شاعیر: عەبدوڵڵا پەشێو
کتێب: سەوڵم پۆڵا کەناریش دوور
سەرناو: شینبوونی ماچ
سەبارەت: ٢٠١٣/١١/٩-هێلسنکی - لاپەڕەی ٢١٠,٢١١ - نووسین: خالید قادری

شەوێک جەستەی ئافرەتێکم بە ماچ داچاند: 
دەشتی ئەنی، 
نەرمانی مەچەک و بەلەک، 
لەپی کەژۆک، 
دەوراندەوری بەراوی لێو، 
گرد و نواڵەی سنگ و بەرۆک، 
خەت خەت وەردی هەر بیست پەنجە، 
قوڵگە و زوورگی ڕەفیسک و چۆک... 
***
نیوەشەوێک لەم شەوانە
بۆ قاڵچیەک شیعرێکی نوێ تەونم دانا، 
کە دڵیژگەم ئۆخژنی هات، 
کە تەواوبووم لە چنینی، 
سەرم سوڕما، 
لەسەر کاغەز ماچ شین ببوون، 
نەخشینترین ڕەز و باخی دنیام بینی!

++++++++++++++++++++++