
شەو دەنگی چرکەی کاتژمێری تاريکی و
قرچە قرچی خەياڵەکان دێ
ئێوارانێ دەبنە بۆن و خۆ لە نێو شين باوەکەدا نغرۆن
سەمفۆنيای بسکی لە تامە ژەهرە مارەکەی ” نالی ” دەچی
ئەمە کەی چەکەرەی گوڵ و خونچە و چرۆن
ئافاتێکن وڵاتێکيان کردۆتە گوڵ
قريوەکان دەڵێی لەنجەی شەنگەبێرييە تێکەڵ بە دەنگی بەرخەلن و
لەولايشەوە زايەڵەی رانە مەڕی دێنە خوار زەنگوڵ زەنگوڵ
زۆر دەمێکە شەکەت و ماندووی ئێوارانێکم
دەستم بگرێ و لە سۆراغم بخا
نوقمی زەردەی خۆرەتاو بم،
تا لە دامێنی خەرەندێکەوە قورتارم بکا
نازانێ ئەو خۆيەتی يا بووە بە من
دەڵێي دۆلفينن لە يەک بەستە ئاڵاون
ئەو سۆراخ و کنەی هزر دەکا
لێچوونێکە لە مينا رستەيە خنکاون
ئەشکەکانی دەمەو ئێواران لە شەوە ئەنگوستەيەکدا دەبنە ئازار
هەست و هەناسەيەکن
گريانی دەم رووناهی خونچەن و
کەچی نێرگزەجاڕێکە لە گوڵعوزار
خەونەکان دەچنە خەياڵدانی يەکەوە و شکۆفەکان دەبنە دڕک و داڵەکەی جەوەڵبۆر و رێگر
ئەم شەوە بۆ دانايەت
تاريکی لوولمان دەکا و خۆر لە زەردبوونی ژێوانە
ئيدی رۆژە و بۆ شەو دەبێتە جێگر
هەموو جارێ لە سەفەرەکانی ئەو رێيە
بۆن و بوخورد و گوڵ دەبەخشمەوە
کە ديققەيەکی ئەو عيشقە دەدەم
لەو بەريشەوە
دڕک و داڵ و تەلە دڕکاوييەکان هەڵدەوەرن و لێدەبنەوە
ئەو بووە تەليسمێکی سيحراوی و پەشمەک ئاسا دەتوێتەوە
غوباری ئەم ئێوارە
بووە تەمتومانێک و لە ئاونگی سپێدان دەچێ
چراتۆڕمان هەر پێکەوە خەفە دەبێ و دەسڕێتەوە
داڵانێکی تاريکتر لە تاريکی
هەموو دەمێ لە ئاوێنە بوونی يەکداين
من هەر شين و تۆ شينتری
لە بيرت بێ خۆشمدەوێی تۆ کەسم و شيرينتری