شاعیر: عەبدوڵڵا پەشێو
کتێب: سەوڵم پۆڵا کەناریش دوور
سەرناو: هەڕەت
سەبارەت: ٢٠١٢/٧/١ - ڕیگا - لاپەڕەی ١٦٥,١٦٦ - نووسین: خالید قادری

کیژۆڵەیەک، 
بەژنێک بۆنی پونگەڵانی دوای ڕەهێڵە، 
( زۆر بئ پەروا
لەوەی کە دێ... لەوەی دەڕوا... )
بە ناو ژاوەژاوی شارا، 
شلک شلک شەقام دەبڕێ. 
ساتەوەختێک
وەکوو نۆما نێسکە دەکا، 
جارناجارێک دەڵێی دەفڕێ... 
لەسەر مێرگی پاراوی ڕووی
خەندەیەکی دیار و نادیار، 
وەک خۆر هەڵدێ ئاوا دەبێ، 
ئاوا دەبێ و هەڵدێتەوە. 
ئاخ، زات ناکەم لێی بپرسم، 
دەچێتە ژوان یا دێتەوە!

++++++++++++++++++++++