ئاڵەکۆک

دڵدار add_a_photo
دڵدار دیوانی دڵدار
٢. ئەی کورد
ئەرێ ئەی کورد لەنێو گەلدا هەتا کەی مات و داماوی؟
کە عالەم سەربەخۆن گشتی ئەتۆش پەیوەندی نێو داوی
دەسا بیرێ لە حاڵی خۆت بکە و هەستێ بە زیللەت کە
بەڵێ دوێنێکە ڕاوکەر بووی و ئێستاکە بە خۆت ڕاوی
کەمەر بەستن لەنێو گەلدا بناغە و پێشڕەوی ژینە
بە تیری کینەیە ئەمرۆ لە ژینا فەوت و کوژراوی
دەسا هەڵسە بە هوشیاری نەفەوتاوی بە یەکجاری
لەنێو بەندی موعەزەب دائەمینێی قوڕبەسەر ماوی
زەمان ئێمە بە شیشی غەم، لەسەر ئاور ئەبرژێنی
سەری سوڕ ما لە جەهلی تۆ هەتا کەی هەر نەبرژاوی
دەمی «بیور» عەدووی «دارە» بەڵام کلکی ئەویش دارە
بەهۆی کوردە ئەتۆ غافڵ کە وا ئەمڕۆ شکێنراوی
دەسا غیرەت کە مەوهومی لە بەهرەی ژینە مەحروومی
درێغ و حەیفە مەزڵوومی، کە زیندووی پەشمە فەوتاوی
جیهانگیرانی هاوتیرەت کە دوێنێ هەر وەکوو تۆ بوون
ئەوان وا پێ گەیشتوون و ئەتۆش هەر کاڵ و هەر خاوی
هەولێر

پەراوێز edit