دوای ناسینی تۆ تامی ژینم دی
ڕوی ڕاستەقینەی پێکەنینم دی

دوای گرتنی دەستت گەلێ دڵخۆش بوم
بە گەرمای جەستەت تاوێک بێهۆش بوم

خۆزگە ئاوێنەی دیوەکەی تۆ بام
بۆ ملی ناسکت ملوانکەی تۆ بام

خۆزگە ئازیزم تەنیا بۆ یک سات
بگەم بە جێ ژوان لێم مەبە ئاوات

شێوەی جوانی تۆ وەک نیگارەیە
بۆ ئارامی دڵ تەنیا چارەیە

کێ لە جیاتی من تۆ دلاوێنێ
خودای بانی سەر ڕووحی بستێنێ

هەر چاوێک وەکوو من، تۆ دەبینێ
تارمایی لێی دا و چی تر نەبینێ

من دێوانە نیم بەڵام عاشقی تۆم
لە تاوی تۆیە ئاوا ڕەنجە ڕۆم

هەموو عومری من فیدای کاتێک بێت
کە ئازیزەکەم لە خەو هەڵدەستێت

کە چاوی جوانی بە ناز هەڵدێنێ
هەست و هۆش و بیر لە لام نامێنێ

پێم بڵێ ئەی گوڵ لە چی ساز کراوی
کام باغەوانە جوان ئاوی داوی

جیاوازی تۆ چیە وا خۆشەویستی
بێ مەی هۆش دەبەی یێکسەر بۆ مەستی

نەکا ئەو ڕۆژەی ئازیزم زیز بێ
غەم بە درێژایی شەوی پاییز بێ

ئەگەر جێم بێڵی ژیان جێ دێڵم
شێوەی دێوانە بە شار دا وێڵم

خۆزگە بۆ جارێک چاو گەشی بۆن خۆش
بە تامی لێوت من بکەی سەر خۆش

بمگرییە باوەش پڕ بە دڵی خۆت
ڕوح و جەستێ من ببەی لەگەڵ خۆت

دەنا با مەرگ بێت بەرەو پیلم
لە دوریت ئازیز پیر و زەلیلم

خۆزگە پێت بگەم پێش کاتی مەرگم
هەتاکوو کفن نەبۆتە بەرگم

دەنا ژیانم بێ بەها و سووکە
شێوەی شایێکی بێ زاوا بووکە