کە تۆ دەڵێی خۆشم دەوێی
ژیان لە دایک دەبێتەوە
هەناسەت، دەبنە هەناسەم
مەرگم لە بیر دەچێتەوە

کە تۆ لە لام ڕادەوەستی
دنیا لە ژێر پێکانم دا
ڕیشەی ژین لە خاک دەردێ
چرۆی ئەوین دەڕوێتەوە

بریا تەمەن دوا هاتنی عەشق
ڕاوەستابا و پیر نەببای
بە یک کوتنی خۆشم دەوێ
دەرکای بەهەشت دەکرێتەوە

دڵداری لە دوای تۆی ئازیز
زڕە خەوێکی بێ بەهاێە
شەپۆلی خۆشەویستیمان
هەموو دونیا دەگرێتەوە

بۆ گەیشتن بە تۆ و ئەوینت
سەدان شەو وەکوو مۆم گریام
باوەر بکە یادی چاوانت
فرمێسک لە چاو دەسڕێتەوە

کە تۆ هاتیە ژیانی من
چی تر کەسم بە دڵ نەبوو
وەفا داری ئەو عیشقمان
وەک تیر لە دڵان دەدرێتەوە

سەرمای زستانە بێ تۆ بوون
گەرمای هەستت پێشکەشم کە
کێوی قەندیل و پر بەفریش
بە گرمی مان دەتوێتەوە

خەوم لە چاوان پەڕیوە
بەخەبەرم تا بەیانی
بە بۆنی عەتری قژەکانت
بێ خەوی من دەنوێتەوە

سەروەت و سامانم نیە
شاعیرێک بە دەستی خاڵیم
بە تیشکی برووسکەی چاوی تۆ
هێمن دونیا دەکڕێتەوە

تا کۆتایی تەمەن و مەرگ
ناوی تۆ ئاوێتەی زارم
لەو دونیاش 'تەنیا'، بە یادت
دیسان لە دایک دەبێتەوە