شاعیر: عەبدوڵڵا پەشێو
کتێب: سەوڵم پۆڵا کەناریش دوور
سەرناو: خۆزگەیەکی درەنگوەخت
سەبارەت: ٢٠١٢/٨/١٦-ڕیگا - لاپەڕەی ١٩٩,٢٠٠ - نووسین: ڕێزان عەلیپوور

نێوان عەشق و نەیاریمان هەودایەک بوو. 
نە پێکەوە هەڵمان دەکرد، 
نە بێ یەکتر دەمانتوانی، 
بە ئاورینگێک هەڵدەگیرساین، 
دادەمرکاین بە تنۆکێک دلۆڤانی! 
هەندێ جاران، 
وەک دوو زارۆ، 
لەسەر هیچ و هەر لەخۆڕا، 
وا لە یەکتر دەهری دەبووین، 
چاومان گڕ و 
لالێومان کەفی دەردەدا. 
دەستبەردانمان هەر جارێک و یەکجاری بوو، 
خۆزگە دەستمان هەموو ڕۆژێ لێک بەردەدا!

++++++++++++++++++++++