خۆزگە ئاوێنەی دیوت بام
تاکوو زۆر شتم بدیتبایە

خۆزگە جلی بەرت باما
تا گشت گیانتم ساو کردبایە

هەموو گیانی پڕ لە ڕازتم
وەکوو چیڕۆک باس کردبایە


خۆزگە شانەی قژت باما
وەک ڕێبوار بم پێوابایە

وەکوو دەریای بێ سنوورە
سەدان سەفەری تێدایە

خۆزگە عەتری ناو کومێدت بام
جار جار لە لای ملت دابایە

جاری واشە دەشتی سینەت
میوانی بۆنی من بایە

تیکەڵ بە دەست و پێستت بام
هەستی ڕاستی لەوەی دایە

ئەو کات دەستت لە قژت دابو
بریا وێنێکت ناردبایە

یا دەستت نابا ژێر سەرت
بە هەستی من کردبات کایە

ئەو جۆر وێنەم زۆر بە دڵە
خورپەی دڵم بێ مەودایە

وێنەی کاتێک چاوت خومارە
سوری لێوت یک هەوایە

باسی چاوی خوماری تۆ
کوانێ لە کام کتێب دایە؟

هەستی گەرم و لەشی نەرمت
وشە ڵاڵن دەنگیان نایە

تۆ دائم ئیلهامی منی
بۆ دێتنت چاو لە ڕێگایە

لە باوەشت دا دیلیەتی
خۆشترین بەندی دنیایە

ئەو گڵەی تۆی لێ ساز کراوی
ساز کراوە لە گڵی پڕ مایە

دڵۆپێک ئەسرینی چاوت
ئەڵماسی ناو تاجی شایە

تەنیا بۆ چرکێک ئیمن بە
ئەوە بڕیار نیە، تکایە