شاعیر: هێدی کتێب: کاروانی خەیاڵ سەرناو: بسم‌الله‌الرحمان‌الرحیم سەبارەت: عظیمیه کەرەج ٦٤/١/٨ - کاروانی خەیاڵ، چاپی یەکەم، ١٣٦٤، لاپەڕەی ١١٩-١٢٣ سەری نامەم بەناوی‌تۆ خوایە کەبێ ناوی تۆ نامە بێ نەوایە خوای بەرزو نەوی‌و هەورازو لێژان خوای رۆژی دەری پیتۆڵ و گێژان خوای‌تەنیای دیارو، نا دیاران خوای میرو، بەلەنگازو١، هەژاران خوای‌من، ئەی‌خوای دڵ‌شادو دڵ‌تەنگ خوای بێ‌یارو بێ‌هاڤاڵ‌و بێ‌رەنگ خوای‌بینا، خوای‌زانا، بەحاڵان خوای بێ یاوەرو، روت‌و، رەجاڵان بەچاو لێک‌نانێ لێک هەڵ‌دێنی چاوێ بەهێزە دەستی‌تۆ هەوکاری ناوێ ئەگەرچی حازرو ناظر لەگشت جێ‌ی خەیاڵ ناگاتە ئەوجێ‌یە کەتۆی لێ‌ی وجودی تۆ ئەگەرچی رون‌و سورە لەرادەی دەرکی زانستیش بەدورە خوای هەست‌و، وتەو، بیرو، خەیاڵان خوای کوێرو، کەڕرو، گێڕو، گەواڵان بەجیرەی بێ‌منەت تێرو، بە ئێرو لە سەرخوانی خواییت مارو مێرو بە تێربون‌و نەبونی موچەخۆران لەدەرکی تۆ نیە تاران و تۆران بەتۆ دەکرێ بنیری تیشکی تاوێ کەبێ، گیانی وەبەر، بێ‌گیانی باوێ لەتۆڕایە تریفەی مانگ لە شەودا ئەتۆی بێدار و باقی‌تر لە خەودا تەڕو پاراوی تۆن ئەزمان لەزاران لەدەس‌تۆدا دڵی یارو نەیاران بە ئەمری تۆ هەور بارانی دێنێ بەسەر چۆڵ‌و چیادا دەی‌ڕژێنێ بەویستی تۆیە خێریان لێ دەبارێ کەشی هاوین‌و پاییزو بەهارێ ئەتۆ وات‌کرد کە زستانان بەسەبرن ئەگەر زستان لەژێر بارستی بەفرن خوایە ئەی‌خوای جوان‌و دزێوان خوای ئەگریجە زەردو کولمە زێوان خوای سینەسپی‌و نەرم‌و دڵی‌سەنگ خوای بسک‌و کەزی‌ی شۆڕو قەدی‌تەنگ من ئەوڕۆ چم ئەوێ لێت هەر زمانی زمانێ‌بێ کەپەسنی تۆ بزانێ زمانێک‌بێ کەزانی زارە کارم بەهاسانی وشە باوێتە زارم زمانێک‌بێ لەگەڵ ئەو واتە ئۆگر کە 'تەنیا تۆخوای ئیتر کەسی تر' خەیاڵی من مناڵێ بێ‌زمانە دەنا یادی‌تۆ ئاوێتەی دڵانە وتاری‌زۆرە بیڵێ‌و چەشنی منداڵ قسەی بۆنایە دەیکاتە گڕڕ و گاڵ لەحێ‌یەک پەسنی تۆ زانا نەزانێ چ دێ ئیتر لەدەستی بێ‌زمانێ دڵێکم پێ‌بدە دەریای ئەوین بێ بەرین‌بێ، بێ‌برین‌بێ، ئاگرین بێ دڵێک‌بێ خوێن‌نەبێ، دڵ‌بێ لەسینە دڵێ بێ‌ژەنگ‌و، گەردو، بوغزو کینە بە جارێ زۆری‌هێنا دەردەداری دەس‌و هەنگاوی شل‌کرد لەش‌بەباری ئیتر با تەم لەبەرچاو ناڕەوێنێ روانگەی دیدە هەردێ‌و کورتی دێنێ لەئاڵۆزی وتارم‌ڕا دیارە کەچی پێم‌کردوە دەردو پەژارە بنێرە خوایە هەتوانی برینم کە ژانی‌دڵ بڕی‌ی خۆشی لەژینم ئیتر ئەوجار من‌و ژێنێکی بێ‌وەی ئیتر جێ‌ی ئاخ‌و داخان بگرێ‌ئۆخەی خەمێکم پێ‌مەدە زێدەی توانام خەمت خوایە لەتوانا زێدە پێدام لەبەر بێ‌چارەییم هەنگاو بەهەنگاو بەسەرشێواوی دەڕوانن سەروچاو دواقوناغی رێگەم دەرکی تۆیە خوا بگرەدەسم لەو هاتوچۆیە بەزەت پێم‌دابێ روناکی بخە رێم کە بەو رێ راستەدا رزگاربم‌و بێم ئەگەر کار کەوتە بەخشینی خوایی بەگشت پاڕانەوێک دێنی دوایی بەڵام کەی تامی مەرگم پێ دەچێژن لە کوردوستانی رزگارم بنێژن لە فیردەوساو، لە کوردوستانی زەنوێر لەش‌وگیان بەش‌بن‌و سەیران بکەن تێر بەئەسپایی دێ دەنگێ نادیاری دەچرپێنێ بەگوێما جار بەجاری کە رۆیی کاروان‌و پای‌تۆ لەنگە لەشت پێ‌ناچێ گیان دەرکە درەنگە تەمەن هەرچی هەبو رۆیی لەخەودا ئەبینم ئێستە زۆر کەم ماوە مەودا لەئەستۆم هێندگرانە باری تاوان چەماون پشتم‌و ئەژنۆم لەتاوان بەتەنیایی لەرێگەی دورو بێ‌بن تەمام تەنیا بەلوتفی‌تۆ هەیەمن نیە تۆشەم لەروحمی‌تۆ زیاتر کە لەوروحمە نیە هیچ‌تۆشە چاتر نەچارێکم هەیە ئیتر نەڕێ‌ی دی بەرەو قاپیت ئەوە دیم هێدی 'هێدی' ١. بەلەنگاز: فەقیر، نەدار. ++++++++++++++++++++++ سەرناو: دایک و کور سەبارەت: ١٩٦٥/١٢/٣ - دەنگی کوردوستانی عیراق - کاروانی خەیاڵ، چاپی یەکەم، ١٣٦٤، لاپەڕەی ١٢٤-١٢٧ بەڕۆژێکی گەلێک باران و سەرما نەهەر سەرما سەرم لەورۆژە سوررما لە گوندێک هەڵکەوت رێم کەوتە ماڵێک چ ماڵێک هەروەکو خەون و خەیاڵێک گەلێک ماڵێکی گەرم و پاک و خاوێن کوڕوکیژێک لەوێ وەک توڵی لاوێن کور و کچ پێکەوە خوشک‌وبرا بون دەگەڵ دایکێک لەناو ئەو ماڵەدابون هەمو هێندە دڵ‌ئاوا بون و روخۆش کەماندوبونی رێگەم کرد فەرامۆش لەپاش ماوێکی کەم دیتم 'گەلاوێژ' لەگەڵ 'سمکۆی' برای کەوتە وت‌ووێژ: **** براکەم گەرچی تۆ تاقە برامی هومێدی ڕۆژی ڕەش پشت وپەنامی بەتۆ ڕونە گلێنەی چاوەکانم لەتۆ ڕایە هەمو خۆشی ژیانم گوڵی هیوای لەباغی ژینی من‌دا لقی سەروی لەناو پەرژینی من‌دا هەتا ئەوڕۆژە دەم نێژن لەگڵ‌دا برای و خۆشەویستیت هەر لەدڵ‌دا بەڵام ئەو داخە دەم‌کوژێ نهێنی برای‌دیم وا لەسەنگەر تۆ لەوێ نی گەلاوێژ لەو وتەی خۆی کەوتە گریان دەگریاو دەی‌گوت و فرمێسکی دەڕژان: لەوێ‌نی تاکو تۆش چاوت لەوی‌بێ لەپارێز بردن و هات‌و هەوی‌بێ لەوێ‌نی تۆ لەکاتی شەو نخون دا لەنێوئاگرو بڵێسەی ڕۆژی ڕون دا لەوێ‌نی تۆ هەتا هاواربکا لێت براپێش مەرگەکەی دڵسۆزی هاوڕێت لەدوژمن ڕاخوڕێ وەک شێری سەرمەست لەڕێ‌ی گەل‌دا روحی باوێتە سەردەست تەماشای تۆ بکاو دڵ خۆش بکا پێت سەری دوژمن بەگەپ باوێتە بەرپێت حەیف سمکۆ کەلاوێکی وەکو تۆ بەجێ ماوی لەئاواڵ و برای خۆ سەرم هەڵ‌نایە ئیترمن لەشەرمان هجومی تانە هیند ئەکرێتە سەرمان لەناوگوندا ئەگەر ڕۆژە ئەگەر شەو لەگەڵ مندا هەموگاڵتەی ئەم‌وئەو ئەگەرتۆ حەزئەکەی لێرە بمێنی لەلای دایکم‌بە تۆ بۆ خەم‌ڕەوێنی لەجێ‌ی تۆش من‌بچم بەوشەرتە سمکۆ لەڕێ‌ی‌گەل‌دا چیە فەرقی من و تۆ؟ **** وەڵامی‌داوە سمکۆی دڵ بریندار برا قوربانی تۆ خوشکی وەفا دار ئەوەی وا تۆ منت پێ‌گرتە لۆمە ئەوە ئەرکی گرینگی شانی خۆمە دەهێزم‌دا هەیە بەو ئەرکە هەستم لەڕێ‌ی رزگاری تادەمرم نەوەستم بەڵام من هەر پەژارەی تۆمە یەکجار دەگەڵ ئەوپیرە دایکە بێکەس و کار **** هەتا ئەوکاتە هەر بێدەنگ‌بو 'ڕوناک' کە وای‌بیست هاتەپێش‌ئەو دایکی دڵ‌پاک سەروپرچی سپی وەک بەفری بێ‌گەرد وتەی کاری دەکردە سەردڵی بەرد بەزەردەو پێ کەنین ڕوی کردە سمکۆ گوتی: من تێگەییم رۆڵە قسەی تۆ کورێک بۆ نیشتمان خوێنی نەرێژێ لەڕێ‌ی ڕزگاریا مەینەت نەچێژێ لەدوژمن خوێنی بابی خۆی نەسێنێ نەبونی باشترە با هەر نەمێنێ ئەوانەی بۆ وەتەن چونە کەژو کۆ هەمو دایکیان هەیە سمکۆ وەکو تۆ لەشاخان شین نەبون بەردی چیانین کەس و کاری مەن و لێمان جیا نین گرانە دەردی ژێردەستی و زەلیلی برۆ بمرەو مەژی ساتێ بەدیلی **** هەتاو تازەی گزینگ دابو لەئاسۆ کوڕودایک کەدەستیان کردە ئەستۆ خەیاڵ بو، دیدەبو، من‌بوم سەری‌گێژ نزای‌دایک دەگەڵ زەردەی گەلاوێژ سەری‌کێشابو ڕۆژو تا توانی ئەویش دەودیمەنە جوانەی ڕوانی برۆ تێکۆشە بۆ ئەو ئاوو خاکە حەڵاڵت‌بێ کوڕم ئەو شیرە پاکە ++++++++++++++++++++++ سەرناو: باز و کەو سەبارەت: ١٩٦٥/١٢/١٠ - دەنگی کوردوستانی عیراق - کاروانی خەیاڵ، چاپی یەکەم، ١٣٦٤، لاپەڕەی ١٢٨-١٣١ لە مەڵ‌بەندێکی خۆشی کوردەواری سەرەوژور بونەوە خێڵ بۆ هەواری لەداخی بەفرو زستان و کڕێوە چیای ڕازاندبۆوە خاکەلێوە لەبەردەشتا کراسی مەخمەری شین لەئامێزی هەڵاڵە و یاس و نەسرین تەماشای چت دەکرد خوارو سەر و ژور سەری لێک دابو شللێر و گوڵی سور وڵات خەمڵی‌بو بەو چەشنە سەراسەر بە خاش‌خاش و گوڵی بەیبون و شەست‌پەر لەناو ئەو دیمەنە سەوزو جوانە کە جێ‌ی درکاندنی هەستی دڵانە لەزەردێکا کەوێکی قۆز و نەخشین سکاڵای بو لەگەڵ بازێکی تێ‌بین سەرەڕای ئەو سروشتە دڵ ڕفێنە وەکو زامدارێ 'کەو' دەی کرد وڕێنە: **** دەغیلت‌بم مەلی پسپۆڕ و چازان مەلی تەڕدەست و وریاو ژیرو تەڕلان دەژین دا بۆچی وا چارە ڕەشم من؟ لەخۆشی و کامەرانی بێ‌بەشم من؟ ئەمن روح دادەنێم بو خاوەنی خۆم لەبەرچی ئەو وەفایێکی نیە بوم؟ وەرە تۆخوا سەیرکە خاڵ و میلم لەسەر ئە دیمەنەش‌ڕا وا زەلیلم هەمو رۆژێ دەگەڵ کازیوە ئەنگوت دەچم بۆڕاوی 'مێ‌رۆژ'١ و 'سیاسوت'٢ لەقاسپەی من هەزار باڕو کەوی پیر لەداوی خاوەنم‌دا بونە نێ‌چیر سەعاتێک ناسرەوم بێ خواردن و خەو کە ئەو تێربێ لە گۆشتی ناسکی کەو نەبو جارێک لەسیپەی‌دا بخوێنم لە گرمەی تاپڕی دەنگ دانوێنم لەماڵێ سازو سەمتورە غوڕەی من نشەی ڕاوچی دەبزوێنێ گوڕەی من لەسەر ئەو حاڵەڕا بێ قەدرو حورمەت قەفەز جێگای منە بێ‌دان و خزمەت ئەگەر ڕۆژێکی کەو نەکرێن قەلاچۆ ئەبێ لێم داڕنن باڵ‌و پەڕو پۆ **** وەڵامی داوە 'بازی' کۆنە ڕاوکەر کە تاوان هەر لەتۆڕایە سەرانسەر ئەتۆ خۆت بویە گورگی مێگەلی خۆت ئیتر کێ بێت و دڵسۆزی بکا بۆت دەخوێن دا سوربوە دندوکی ئاڵت ئەبێ بیگریە ئەستۆی خۆت وەباڵت براکەت بانگ ئەکەی بی‌خەیتە نێوداو بەڵام دوا رۆژی خۆت ناخەیتە بەرچاو دەڕێژی خوێنی خزمی خۆت و بۆخۆت دەدەی دەستی پەشیمانی لە ئەژنۆت کە بۆ فەوتانی هۆزت تێ دەکۆشی دەژین‌دا چۆن ئەبینی خێرو خۆشی کەسێک بۆخۆی ئەوە شەرت و بەقای‌بێ ئەبێ چۆن دوژمنی بۆئەو وەفای بێ دڵت ناسوتێ بۆ جوجکی برای خۆت ئەتۆش پێویستە بی‌بینی سەزای خۆت لەبەر ئەو ڕاوە دەگرێ حورمەتی تۆ دەنا ئەو نایەوێ خاڵ و خەتی تۆ هەمو دەشت و چیا پاوانی تۆیە ئەگەر تێ‌ی‌دا نەژی تاوانی تۆیە بەسەربەرزی لەناو هێلانە مردن نەوەک تۆ خزمەتی بێگانە کردن ١ و ٢. ڕاوی کەو لەوەختی جۆزەردان 'مێ‌رۆژ' و لە هەوەڵی بەهاردا سیاسوتی پێ‌ئەڵێن. لەڕاوی مێرۆژدا 'ماکەو' دائەنێن ئەخوێنێ و 'نیرەکەو' دێتەسەری کەئەوکاتە ماکەوی تر کورکە و لەسەرهێلکەیە. ڕاوی سیاسوت لەهەوەڵی بەهاردایە نێرەکەو دەخوێنێ‌و نێرەکەو دێتەسەری کە لەگەڵی بەشەر بێ‌و ماکەوی لێ بستێنێ. ++++++++++++++++++++++ سەرناو: ئاگری تۆ سەبارەت: ١٩٦٦/٣/٨ - رادیو دەنگی کوردوستانی عیراق - کاروانی خەیاڵ، چاپی یەکەم، ١٣٦٤، لاپەڕەی ١٣٢-١٣٣ ئەی وەتەن تەنیا نە هەرمن بۆ تۆ وا سەوداسەرم تیشکی ڕۆژیش جێ‌ی لەبەر کۆیلەت نیە دەوروبەرم تۆ لەدەس بێگانەدابی چارەنوسی ئەو گەلە هەڵمەت و قوربانی دانەو ڕشتنی خوێنی گەرم ناحەزی‌تۆ پێ لەسەر گۆڕی شەهیدان دابنێ کێ‌یە باوەڕکا کە دەس لەو خاک‌و خوێنە هەڵ‌گرم دوژمنت چیدیکە با ئاگر لەماڵم بەر نەدا من لەسایەی خۆشەویستی تۆوە هەر خۆم ئاگرم سەد پەژارەو بەرهەڵست‌و سوێرو تاڵیم بێتە پێش گەر لەڕێ‌ی ڕزگاری تۆ لادەم بزانە کافرم خۆم بە شانازی بەڵاگەردانی سەربەرزیت دەکەم تیخی خۆی دابێنێ دوژمن بۆ مەتاڵت حازرم سەر لەسەرشانم وەکو بارێکە کەڵکی‌چی هەیە گەر دەڕێ‌ی تۆدا نەچێ ئەوبارە قەت هەڵ‌ناگرم من بەبیرو باوەڕو دوژمن بەتانک و تۆپەوە کێو بەکێو ڕاوی دەنێم واتە گەلێک ئازاترم هەر بەهیوای ڕۆژی ڕزگاریت ئەژیم و ڕونە لێم تا بەدەستی خۆم نەنێژم دوژمنی تۆ نامرم من دەڕێ‌ی سەربەستی تۆدا بۆ هەمو پیلانی ڕەش دڵ‌نیابە هەر کوڕە پێش مەرگە کەی ناو سەنگەرم ئەو کوڕەی هێزم لەشیری تۆوەیە و ڕۆژی هەرا جێ‌ی لەناو جەرگ‌و هەناوی دوژمنت داخەنجەرم من‌کە گاڵتەم دێ بەمردن سەیرە گەرتۆ شادنەبی تۆدەبێ هەر سەرکەوی‌و کۆسپت لە سەرڕێ لابەرم دوژمنت هەرفێڵێ بیکا نەخشی سەرئاوە و ئەمن پیرە دارێکم کە بەوبایانە هەرگیز نالەرم نابەزم هەروەک بەڵێنم داوە یان رزگاری تۆ یان هەمو ئەو شیوو دۆڵەت پڕدەکا خوێن و تەرم ئەی وەتەن هەرناوی‌تۆ وردی زمانمە بۆیەوا هەروەکو دەشت و چیاکەت کەسک‌وسورە دەفتەرم ++++++++++++++++++++++ سەرناو: خدرەشێت سەبارەت: گوندی دێڵزە ١٩٧٣/٢/١٥ - کاروانی خەیاڵ، چاپی یەکەم، ١٣٦٤، لاپەڕەی ١٣٤-١٤٣ زۆر کەس هەیە لەو دنیایە کەیفی دەگەڵ شێت هەر نایە بی‌بینێ بێزی هەڵ دەستێ دەچێ دور لێ‌ی ڕادەوەستێ خۆ ڕاستە شێت بێ ئەنوایە بەڵام من خۆم لەلام وایە شێتی نەک هەر زەرەر نیە لەشێتی باشتر هەر نیە من شێتێکی گێژو هێڕم بێجگە لەوەش، شەلم گێڕم لەماڵێ‌دا ژنم، خەسوم بە شێتەشێت دەکەونە دوم هەر دەم بینن خاوو خێزان لێم دەکەن بەچەپڵەرێزان کوڕەکەی خۆم ئەو بچکۆلە بانگم دەکا 'بابە حۆلە' کێ بخلیسکێ لە حەسارێ جنێو بۆ من دادەبارێ هەرچی ناشیرن‌و کرێتە دەڵێن ئیشی 'خدرەشێتە' منیش لەپێشدا وا نەبوم ئێستە بەوناوە ڕاهاتوم ئەگەر بە شێت ناوم نەبەن ناوێکی ترم لێ هەڵ‌دەن ئیتر جوابیان نادەمەوە هەر لاشیان لێ ناکەمەوە ئێوارێ، سبەینێ، شەوێ لەسەرنانی، وەختی خەوێ لێکدا لێکدا ژن‌و خەسوم وەک کەو ئەخوێنن بەرەوڕوم یەکیان لەو بەر یەکیان لەوبەر ئیتر سەرم داوێنە سەر قەت ناهێڵن سەرم هەڵێ ئەم لێ‌ی‌بڕا ئەویان دەڵێ حۆلە کەی نان خواردن وایە یان هێرە لاچۆ لەو لایە یەک ئەڵێ چڵمت بستڕە بۆ بەدایم لوتت پڕە یەک ئەڵێ قسە نازانی بۆ ئەدوێ‌ی لەگەڵ میوانی حەیای ئێمەش ئەبەی گێژە ئەو زبڵەی بەرە بی‌رێژە ئەوی قەت منی نەدیوە وەک کێچ دەکەوڵم خزیوە دەگەڵ: فیتوو، هێ‌هێ‌و، هۆهۆ جاڕزیان کردوم چەقە سرۆ ئەوانەی وا بە مل هوڕی 'شێت'یان بەسەر من‌دا بڕی جاچۆن دەس لەمن هەڵگرن ئەوان خۆ لەمن شێت ترن زۆریش هەوڵ ئەدەم تێ‌ناگەن دەڵێم بەڵکو لام لێ لادەن توڕەبم، ئەڵێن: چی بوە؟ 'شێتە خۆی هەڵ مساندوە' پێ‌بکەنم، لەهەمو لاوە پێم‌ئەڵێن 'لەسەری داوە' هەرچی بیکەم منی رەبەن ئەوان قسەی خۆیان دەکەن هەرنەم توانی بەنیان بادەم منیش خۆم نارەحەت! ناکەم *** پارەکە رۆژی جێژن بو ماڵم پڕ لە پیرێژن بو خێزان‌و خەسوم دوبەدو هەردوک خۆیان ساز کردبو دەچونە سەردانی خزمان هەردەمام منی بەستەزمان پێ‌یان قاڕبو منیش بەرن منداڵیشم پێ هەڵ گرن هەردوک جلکی نوێ‌یان لەبەر یەکی تاسێکی زێر لەسەر خەسوم شانەی لەدەستابو لەبەر ئاوێنە وێستا بو بانگی کردم: لەکوێ‌ی حۆلە؟ بۆ چویە ئەو ژورە چۆلە؟ گوتم: واڵڵه خاتونی خۆم ئەوە قاپ و کەوچک دەشۆم گوتی: وەرە، ئیتر ئەو رۆ ئاقڵ‌بە کۆڵانان مەچۆ وامن و کیژەکەم ئەڕۆین نیوەڕۆش لای ئەوان ئەخۆین تۆش خۆت سازکە ئەو نەورۆزە ئەت نێرمە جێژنە پیرۆزە بچۆ جل‌و جۆرت بێنە وریاش‌بە شتی مەشکێنە شێت‌و شێت‌بازی وەلانێ ئەوەش جێژنانەکەت، هانێ لەپێوە تا تۆقی سەرم جلکی نوێ‌یان کردە بەرم هەربۆ تەشقەڵە بە ئەنقەست خەسوم پشتێنی بۆم دەبەست: -ئای ئای هێرە ئەوە لەکوێ‌ی بۆ هەربەولاو بەولا دادێ‌ی بۆ نازانی باش راوەستی دەڵێ‌ی نەمەیوی هێند سستی لوتت هێندە هەڵ مەهێنە دەست لەگیرفانت دەرێنە ئیتر بۆ هەر ماڵێ کە چوی هەر لەدەروازە ئاوا بوی وەک خەرتەلی هەڵ‌مەنیشە بچۆ سەرکورسی دانیشە خۆت وادانێ کەتۆش شتی تێ گەیشتی چم پێ‌گوتی؟ هێڕە ئیتر نەچی لەوێ پەڵە وەجلکت بکەوێ کێ خزم‌و دەراو سێما نە ئەوکاغەزەش لیستەی وانە ماڵی خاڵم، خوشکە پەریم لەوێوە، ماڵی کاک کەریم چوزانم، هەموم نوسیوە دەزانم هیچت نەدیوە نەکەی لێت تێک‌چێ وریابە جێژنە پیرۆزەیەو دابە ئەوی لەتۆ گەورە ترن دەستیان ماچ‌کە لە پیاووژن بەڵام بۆ گچکەوا نیە گچکە ماچ کردن چا نیە شیرنی تەنیا دەنکێک بخۆ زۆریش لەسەر قسە مەڕۆ هەرچی خواردت مڵچەت‌نەیە مڵچەت‌بێ سەرشۆری مەیە شۆکۆڵاتیش ئەوی هەبن بێ‌دەنگ بیان هێنەوە بۆمن جێژنانەش لەکەس وەر نەگری دەزانم بۆ پارە دەمری لەهیچ‌کوێ زۆر دای‌مەبەستە هەر تاوێکت پێ‌چو هەستە هەتا لە چەنگی ڕزگار بوم باوەڕکە لەخۆم بێزار بوم هاتم لەدەرکێ بچمە دەر 'خێڵە'ی ژنم گەیشتە سەر: دەک هێڕە لەت‌و پەت کرێ‌ی یاخوا وەبەر جەنجەر درێ‌ی خۆدەستی دایکمت ماچ نەکرد خوایە هێڕە بۆ هەر نەمرد؟ ! گەڕامەوە زەلام، زەلام بەدەستی خەسوم‌دا نوسام گوتم ئیشی‌ویش براوە تەشقەڵەی تری نەماوە کەچی هات خۆی گەیاندە لام چەپۆکێکی هەر پێ‌دادام پاڵە پەستۆی دام بۆ دەرێ بەرێ‌ی کردم بۆ سەفەرێ!! کە چومەدەر هەر ئەو کاتە بەو ژیان‌و بەسەر هاتە لەکوچە لاقم ڕاکێشا هێند پێ‌کەنیم زگم دێشا *** ئەو جار وەک بارگینی بێ‌ناڵ وەڕێ کەوتم بۆ هەوەڵ ماڵ دەرکەم کوتا زۆر پێ‌نەچو هەستێک‌لە حەوشە پەیدابو کیژێکی گچکە هاتە دەر خشتیلەو خاوەن سەرو بەر هەر منی دی بە هەڵەدا خۆی بە دەرکی‌ژورێ دادا هاواری کرد... دایە، دایە شێتێک ئەوە لەدەرگایە وەک زاواکەی پورم دەچێ گوتی: بچۆ، بڵێ... بابێ نیزیک‌ببۆوە رێگەی دور 'بسم‌الله'م کردو چومە ژور ماچم کرد دەستی گەورە ژن ئەویش پرسی لە حاڵی من کیژی گەورەیان خوێندکار بو زانین لە ئاکاری دیار بو پاش تاوێک ئەویش هاتە ژور بەڵام چبێ وەک بوکی‌سور هەستام گوتم: بوکە سورە تۆ چەند ساڵ ئەبی؟ ببورە! گوتی: بەقسەی دایک‌و بابم هەر نۆزدە ساڵ دەبم‌و نابم لەبن لێوم، گوتم، لەوێ ماچ نابێ کوشینی دەوێ گوتی: چی‌چی؟ نێرە زەلام ئەو تەوسە چبو پێت‌دا دام؟ گوتم: دەستت دەڵێم ئەتۆ ڕاوەستە بەسەرم مەڕۆ من تەمەنم بۆتە سی ساڵ ئەتۆش نۆزدەی بە حاڵەحاڵ کەوابێ من گەورە ترم جابۆیە دەبەرت مرم ئەگەر دەستت ماچ‌کەم نابێ خەسوم گوتی ئەبێ وابێ لەقاقای پێ‌کەنین‌یان دا شیرنی‌و شتی‌تریان هێنا دەگەڵ‌قسەی زەلام زەلام تاتوانیم شیرنیم خوارد بەڵام شۆکۆڵاتە نەرمە کانم سەبرێک داویشتە گیرفانم ئیتر ئەبو بڕۆم لەوێ تالێم وە درەنگی نەکەوێ پێڵاوەکانم دەست دانێ دەپێم نەکرد تا کۆڵانێ ئەگەر سەیری گیرفانم کرد پڕبون چی‌تریان نەدەبرد ئەوی لەکاغەز نوسرابو سەری هەمویانم دابو هەر مابو ماڵی 'لالەخان' ماڵی تۆزێک دوربو لێمان دەستە خوشکی'خێلە'ی‌من‌بو عەیب نەبێ! بێوەژن بو مێردەکەی دوساڵ لەمەوبەر ئەمری هەقی گەیشتە سەر هەستا بارگەو بنەی تێک‌نا ئەوژنەی لەپاش بەجێ ما هەر چەند لە هیچی کەم نەبو لەسەر وەش‌ڕا بێ‌خەم نەبو لەکۆشک‌و لەپارەو تەلار هەموی هەبون هەزار هەزار سایە چەورو دەست بە خێربو بەڵام ئەویش وەجاغ کوێربو لەدوای ڕەحمەتی، لالە خان کەوتە ناو سەروەت و سامان سینگ‌و بەرۆکی خۆم تەکاند بۆ وێ دەلاقانم وەراند *** دەستم بۆ جەرەس درێژ کرد دەرکەم هەر لەرێسمەش نەبرد! لالەخان دەرکی کردەوە ئیتر هەرواقم بردەوە ئای لەو ژنە خان و مانە ئای‌لەو لەشە نەرم و جوانە زاری وەک دەمی خونچە تەنگ پەرچی رەشی وەک شەوەزەنگ لەعەیبەت لاجانگی تەرزی پەرەنگی گوارەی دەلەرزی کراس لەسینگی دەخزی مەمکی دادەگرت بە دزی تاوێک عەبەسام! لەدوایی رۆژباشم کرد بە ئەسپایی کە ئەو وەڵامی دامەوە تۆزێک منیش بوژامەوە بەڕوخۆشی گوتی: فەرمو ئەحواڵت چۆنە لەگەڵ زو؟ گوتم: دەسەر سەرت گەڕێم باشم ئەگەر باش‌بێتە ڕێم گوتی: ڕاستە تۆ گۆڕاوی شێت بوی لەسەر خۆ نەماوی؟ گوتم: ئەگەر ڕاستت دەوێ مەرگی منت ڕەپێش کەوێ ئەگەر شێتیش نەبام ئەتۆ شێتت هەر دەکردم ئەوڕۆ بەڕاست تۆ تەمەنت چەندە؟ زەردەی هاتێ دەت‌گوت قەندە گوتی: وەک‌بێتە خەیاڵم من ئێستە سی‌ویەک ساڵم گوتم: جا بێ زەنا زەنا بێنە دەستت ماچ‌کەم دەنا هەر بەخەسوم بگاتەوە ڕەش و شینم دەکاتەوە ئەویش هێندم پێ پێ‌کەنی بە پێ‌کەنین خۆی کرد خەنی دەستی هێنا بەڵام چ دەست لەتاوان لێوی خۆم دەگەست ڕاست باشە، بەڵا لەدرۆدا درۆ ناکەم لەڕوی تۆدا منیش زۆر بە تامەزرۆیی ماچم کرد نەم کرد نامۆیی لێوم بە دەستیەوە نابو هێشتە دەستم بەر نەدابو گوتی: من قاوەم لێ ناوە تۆ شەربەت دەخۆی‌یان‌قاوە؟ گوتم: قاوەم پێ خۆش نیە شەربەتیش نازانم چیە! بەمن‌بێ ئەوان هەڵ گرە شۆکۆڵات لەوان خۆشترە گوتی: شیرنی قەیدی نیە من مەبەستم 'ئاوەکی' یە *** هەر ئەوەندەی گوت و هەستا لەسەر قسەم رانەوەستا چو بۆ شەربەت بەکوتەکوت منیش لەدڵی خۆمدا دەم‌گوت: -شەربەت، شەربەت، شەربەت‌چیە دەی‌جا چبو ئاوەکی یە ڕەنگە پێ‌ی وابێ بەفیزم نازانێ لەخۆ دەمیزم تاتوند لەوێ بێ شل چیە شۆکۆڵات بۆچی وەک‌ویە والله، لەسەر ئەو جوانیە فڕی بەدنیاوە نیە من لەوەدابوم هاتەوە دەت‌گوت خەون دەم‌باتەوە شوشەی لەپێشم هەڵ‌چنی گڵاسی دانان لەکنی ئەوجار لەسەر کورسی نەرم خۆشی دانیشت بەرانبەرم ئیتر من تەکبیرم چبێ؟ گوتم: چی ئەبێ با ببێ هەر ئەو گڵاسێ یەک ئەمن تاشوشەمان هێنان لەبن بەتاڵم کرد نەیەک نە دو هەرهات و سەرم گەرم بو هەوەڵ قومی پێم خۆش نەبو تۆزێک ڕەگی تاڵی‌ی هەبو دوایی ئاگام لەخۆم بڕا خەسوو مەسوم لەبیر نەما گەرم داییسام وەک ئاگر بەخۆم نەبو ترسام ئاخر من دانیشتبوم لە خۆڕا هۆدە لەدەورم دەسوڕا پەنجەرەو دەرک و لاشیپان هیچی لەجێ‌ی خۆیان نەمان مشکم لێ‌دەبو بەزەلام ئەوەش قەیدی نەبو بەڵام 'لالە' کە هیچ عەیبی نەبو دەگەڵ'خێلە'ی لێم تیک‌دەچو سێ سەعاتیش پتر پێ‌چو من سەرەگێژەم هەر لێ‌بو ئەوجار ئیتر پاڕا مەوە هێندێ دڵ خۆشی دامەوە تۆ بۆلە خەسوت دەترسی؟ گوتم دەش‌زانی‌و دەش‌پرسی ئاخر من هۆشم چانیە ئیشم لەجێ‌ی خۆیدا نیە گوتی: کێ دەڵێ تۆ هێڕی؟ هێڕی چی تۆ دەڵێ‌ی زێڕی ڕۆژ خەریک‌بو ئاوا دەبو تیشک ڕوی لەحەوا دەبو هەرچەند دڵم هەر نەی‌دەویست بەڵام قسەی ئەوم نەبیست بە نابەدڵ هاتمە دەرێ رۆژم ئاوا بردە سەرێ کە کیسەو قەننەم دەس دایە هاتم بگەمە بێڵایە باش‌بو ئەوەم لەبیر نەچو ئەوەندەشمان گوت دوبەدو 'ئامان لای خەسوم باس‌مەکە' نەء'تۆش هیچ‌مەڵێ شێتەکە' *** هاتمەوە ماڵ بەقنە قن ئەوڕۆژەنا ڕۆژی دوای من خێزان و خەسوم لێ‌بران بچنە دیتنی 'لالە خان' هەر تاوێک لەوێ‌بون و زو هاتنەوە زۆریان پێ نەچو ئیتر بەناو ماڵێ وەر بون هەردوکیان دەگیانم بەربون خێزانم روی خۆی دەڕنی... زەندەقت دەچو لەکنی تێڵایەکی لە دەستا بو لەسەر دەرفەت راوەستابو خەسوم هەر کەفی دەپڕژاند دەهات‌و دەچوو دەی قیژاند جامن بڵێم‌چی دەگەڵ تۆ ئەتۆو ناوخزم و هات‌و چۆ؟ منیش ئاگام لە هیچ نیە هەرنازانم ئەوە چیە -شێتەی ئاگا لەخۆ بڕاو ئەتۆو غەڵەتی وا گڵاو؟ لێرە هەستای حۆلی لاپان ئاوا چویە لای لالە خان؟ هەر ناوی لالەخانی برد لەئەژنۆ بەرەژێرم مرد لەشم سڕبو دڵم لەرزی لەوێ کەوتمە سەر عەرزی هاتم بڵێم سوچی وی بو من ئاوکیم لەکوێ دی‌بو نەی‌هێشت قسەکەم دەربڕم نەی‌هێشت هەردەم هەڵ‌پچڕم کڕبەکڕ دەنگت دەر نەیە. ئاگات لەدم و لەوسی هەیە؟ دەم‌گوت هەر گێل‌و ناوریای نەم‌دەزانی وا ماخولیای دەگەڵ دەستەخوشکی ژنێت.. جا چت‌پێ‌بڵێم خدرەشێت؟ ئاخر ئەو کاتە ئەتۆم نارد چەند کەڕەتم بەتۆ ئەسپارد هەرجێ‌یە چوی وەک عیسانان راست‌بچۆ ژوری میوانان لای لالەخان بۆ وات نەکرد بەجارێ حەیای ئێمەت برد لەوێ لەدەرکێ ڕاوەستای هەرچەندی حەولی لەگەڵ دای هەر گوێت‌نەدایە، دوربەدور گوتت تەنیای نایەمە ژور ئەسپاردەی منت لەبیر کرد ئەویشت ئاوا دڵ‌گیر کرد چیدیش ڕقم هەڵ مەستێنە هەستە ملی‌خۆت بشکێنە ئەو پارەی بگرەو هەر ئێستە ئیتر لەهیچ‌کوێ مەوێستە هێندێک شیرنی بکڕەو دیسان بچۆوە بۆلای لالە خان بەڵام ئەو جار بچۆ ژورێ داوای لێ بکە لێت ببورێ با گلەییم نەهێتە سەر بەڵکو لەدڵی بچێتە دەر *** پارەم وەرگرت و چوم گەرام باژێرم هەمو کرد بەڵام شتی‌تر ئەقڵم نەی بڕی منیش هەر ئاوەکیم کڕی!! دەستم بەسمێڵان‌دا هێنا ئەو جاریش ملم لەڕێ نا بۆ لای ماڵی لالەخان چوم بەڵام هەر بەدەستوری زوم دەستەو داوێنی بوم هەتا هیچ گرێ‌ی لەدڵ‌دا نەما! ئاوا دڵی ویشم داوە کێشەی خەسوشم بڕاوە ئەوەندەش ماوەپێت بڵێم بەوشەرتە دەدڵی نەگری لێم ئەگەر ئەقڵت هەیە کاکە... ئەتۆش هەر خۆت شێت‌کەی‌چاکە شێتی نەک هەر زەرەر نیە لەشێتی باشتر هەر نیە کێ ئەقڵی پارسەنگی دەوێ شت هەر وەگیر ئەو دەکەوێ لەوەش‌دا کێ دەم‌کا لۆمە ئەویش هەر ئاواڵی خۆمە ++++++++++++++++++++++ سەرناو: کوردوستان یان نەمان سەبارەت: ٦٥/١١/٢٨ - دەنگی کوردوستانی عیراق - کاروانی خەیاڵ، چاپی یەکەم، ١٣٦٤، لاپەڕەی ١٤٤-١٤٥ سڵاو پێش مەرگەی قارەمان چاکترین رۆڵەی کوردوستان کوری نەبەزی نیشتمان سڵاو پێش مەرگەی قارەمان هەڵۆی خوێناوی سەربەردان پەرکوری رەوەزو زەردان پڵینگی سەرشاخ و هەردان پێش مەرگە جوان‌مێری مەردان کوری کوردی ئازاو دلێر هەستە راپەرە وەکو شێر لەکوردوستان ڕامێنە تێر وێران بو وڵاتی زەنوێر ها، بروانە ئەو کیژۆڵە برا گچکەکەی لە کۆڵە چۆن دژ داماوە لەوچۆڵە چەندە هەژارو کڵۆڵە ئەو پێرە مێردی بێ تاوان روت‌و هەژارو سەرگەردان سەری‌ناوەتە سەر بەردان کێ ماڵی لێ‌کردوە وێران؟ دوژمن ئاغایە لەسەر تۆ ماڵی‌تۆ دەخوا بەفیرۆ کێ‌ما نەگا بەمافی خۆ ئێمە تاکەی دەستەو ئەژنۆ؟ ئەو خاکە خاکی کوردیە خۆخاوەنی دیکەی نیە سەبەب بۆهێرشی وی‌چیە کوردوستانەو کورد خێویە شەری مە شەڕی ژیانە شەڕی باوەڕو ئیمانە لەگەڵ‌وەتەن‌دا پەیمانە یان کوردوستان یان نەمانە دوژمن لەهێرشت تاساوە قەڵای هومێدی روخاوە لە دەست‌و بەردت راماوە ڕۆژی ڕەشی لەبەر چاوە لەکردەوەی ڕەنجە ڕۆیە مانی بەفێڵ و دهۆیە ئەوگەف و گەرمە درۆیە لەرزی شەو نخونی تۆیە باخوێنی من و تۆ برا بڕژێ، سورکا دەشت و چیا یاقوتی ناو سەوزە گیا کوردوستان ڕەنگین‌تر ئەکا تابڕژێ خوێنی گەش و ئاڵ لەسەر کەویان دەبێتە خاڵ شین دەکا گوڵان سەری ساڵ دەیکەنە تەواف کوڕو کاڵ کاتێ کوردوستان بو ڕزگار هاتەدەر لەدەستی زۆردار کەس نەما بەدڵی خەم بار بو بەشایی دێهات‌و شار ئەوسا بەرزکە ئاهەنگت گۆرانی‌و گاڵتەو جەفەنگت تاکیژو کوڕ بێن بەدەنگت ماچ بکەن لولەی تفەنگت ++++++++++++++++++++++ سەرناو: بەهاری کوردوستان سەبارەت: شێخاڵی - بانەمەڕی ١٣٣٥ هەتاوی - کاروانی خەیاڵ، چاپی یەکەم، ١٣٦٤، لاپەڕەی ١٤٦-١٤٩ - خالید حیسامی 'هێدی'، هەوارگەی غەزەڵ، لاپەڕە ٢٠ - ٢٣، بە کورتکراوی. - بەشێکی زۆری لەلایەن بەڕێزێکەوە بە ئای‌پی: ٥.٢١٨.٧١.٧٠ نووسراوە. چەند لە خونچەی بەربەیانی جوانە زەردە و پێکەنین بۆ نەمامی بەژنی تۆ سەد هێندە چۆپی و هەڵپەڕین دیمەنی شیرین و کۆڵمی سور و بەژنی ڕێک‌وپێک کەس تەماشای تۆی نەکرد وەک من کە نەیکوت ئافەرین گوێت لەمن بگرە گوڵم تاکوو بە کوردی پێت بڵێم: باسی کوردستانی گەورە یان بەهەشتی سەر زەمین لەشکری بای وەعدە هات و تەپڵی شادی گرتە دەس نایە بەر پێ شاخ و هەرد و کەویەبەفری هەڵدڕین ئاوەچۆڕەی کەوتە بن، بەفری نواڵە و شیو و دۆڵ تک‌تکەی دەڕژێت و دەترووسکێ وەکوو دوڕڕی سەمین خاکەلێوە هات بە ئاڵای دەوڵەتی نەورۆزەوە دایکوتا پەرچەم لەسەر کوێستانێ وێنەی فاتحین هەوری پۆل‌پۆل و گەواڵی دان بە سەریەکدا شەماڵ جێگە تەنگ بوو، پێکی دادان پێچەوانە١ و ڕاستەقین٢ کوێر و کەڕ سەرسامن، ئەو دەڕوانێ، ئەو گوێ هەڵدەخا یان شریخەی هەورە یان بەرقی بریسکە و تێک‌خوڕین خۆرنشین دەیدا بە سەر خۆیدا کە بۆ ڕۆژ هەڵنەهات ڕۆژهەڵات دەیدا بە ئەژنۆیدا لە تاوی خۆڕنشین دایڕژاند باران بە خاکی کوردەواریدا چلۆن هەر وەکوو فرمێسەکانی من لە دووری تۆ گرین چیمەنی کردۆتە پایەندازی بووکی سەر چڵوک شەونمی کردۆتە گوارەی گوێی گوڵاڵەی سوور و شین بولبولی مەست هەڵوەدای یاقووتی ناو پیرۆزەیە دەردەداری عیشقە کەنگێ سەر دەنێتە سەر سەرین چۆن بنووسم من کە چۆن شللێر و بەیبون لێکدران؟ چۆنی تاریف کەم کە چۆن مەندۆک و بیزا تێک‌بەزین؟ توولە ڕێواسی سەری هەڵدا، دڕی پەردەی حەیا ناسک و تورت و سپی وەک قۆڵی یاری نازەنین بانەمەڕ هات و هەواری بۆ نشیمەن هەڵبژارد وەک لەسەر تەختی زومەوڕەددا ببێ سوڵتانی چین بۆ بەخێرهێنانی میوانی بەڕێزی هەردوبۆ چاوەڕێ وێستاوە داوێن پڕ لە لالەی عەنبەرین ڕاپەڕی قومری سەری خونچەی پساند و خستیە پێی وەک کە شێوەی کوردەکانە گاووگەردوون سەربڕین بای شنە بۆ پێشوازی نەرم و هێدی کەوتە ڕێ زێڕوەشانی کرد سکەی بێ نەخشی پەلکی یاسەمین خێڵ ئەوە بارگەوبنەی هەڵبەست و گەورەی قافڵە کاروانی بردە سەرچاوەی ژیان و دابەزین وەک قەڵای ئەو عێلە بێ سەرهۆزی سەنگین و گران چادری هەڵداوە نۆ ئەستونەک و سێ لا بەرین لاوی شۆخ و شەنگە سەرگەرمی جلیت و تەقڵەیه بێریە باسکی هەڵدەکا دەڕوا بە قاقای پێکەنین لایە کاڕەی مێگەلی پاراو و نرکەی شەک‌بەران لای تری حیلەی کەحێلی تۆسن و ئەسپی بەزین زەمزەمەی جوتێرە، دەنگی لاوکە، گۆرانییە هەڵپەڕینە، داوەتە، شەکوایە، ئێخەدادڕین شوانە بلوێری وە ناڵین خستووە بەیتی کۆن دەکا کاکەمەم خۆی وای نەزانیوە هەواڵی خاتووزین گەرچی شیرینە بەسەرهاتی سیامەندیش دەڵێ: هەر لەپێناوی وەتەن سەربەرزئەکا هەڵ‌ئاوەسین یانی ئەو خاکە گەلێک لاوی لەدەس‌داون بەڵام حەیفە بۆغەیری شەهیدانی وەتەن گریان‌و شین تا بە چاوی خۆت ببینی هەرچی ئەوڕۆ لێی دوام دەستی من بگرە وەرە ئەی خۆشەویسەم با بچین ناتەوێ کۆشکی بڵیند و بورج و قەسر و سەرسەرا ئەستەڕ٣ و قەندیل٤ و سامڕەند٥ و سپی‌ڕێزت٦ کە دین زۆری پێ‌ناچێ کە ئەمن‌وتۆ بەکوێری دوژمنان پێکەوە سەربەست‌و ئازاد هەر لەناو گەل‌دا دەژین دەستی یەک دەگرین‌و وێکرا سەیری کوردوستان دەکەین ئێمە کۆیلەی کوردەکانین وەک سیامەند نامرین هێندی من دیتم لەڕابوردوی ژیانم سوێرو تاڵ هەر بەڕزگاری وڵاتم دەکرێ ساڕێژی برین لەو بەهارە خۆشەدا، لەو شادیە پیرۆزەدا پێشکەشی بەژنی جوانی تۆ سڵاوی ئاگرین ١. پێچەوانە: منفی ٢. ڕاستەقین: مثبت. کارەبالەویک کەوتنی ئەودوەپیک‌دی. ٣ و ٤ و ٥ و ٦. ئەستەڕ، قەندیل، سامڕەەند، سپی‌رێز: لەکوێستان وکێوە بەرزەکانی کوردوستانی ئەم‌دیوەو ئەودیون. ++++++++++++++++++++++ سەرناو: نەورۆز سەبارەت: خاکەلێوەی ١٣٤٥ی هەتاوی (٢١/٣/١٩٦٦ی. ز) - لە ئاهەنگی جێژنی نەورۆز لە گەڵاڵە خوێندرایەوە. - لەلایەن بەڕێزێکەوە بە ئای‌پی: ٨٣.١٢٠.٤٠.٤٥ نووسراوە. - ‎کوردیکا جێژنی کۆن وساڵی تازەی کوردەواری هاتەوە هاتەوە ئاگری خەباتی ئەو گەلە خۆش کاتەوە هاتەوە جوانتر لە جاران، جێژنی کاوەی قارەمان شوێنەواری میدیا، باپیرەگەورەی کوردەکان هاتەوە بگرێتە باوەش کوردەواری سەرلەبەر هاتەوە نەورۆز و بۆ زستانە ئیتر چارەسەر جێژنی نەورۆزە وەتەن! وا کاتی پیرۆزبایی‌یە جێژنی لاو و کیژوکاڵی تۆیە، ڕۆژی شایی‌یە هەر هەڵاڵەی زەردە بۆنی دێ لە ڕێگەی دوورەوە هەر چڵووکی دارە زەردەی دێ بە خونچەی سوورەوە ئەو گوڵاڵە ئاڵ و سوورە بولبولی سەرخۆش دەکا چەپڵەڕێزانێ لە زستان و قەلی ڕووڕەش دەکا تا شنەی هێدیی بەیان هات و هەناسەی کردەوە بەفری لاپاڵ و ترۆپکی شاخەکانی بردەوە زێوی ئاونگ بۆتە ملوانکەی ملی گیابەند و خاو هەر ترووسکەی دێ و دەلەرزێ، بای لە سەر بێ یا هەتاو بەرگی زستانی لە بەر خۆی داڕنی ئەوڕۆ زەوی نزم و بەرز و شیو و دۆڵ و ڕژد و هەوراز و نەوی تا لە نەورۆزدا خەڵاتی ساڵی تازە وەرگرێ ژەنگی داماوی و هەژاری و مەینەتی خۆی لابەرێ من بەڵێنت پێ ئەدەم ئەوڕۆ لە دەنگی کوردەوە ئەو کوڕەی زنجیری یەخسیری لە ئەستۆ کردەوە دڵ کە ڕۆژ و شەو دەسووتێ، ئاگری تۆی تێبەربووە بۆیە پیاوانە لەگەڵتا مەرجی خوێنی بەستووە دڵنیا بە جێژنە پیرۆزەی دوای نەورۆزی من جێژنی ئازادی گەلە و سەرکەوتنی پیرۆزی من ++++++++++++++++++++++ سەرناو: ئاوات سەبارەت: ٢٥/١/١٣٦٥ی هەتاوی (مانگی ٣ی ١٩٨٦ی. ز) - ورمێ - لەلایەن بەڕێزێکەوە بە ئای‌پی: ٨٣.١٢٠.٤٠.٤٥ نووسراوە. - @kurdica ناسرەون هەست و خەیاڵ، ئەی خۆزگە من دێوانە بام خۆزگە دەست و پێم لە ناو زنجیری بایە و وا نەبام زولفی سەر شانت عەزیزم، کاتێ هاتی شانە کەی من گوتم سەد خۆزگە دەنکی شانە بام و شا نەبام کەس وەک ئاوێنە بە وردی ناژمێرێ خاڵی ڕووت بۆیە ئاواتم بوو ئەو ئاوێنە بەستەزمانە بام شەو چەق‌وچۆی جووتێ بەی وام‌دەگرێ ڕۆژێ ڕەنگە من وا نەلەرزیبام لەسەر سینگی، ئەگەر لەرزانە بام نابێ ڕزگارم لە دانەی خاڵ و داوی کەزیەکەی من کە دەمویست قەت لە گیری داو و دانەدا نەبام زەردەخەندەی لێوەکانت هەر هەناسێکی دەوێ ئەو تەلەسمەم پێ‌نەدەشکا من کە وەک شەوبا نەبام تا پەرەنگ و پیاڵە وا لاجانگ و لێوت ماچ دەکەن من دەڵێم قەیدی چ بوو خوایە یەکێ لەو دووانە بام کێ هەبوو وەک شەم بسووتێ بۆ منی شەیدا ئەگەر خۆم لە دەوری وی وەکوو پەروانە بێ‌پەروا نەبام شەو بوو، ئەو بوو، مەی بوو، بسکی باوەشێنی ڕووی دەکرد هەر منی بێچارە لەو ناوە دەبوو بێگانە بام خۆزگە بۆ ئەو پێنج و دوو ڕۆژەی ژیانی خۆم منیش هەر وەکوو «هێدی» مەلی تۆفانی بێ هێلانە بام ماڵ و سەر ویستم بە جارێ وا فیدای تۆ کەم وەتەن ئەوڕۆ چیرۆک بێ لە ناو گەلدا، سبەی ئەفسانە بام ++++++++++++++++++++++ سەرناو: ژوان سەبارەت: ١/١/١٣٦٦ی هەتاوی (مانگی ٣ی ١٩٧٨ی. ز) - کەرەج - لەلایەن بەڕێزێکەوە بە ئای‌پی: ٨٣.١٢٠.٤٠.٤٥ نووسراوە. - t.me/kurdica - پێداچوونەوە: محمود چلبی ناڕژێ ئەسرینی من هێندە، ئەگەر دڵ داکەوێ ماڵی دڵ وێران بێ، ماڵ‌وێرانی کردم، ناسرەوێ هێندە بێزارم، دەڵێم دڵ هەر لە سینە بێنمە دەر تا بزانێ من نەبێ، ئەو ئاگرە کەس نایەوێ باشە چاو تێبینە دەیڕێژێتە داوێنم، دەنا گەنجی فرمێسکم هەموو تێدا دەچوو لێرە و لەوێ بەژنی تۆ گەر سەروە، سایەی خۆت لەسەر من کەم مەکە ڕووت ئەگەر ڕۆژە عەزیزم مەیگرە، با دەرکەوێ دەفتەرم پڕ کردەوە ئێستەش دەلیلی وام‌نییە فەرقی پێ‌دانێم لە بەینی خاڵی تۆ و خاڵی کەوێ گەر پەرەنگی گوارەکەت ئاوا نەلەرزێ لەو سەرە دەرفەتێ بۆ ماچ و کوڵمە گەزتنێ دەست ناکەوێ من دەڵێم دڵ کۆرپەیە، با لای‌لایی بۆ بکەم ئەو بە شیعری من کوڵی هەڵدەستێ، ئیتر ناخەوێ هەر دەبوو ڕۆژی هەوەڵ من دوو دڵم بێ و یەک زمان تا لە ماڵێک‌دا ئەڤین و ئاوەزم نەبنە هەوێ بسکەکانی تۆ گوڵم! لاجانگی تۆیان گرتووە بەو هەناسە ساردە خۆ من ئەو تەمەم پێ‌ناڕەوێ من بە یادی تۆوە گۆشێک و خەیاڵێکم بەسە سووڕی ئەو چەرخە ئەگەر نەمخاتە گێژی گێژەوێ دوور لە خەڵکی دەس لە ئەستۆی یەک دەکەین ئەمن و خەیاڵ کەس ئیتر بەو ڕازە نازانێ کە من لەو چم دەوێ گەر بەڵێنم لێی بوێ دووبارە بۆ ژوانێکی‌تر پێم‌دەڵێ شەوگار درێژە کوێ بڵێی من دێمە وێ من لە سایەی زولفی تۆوە ڕۆژی ڕووناکم نییە شیوەنم جا تازە کەڵکی چی هەیە نیوەشەوێ ئەو وڵاتە ئەو کوڕەی ناوێ بە سەربەرزی نەژی باوەشی دوژمن نەبێ نایبێ ئەوی کوردی نەوێ تۆ پەژارەی چیتە «هێدی» دڵنیابە چارەنووس چاوەڕێتە، ڕۆژێ هەردێ کوردەواری سەرکەوێ ++++++++++++++++++++++ سەرناو: بزە سەبارەت: لەلایەن بەڕێزێکەوە بە ئای‌پی: ٨٣.١٢٠.٤٠.٤٥ نووسراوە. - @kurdica نازانم بۆت لە چی بدوێم؟ هەروا لە شتی جوان دەگەڕێم لە مانگ، لە ڕۆژ، لە ئەستێرە لە شتی بەرچاو، لەوێ، لێرە هەرجێیە زەنوێر و بەرزە ئەوی زۆر دڵگر و تەرزە لە وەنەوشەی تەڕی بەهار لە خونچەی سەر چڵووکی دار لە ترووسکەی ئاوی ئاوهەڵدێر لە وێنەی مانگی ناو ئەستێر لە ئاونگی سەر پەلکی شین کە بە شنەی با دێتە لەرین لە گوڵ، لە پێکەنینی گوڵ لە بولبول کە بۆی دێتە کوڵ لە هەنیەی سپی و قەتارە لە لاجانگ و ورشەی گوارە لە ڕووی ناسکی کچ کە بڕێ لە شەرمان سوور هەڵدەگەڕێ لەو مەمکەی لە ناو باخەڵدا هاتووە سەر لە کراسی هەڵدا لە نێوقەدی شل و نەرم نەرم‌وشلی باوەش گەرم لە ڕەشانگی پینەپینە کە کەو لێی دەکەونە چینە لە قەڕەنفڵی ناو پەرژین لە یاقووت، لە پیرۆزەی شین هەریەک چەشنێ جوانن لە لام جوانی تریش زۆرن بەڵام ئەو خاڵەی لە کوڵمەی زێوت خلیسکا بۆ سووچی لێوت تۆ ئەو ئاوێنە ڕاگرە بە من، لە هەموان جوانترە ترسم هەیە تێی ڕامێنی دەگەڵ بزەت بی‌بزوێنی دەغیلت بم، با هەر وا بێ نەوەک لەوێش تلاسابێ گوڵم! ئاوێنەکەت دانێ بزەی تۆ گەمەی نازانێ ++++++++++++++++++++++ سەرناو: بۆ براکەم سەبارەت: مهاباد، ١٣٤٤٫٠٤٫١٢ی هەتاوی (مانگی ٧ی ١٩٤٥ی زایینی) - لەلایەن بەڕێزێکەوە بە ئای‌پی: ٥.٢١٨.٢٠٥.١٦٨ نووسراوە. نامەیێکم پێگەیی هەر وەک گوڵاوی پەرچەمت وەسوەسەم کرد، ئەی خوا کەی دەم بنێمە ناو دەمت خۆزگە دەمزانی لە غوربەت کێیە بێ من هاودەمت خۆ دەزانی گیانە بۆ من ناکرێ تەرکی غەمت چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە وێنەکەت دەرمانی سەرجەرگی برینداری منە وەختی دڵتەنگی بەبێ تۆ هەر ئەوە یاری منە دیتنی، ڕووناکی بۆ دوو چاوی جۆباری منە تا کوو لێت دوورم عەزیزم شیوەنت کاری منە چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە نامە سەر دوو چاوی تەڕ وێنەت، لە پاش ماچ کردنی سەر دڵی شێواوی خۆمە، جێی لە پاش هەڵگرتنی شەمعی ڕووت بۆ من حەیاتی باقییە، هەڵکردنی وا لە دڵ هاڵاوی، بەخوا حەستەمە لابردنی چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە سەیری کوردستانی چۆل کەم یا تەمی کوێستانی دڵ داخی دووری تۆ بچێژم، یا غەمی هیزار لە مل ئەی خەزانی غەم بڕۆ، با شین بێ باغم چڵ بە چڵ ئەی فەلەک با بێ بەهارستانی من سێ چەپکەگوڵ چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە شێت و ماخولیای غەمی تۆم، گیانە من دێوانە نیم مەستی جامی مەیلی تۆم و ئەهلی نێو مەیخانە نیم ڕاستە سووتانم بەڵام بێ‌شەمعە خۆ پەروانە نیم خاکی کوردستان دەڵێ پێت ڕۆڵە من وێرانە نیم چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە گیانەکەم پێت وا نەبێ شانۆی گەزاف و لافمە مەیلی تۆ نیشەی دڵی خەمدیو و سینەی سافمە هێرشی بەدخوییتە گەردون موکەنیزەی جافمە هەر شەوی هیجرانی تۆیە مەوریدی ئەوسافمە چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە دەردی دڵ بۆ کێ بەیان کەم، دڵ کە نالاوێتەوە ئەو گڕووی گرتوویە چ بکەم بێ تۆ ژیر نابێتەوە بەفری بەفرانبارە، بێ بای وەعدە قەت ناچێتەوە ئەی خوا کەنگێ عەزیزی ئەو دڵەی من دێتەوە چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە باوەڕی نایە بەژینم دڵ بەدەس جزیاتەوە خۆشە ڕۆح دەربێ و بەجارێ بیخەمە ژێر پاتەوە چونکە تەنیا هەر دڵێکە و سەد بەڵا دەیباتەوە چەرخی چەپگەرد لێم بەقینە دەست لە من ناکاتەوە چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە بولبول ئەر مەیلی سەفاتە، بێرە لای من لەحزەیەک نابێ بۆ ناڵین و سوتان قەت وەکوو من بەندەیەک من بە بەندی نیشەدار و تۆش گوڵی سوور دەستەیەک تۆ ورینگەی شیعری ژێر و کەو، لە کۆتریش لەنجەیەک چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە گوێت لە بەندی ئاخرم بگرە، هەتا ڕوح ماوە پێم گەرچی ئاڵۆزە بەڵام بمبورە چون 'شێواوە' لێم تا بە ڕووناکی چرای گۆنات دەبینم دەست و پێم سەر لەسەر ئێخەی خەمی تۆ پڕ بە کوردستان دەڵێم چاوەکانم بەسیە غوربەت بێرەوە چۆن بژیم من؟ تۆ لەوێ، من لێرەوە ++++++++++++++++++++++ سەرناو: بێ‌وەفایی سەبارەت: هەولێر - گەڕەکی برایەتی خاکەلێوەی ١٣٧٤ی هەتاوی، ١٩٩٤٫٠٤٫٠٤ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣١٠و٣١١. - لەلایەن بەڕێزێکەوە بە ئای‌پی: ١٩٢.١٥.٤٦.١٠٨ نووسراوە. ئاشکرا ڕه‌نگی غه‌ریبی دیاره‌ لێره‌ پێمه‌وه‌ ئاخری به‌و ده‌رده‌وه‌ تێدا ده‌چم، ده‌توێمه‌وه‌ هێند له‌ دووی کوردایه‌تی چووم، هێز و تینم لێ بڕا پێم له‌ دوو نایه‌ بڵێم هه‌نگاوی دی داوێمه‌وه‌ تاوێ دڵ لێدانی تونده‌، تاوێ خوێنم هه‌ڵده‌چێ به‌و زووانه‌ به‌و فه‌تا پیسانه‌وه‌ ده‌توڵێمه‌وه‌ من که‌ وه‌ک بولبول چریکه‌م کورده‌واری پڕ ده‌کرد ئێسته‌ وه‌ک له‌گ له‌گ له‌ سه‌ر بێچووی شێعر ده‌ڕشێمه‌وه‌ بوو به‌ پایه‌ و کاخی کێ گه‌رمین و کوێستان کردنم؟ ! هه‌ڵوه‌دای چم من؟ له‌ جێیه‌ک بۆچی ناگیرسێمه‌وه‌؟ ئاو مەکە نێو ئاشی زۆرداری، پەشیمان دەبیەوە ئەو وتە پەندێکە شیرین، بۆیە هەر دەیڵێمەوە ڕۆژی ڕوون چووم بوومه‌ عه‌نته‌ر، بۆ یه‌کی دی هه‌ڵپه‌ڕیم ئێسته‌ وه‌ک ڕێوی به‌ شه‌و بۆ سیرمه‌کۆن ده‌خولێمه‌وه‌ خۆزگه‌ هه‌ر مردن هه‌با و ده‌ردی په‌شیمانی نه‌با دیزه‌ هه‌ر بۆیه‌ ده‌ڵێ: بشکێم و نه‌زرینگێمه‌وه‌ چەند گوتم لەو ساز و فیکە خۆم ڕەها کەم، هەر نەبوو وەک گیای ویشک لەسەر ئەو پنجە هەر دەڕوێمەوە پشت به‌ یاری بێ‌به‌ڵێن وه‌ک 'هێدی' نابه‌ستم ئیتر تازه‌ حاشا من له‌ په‌یمان و وه‌فا بدوێمه‌وه‌ تا له‌ تۆ دوورم موکوریان، دڵ به‌ هیچ ناپشکوێ من خراپ بووم، ئێوه‌ چاک بن، لێم گه‌ڕێن با بێمه‌وه‌ ++++++++++++++++++++++ سەرناو: چاوەڕێ سەبارەت: بەغدا- حەی ئەلقودس، ١٩٩٦٫١٢٫٢٠ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣٢١و٣٢٢. - لەلایەن بەڕێزێکەوە بە ئای‌پی ١٩٢.١٥.٤٦.١٠٨ نووسراوە. ڕازی من ون ناکرێ تازە هەتا دیدەم هەیە کار لە حاشا دەرچووە، دیدە ئەوەندەی نەم هەیە ئای لە دەس دیدە و دڵی خۆم، چم بەسەر هات، ئەی چلۆن یان لە تای ئەودا دەلەرزم، یان مچوڕکی ئەم هەیە شێت هەیە ئاگای لە کاری خۆشەویستی هەر نییە ئەو بە دێوانەم دەزانێ، من پەژارەی وەم هەیە ماڵی ئاوا بێ ئەڤین چیرۆکی هیند لێ‌کەوتەوە لەیل و مەجنوونیش تەواو بێ، داستانی مەم هەیە خاڵ و لێوی چۆنە داخوا هێندە جووتن پێکەوە وەک بزانم وردە ڕازێکیان وەکوو هاودەم هەیە بادە نین واژەی من و تینووی ئەڤین وا مەست دەکەن هەر دەڵێی پەیمانە پەیوەندی لە گەڵ بەستەم هەیە من خەمی خاڵێک دەخۆم، تەنیا ئەوەندە و هیچی تر لەو جیهانە گەورەدا هەر ئەو خەمە وردەم هەیە چاوەڕێ بووم چەند بە چەند بۆ دیتنی، ئەمما نەبوو ئەو نەهات، یان هەر لەبەر چاوی من ئەوڕۆ تەم هەیە؟ شیعر و بادە، مەستی دێنن وەک یەک ئەمما سەیرە پێم بۆ لە سەرخۆشیی شێعردا، ‌هێندێ ڕەنگی خەم هەیە بێ‌وەفاییم گەرچی لێ دیوە بەڵام بەو حاڵەوە هێشتە هەر بۆ نازی وی، کڕیاری وەک من کەم هەیە 'هێدی' بەڵگەی زۆرە بۆ هاوار و شینی نیوەشەو گەر پەڕی پەروانە سووتا، شاهیدی وەک شەم هەیە ++++++++++++++++++++++ سەرناو: پەرێشانی سەبارەت: هەولێر- گەڕەکی برایەتی، ١٩٩٥٫٠٣٫١٠ی زایینی، خاکەلێوەی ١٣٧٣ی هەتاوی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣٤٢. - لەلایەن بەڕێزێکەوە بە ئای‌پی ١٩٢.١٥.٤٦.١٠٨ نووسراوە. چاره‌ی خه‌می من مه‌ی نییه‌، مه‌یخانه‌‌ بڵێ چی؟ به‌و ده‌رده‌وه‌ مه‌ی نامگرێ، په‌یمانه‌ بڵێ چی؟ پێم وا نییه‌ له‌و غه‌دره‌ له‌ فریام بکه‌وێ که‌س ئه‌و دۆست بوو وه‌فای بۆم نه‌بوو، بێگانه‌ بڵێ چی؟ بسکت بده‌ ده‌س شانه، ‌ به‌ڵام چین مه‌خه‌ ئه‌برۆ زولفی تۆ شنه‌ تێکی‌ده‌دا، شانه‌ بڵێ چی؟ هه‌ر عاشقه، ‌ سووچیشی نه‌بێ، ده‌یخه‌نه‌ ئه‌ستۆی شه‌م ئاگری کردۆته‌وه‌، په‌روانه‌ بڵێ چی؟ تاوانی منه‌ ده‌ربه‌ده‌ری و ده‌ردی‌سه‌ری من مه‌ل خۆی سه‌ری خۆی هه‌ڵگرێ، هێلانه‌ بڵێ چی؟ شێتی قه‌دی تۆ شه‌رتی له‌گه‌ڵ چۆڵ و چیا بوو زانا بێ به‌ زنجیره‌وه‌، دێوانه‌ بڵێ چی؟ خاڵی تۆ به ‌په‌رژین و خه‌یاڵ ناسک و ساده‌ بێچاره‌ لەناو ئه‌و هه‌موو پاوانه‌ بڵێ چی؟ چیرۆکی جوانی تۆ له‌ناو لاپه‌ڕ و دێڕا ناگونجێ، ئیتر نووسه‌ری ئه‌فسانه‌ بڵێ چی؟ تاسه‌ی تۆ که‌ دامده‌گرێ، ده‌ڵێن: 'ئاخری خێر بێ! ' 'هێدی' له‌گه‌ڵ ئه‌و کۆنه‌برینانه‌ بڵێ چی؟ ++++++++++++++++++++++ سەرناو: فریو سەبارەت: هەولێر- گەڕەکی ئەفسەران، ٢٠٠٠٫١٢٫٠٣ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣١٢. - لەلایەن بەڕێزێکەوە بە ئای‌پی ١٩٢.١٥.٤٦.١٠٨ نووسراوە. دڵ پەرێشان و به تاسەی تۆوه بیرم ماندووە من به گۆشەی چاوی تۆ زۆر جار فریوم خواردووه هەر له ڕێی تۆدایه هەست و گەر نەبووبێ قاسیدیش من به سروەی بای بەیانیدا پەیامم ناردووه وەختی هاتوە کەس ئیتر لەو عیشقه سەرکۆنەم نەکا تازه کاری من له ڕیسوایی و مەلامەت دەرچووه یەک دەڵێ خاڵه لە ڕوویدا، یەک دەڵێ پیرۆزەیه گەنجی وی بازاڕی گەرمه ماڵی من وێران بووه چاوی سەرچاوەی بەڵایه، فیتنەیه، ئاژاوەیه بۆ خەیاڵ شێواندن و دێوانه کردن جادووه چەند خەیاڵی من لە دەوری بەژنی وی دێت و دەچێ ڕازەکەی ناردوومه پێیدا، هێشته نەیدرکاندووه یار بەڵێنی داوه پێم و دووره لێم جێژوانی کۆن چۆن لەوێ زۆر جار پەریی شێعرم له ئامێز گرتووه قەت له چاکەی من نەجاتی نابێ 'هێدی' چونکه من بوومه کۆیلەی ئەو کەسەی ئەو هێنده خۆشی ویستووە ++++++++++++++++++++++ سەرناو: گراوی سەبارەت: هەولێر- گەڕەکی ئەفسەران، ١٩٩٩٫٠٦٫١٥ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣١٩. - لەلایەن بەڕێزێکەوە بە ئای‌پی ١٩٢.١٥.٤٦.١٠٨ نووسراوە. خۆشەویستی دەرد و ژانی بێ ژماری پێوەیە مەینەتی چۆل و چیا ڕیسوایی شاری پێوەیە دوور دیارن ئەۆ کەسانەی عاشق و سەوداسەرن ڕەنگ و ڕوویان مۆری غەدری ڕۆژگاری پێوەیە جێی وییە سەر هەر دوو دیدەم بۆیە هەر لایە دەچم دار و دیواریش دەبینم نەخشی یاری پێوەیە نەک نیگام سەر هەڵگرێ بۆ سەر گوڵی تر سەربەخۆ چاوی من لەجیاتی پێلوو، پەردەداری پێوەیە هەر لە بەژن و بسک و هەنیە و گەردنی، تا خاڵی ڕووی پاکی بەڵگەی قودرەتی پەروەردگاری پێوەیە نەمرێ وەستای گوارەکانت، بەو زریزەی ناسکەی شاهکاری کردوە هێندی وردەکاری پێوەیە سوور دەزانم لەو قەرارە ڕۆژێ فیتنە ساز دەبێ گەر دەبینم مانگی چاردە فێسی لاری پێوەیە ئاشکرایە نازی گەر دەڕوا، ڕوانینی بەڵام چەند ئەوەندەی نازی ڕازی نادیاری پێوەیە شێعری من بۆنی گراویی لێ دێ، 'هێدی' مەست دەکا جا کە خۆی بێ چی بەسەر دێ، سەد بەهاری پێوەیە ++++++++++++++++++++++ سەرناو: گوڵی خوێناوی سەبارەت: ١٩٦٦/١/١٢ز - رادیۆ دەنگی کوردستانی عێراق - مانگی ١٠ی ١٣٤٤ی هەتاوی - کاروانی خەیاڵ، هێدی، چاپی دووەم ١٩٩٧ز، لاپەڕەی ١٨٠-١٨٢ - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣٠٣-٣٠٥. - نیوەی ئەم شێعرە لەلایەن بەڕێزێکەوە بە ئای‌پی ١٩٢.١٥.٤٦.١٠٨ نووسراوە.. کۆڵمەت گەش و ڕووناکە، دەڵێی تیشکی هەتاوە جوان‌چاکی کراسێکە بە بەژنی تۆ براوە ئاسک سڵە، نەک هێندی تۆ نەشمیل و ڕەزاسووک گوڵ پێدەکەنێ نەک وەکوو تۆ وا بە حەیاوە بسکت دەگەڵ ئەو ڕوومەتە تێکەڵ بووە هەر وەک باغی گوڵە پەڕژینی بە ڕەیحانە کراوە سەد حیکمەتی گەر خوێندبێ، نازانی بە دەردم هەر کەس بە گڕی ئاگری تۆ هەڵنەچزاوە جوانیت بەسە، بەرموورەکەی ئەستۆت بپسێنه من کوردم، ئەزانم که له بەندی چ کراوە تا گواره له گوێت دێته لەرین، دێتەوە بیرم هەر لاوێ که لەو خاکه له سێداره دراوە هەر لالە کە دەیبینی وەکوو ڕوومەتت ئاڵە هەر خونچەیەکی خوێنی شەهیدێکە ڕژاوە هەرچی هەیه هەر باسی برۆ و بسک و خەت و خاڵ هەر بەینی من و تۆیه که کەس لێی نەدواوە هەر مەرجی من و تۆیە وەتەن ماوە وەکوو خۆی هەودایە وەتا من هەم و تۆ هەی نەپساوە سەیری کە لەدەست هەڵمەت و پارێزی کوڕی تۆ دوژمن لەهەمو لاوە چلۆن مێشکی پژاوە دەنگی کوڕی تۆ دوژمنی هێناوەتە لەرزین دەنگێ کە ئەڵێ‌ی هەورە بەسەر شاخ و چیاوە هاواری گەلی تۆ ئەوە دەرچو لە نهێنی ئەو پەردە بە گوللەی کوڕە پێش مەرگە دڕاوە سەر کەوتنی تۆی دیوە وەتەن، دوژمنی ڕو ڕەش وا ڕۆژی ڕەشی هات و چرای ڕونی کوژاوە ئەو جۆگەلە خوێنانە کە دەڕژێنە خڕو دۆڵ فرمێسکی کوڕی تۆ نی‌یە والێڵ و قوڕاوە خوێنی دڵی دوژمنتە وەتەن تاکو نەڵێن پێت تۆڵەی 'نەبی'١یو 'عزت'٢و'میرە'٣ی نەکراوە کاوانی٤ گوێ بگرە لەدەنگی گەلی ئازات سەر هەڵبڕە لەو خاکە ببینە چ کراوە تاوانی وەکو تۆی چوە پێش مەرگە کە ساتێ نەسرەوت و هەتا خوێنی نە ئەستاند، نەحەساوە تۆڵەی بەچی دەستێندرێ گەنجێکی وەکو تۆ تابن سەری ئاڵای گەلەکەی لێ نە چەقاوە ئاڵا دەبێ جێ‌ی بن سەری تۆ بێ کە نەڵێ کەس ئەو پەرچەمە ڕەنگینە بەخوێن ئاو نەدراوە شانازی ئەکا کورد کە لە مەیدانی خەباتا بارزانی قەڵای ئاسنی کوردی بە پەناوە بارزانی سەرۆکی مەزنی کۆمەڵی پارتی کوردێک کە هەتا هەبوە بەسەربەرزی ژیاوە ئیلهامی لەوی وەردەگرێ پارتی خەباتگەر وا بۆ وەتەنی گیان و ڕوحی هیچە بەلاوە ژەنڕاڵێ کە هەر ئەو تەمەنی پیرو جوانی داناوە لە ڕێ‌ی ئەو گەلەداو کۆڵی نەداوە ئەی خۆش بی وەتەن بۆ کوڕی گرتوتە لە ئامێز ئەی نەڕزێ دەسی تۆڵە ستێنت کوڕی کاوە ١. نەبی سەر ئاسن بارزانی. ٢. عزت عبدالعزیز ئامێدی. ٣. میرۆ شێروکی بارزانی هەر سێکیان شەهید کراون عزت عبدالعزیز کە لە شۆڕشەکەی ساڵی ٤٥ بارزانیدا بەشدار بو دوایی حکومەتی بەغدا لە داری دا، ئەوانی‌تر لە شۆڕشی ١١ی ئەیلول دا لە جەبهە شەهید بون. ٤. شەهید مەحمود کاوانی شەقڵاوەیی، لەجەبهە لە شۆڕشی ١١ی ئەیلولدا شەهید بوو. ++++++++++++++++++++++ سەرناو: بێ سنوور سەبارەت: هەولێر- گەڕەکی ئەفسەران، ١٩٩٩٫٠٤٫١٥ی زایینی، ١٣٧٨٫٠١٫٢٤ی هەتاوی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٢٧١. - لەلایەن بەڕێزێکەوە بە ئای‌پی ٨٣.١٢١.١١.٢٣٨ نووسراوە. ئاهـ و ناڵەی دەردەداریمە لە سینەم سەر دەکا ژانە هەڵناکا لەوێدا، ڕوو لە نێو دەفتەر دەکا دڵ بەڵا وای دەورە داوە خۆی زمانی ناگەڕێ دێ پەنا بۆ شیعری من دێنێ، خەمی پێ دەردەکا من لە دەس ئازاری پیری لەو کەلاوە دەچمە دەر یادی گەنجی دێ لە سەحراش قوڕ بە ماڵم وەردەکا. ماڵی خەم ئاوا کە چاوی لێمە، ئەوڕۆ ئەو نەبێ کێ لەسەر پەڕتووک و جەستە و بیری من سێبەر دەکا من دەڵێم وا باشە تەفرەی تۆ سنوورێکی هەبێ بۆ من ئەو چیرۆکی ئاوی ژین و ئەسکەندەر دەکا ڕازی هێند لێ ئاشکرا کردم خەیاڵم خستە بەند ئەو لە گرتووخانەکەشدا هێشتە هاوار هەر دەکا سەر وەبەر کەس نایەنێ 'هێدی'، بەڵام بۆی هەڵکەوێ چۆڕێ ئاوی دیدە دێنێ و سەر وەپێی ڕێبەر دەکا ++++++++++++++++++++++ سەرناو: گیرۆدە سەبارەت: هەولێر- گەڕەکی ئەفسەران، ٢٠٠١٫٠٤٫٢١ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣٠٨. - لەلایەن بەڕێزێکەوە بە ئای‌پی ٨٣.١٢١.١١.٢٣٨ نووسراوە. کەی وتەی من وا بووە بێ یادی تۆ دەنگ داتەوە کێ هەیە وەک تۆ بە خاڵێ دەفتەرێ پڕ کاتەوە؟ ! دڵ دەڵێی شێوەی وەفاداری لە زولفت فێر بووە وا بە شێواوی سەری هێناوەتە ژێر پاتەوە کەس نەبوو بۆ ئاوی دیدەی من سنوورێک دابنێ تاکەی ئاخر هەر ئەمن بینووسم ئەو بیشواتەوە هەر لە سایەی شەونمی گۆنات کە دەڕژێ جاروبار خاڵی لێویشت لە ئاوی زمزمێ دەخواتەوە گەرچی مەیدانی بەترس و سامی زۆر دیوە خەیاڵ ئەوڕۆ ئەو بێچارە خۆی بەندە بە یەک هەوداتەوە چەندی کردم بەڵکوو تەسویری بزەی تۆ هەڵگرم من بە دووی واژێکی شیرن‌دام کە خەو دەمباتەوە دەردی سەرگەردانی هەر دەڕوا، دوایی هەر دێ خەم زۆری پـێناچێ دەبینی 'هێدی' ڕۆژی هاتەوە ++++++++++++++++++++++ سەرناو: پاوان سەبارەت: هەولێر- گەڕەکی ئەفسەران، ٢٠٠١٫٠٣٫٠٥ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٣٢٠. - لەلایەن بەڕێزێکەوە بە ئای‌پی ٨٣.١٢١.١١.٢٣٨ نووسراوە. یار لە مال بێتە دەرێ جێژن و چراخان ئەوەیە ببمە قوربانی لەبەر پێی، حەجی هاسان ئەوەیە گەنجی هەڵدایەوە سەر سینگ و بەرۆکی داخست شنەباش ڕیی نییە لێی تێپەڕێ، پاوان ئەوەیە لەرزوتای ماچێ منی کوشت و خەیاڵی ناشی چوو بەگژ پەرچەمیدا هاتەوە، شێوان ئەوەیە ڕۆندکی دیدە ئەگەر تێپەڕی لە سنووری مژۆڵ ڕوومەتی شوشت و ڕژا کۆشەوە، گریان ئەویە شەرتی دڵداری وەفاداریە، ئەڤینداری هەژار زوێڵەچەرمێکی هەبێ بەسیەتی، پەیمان ئەوەیە وێژەوانم دی هەموو وەک مەلەوانی دەریا لێوەشاوەی وی نەیانبوو وشەیەک، جوان ئەوەیە! بە قەڵای کۆن و لەمێژینە مەڵێ وێرانە خۆشەویستی لە دڵا گەر نەبوو وێران ئەوەیە ئەوە گرتن نییە واژەی پەتی دەگرن دەستم سووچی هەنیەی وی کە فێس دەیگرێ، گیران ئەوەیە هۆش و بیر هەردوو لە دووی خاڵێ لە 'هێدی' تۆران وەرە بیبینە بە تەنیایی! پەرێشان ئەوەیە ++++++++++++++++++++++ سەرناو: بە یادی محەمەدی ماملێ سەبارەت: هەولێر- گەڕەکی ئەفسەران، ٢٠٠٠٫٠١٫٢٧ی زایینی. - کاروانی خەیاڵ، هێدی، چاپی ٢٠١٦، پێداچوونەوەی: ئاڕمان کەریمی، لاپەڕە ٢٨٨و٢٨٩. - لەلایەن بەڕێزێکەوە بە ئای‌پی ٨٣.١٢١.١١.٢٣٨ نووسراوە. لە دەستی چوو هونەرمەندێک موکوریان موکوریانی هەموو پێ کەوتە گریان بە یادی ماملێ هێشتە شەو و ڕۆژ دەرێژن ئاوی سوور و سوێر لە چاوان ئیتر کیژان بەچی شایی بگێڕن لە مەڕدۆشین و سەرکانی و دەراوان ئیتر ئەوجار لەناو کۆڕی شەوانە لە کێ بخوازن ئاهەنگێکی لاوان؟ ! هونەرمەند نامرێ، ئەمما هونەر مرد ئەگەر ئەو دابڕا ناوی لە ناوان لە دووریی یەک ئەڤیندار گەر دەسووتان گڕێک بوو ماملێ دەیخستە هەناوان لە ناو دەریای هونەردا کێ بەدیی کرد مەلی وا پێ بە پەردە بۆ شەتاوان؟ ! ئیتر کێ تازە وەک ئەو دادەڕێژێ لە چوارچێوەی ئەدەبدا بەند و باوان ئەگەر ئەوجار بێ گیان داوێنە بەرپێی هەواداری (محەممەد) هێند دڵاوان ++++++++++++++++++++++ سەرناو: پایز سەبارەت: ١٩٦٥/١٢/٣ز - دەنگی کوردستانی عیراق - مانگی ٣ی ١٣٤٥ هەتاوی - کاروانی خەیاڵ، چاپی دوهەم: هەولێر، ساڵی ١٩٩٧ زاینی، لاپەڕەی ١٧٨-١٧٩ پایزەو هەر بەکزەی باوە خەزەڵ هەڵدەوەرێ مەل لە هێلانە لە سەرمان سەری ناکاتە دەرێ شەختە بردویەتی دارو دەوەن و دەشت و زەوی تۆزی سیخواری لەسەر نیشتوە هەورازو نەوی زەردە لێ‌ی داوە لە دور ڕا دەتروسکێنێ سەهۆڵ شەونم و سەوزە گیا بونەتە فرمێسک و مژۆڵ سەری شێواوە دەناو هەورو تەمێ‌دا قەندیل ١ گوڵی نێو باوەشی پەڕپەڕ بو، هەمو ڕۆیی بەدیل سەر دەسوڕێنێ کلوی بەفرو بە زریانەوە دێ دێ‌و لەسەر ویشکەڵ و پوشی گوڵی شەوبۆ دەکەوێ بەندو سەرمایەکی وایە کە زەوی ڕێک دەکوشێ دارو بەردو لق و پنچک هەمو لێک هەڵدەوەشێ خۆی دەپارێزی بەلەونێکی ئەوی زیندەوەرە جێ‌ی لەبەر ئاگرو ناو ژوورە ئەوی گیان لەبەرە غەیری پێش مەرگە کە هەر سەنگەرە جێ‌ی ڕۆژو شەوی سەنگەری گرتوە بردویە زراوی نەتەوی هێندی لێ شیرنە ڕاسان و شەڕو دەست و تفەنگ کوڕی گۆڕین دەیەوێ ڕێکی کوشێ سەنگەری تەنگ دەڵێ ئەی دوژمنی ناپاک ئەوە گۆیەو مەیدان ئەبێ هەر قشڵەیەکت لێ بکەمە گردی سەیوان ٢ من کوڕی کوردم و سەودا سەری کوردستانم نی‌یە لام نرخی لە پێناوی وەتەن دا گیانم پڕ لە شانازی‌یە تا ئێستە هەمو دەفتەری من جەرگی دوژمن دەبڕێ ڕۆژی هەرا خەنجەری من بەفرو سەرما چی‌یە، سەد هێندە کە بڕژێتە سەرم نی‌یە باکم کە ئەمن گوللە لە باوەش دەگرم بەری من ناگرێ دوژمن بە گەف و تۆپ و تەشەر نابێ ڕزگاری لە چەنگم ئەجەلی گەیوەتە سەر شەرتە کردومە دەگەڵ دایکی وەتەن، یا دەمرم یان لە دوژمن هەقی فەوتاوی گەلم وەردەگرم ١. قەندیل: کوێستانێکی گەورەیە لەودیو کە لەو شاخە لە هێندێ جێ چلەی هاوین ئاو ئەیبەستێ. ٢. گردی سەیوان: لەشاری هەڵمەت و قوربانی سەلەیمانی‌یەو شوێنی ناشتنی گەلێک شەهیدە. ++++++++++++++++++++++ سەرناو: من و ڕەقیب سەبارەت: ١٩٦٦/١/٣١ز - لەدەنگی کوردستانی عێراق خوێندرایەوە - کاروانی خەیاڵ، چاپی دوهەم: هەولێر، ساڵی ١٩٩٧ زاینی، لاپەڕەی ١٨٣-١٨٤ ئەوە کاتی پەلامارە ڕەقیب بابێتە مەیدانێ ئەوی ناپاک و ناحەز بو بە کوردوستانەکەم کوانێ هەتا نەی ئەنجنم، وردی نەکەم، ئەو شێتە نازانێ کوڕی کوردی بە تێن و تاقەتە وەک شێری نێو لانێ هەموی لە گیان و ماڵ ڕابردوە مەیلی نیشتمان نانێ ئەگەر سەد ئەفسەری نازدارو سەرهەنگی بەنێوبانگە لەجێ‌ی سەر نێزەگەر هاڕەی فڕۆکەو نەعرەتەی تانگە لەلام هیچە فیشەکدانی بەری پێم خشڵی لا جانگە کە دیتی تاقە کوردێکی بەغیرەت دیارە لە ڕوانگە چەق و چۆدەی گرێ‌و دەگری بەتاو وەک ڕێژنی بارانێ لە ژێر چەنگم ڕەهانابێ ئەگەر سەد گیانی هێنابێ ئەگەر کفنی دڕی بێ سەد کەڕەت، ئەوجار دەبێ ڕابێ لە جێ‌ی کفنی سپی گیانی لەنێو گێژاوی خوێن دابێ لەشی بێ ڕوح وەکو زریان ڕنوی بەفرانی هەل نابێ دەبێ هەڵچندرێ ئەو جار لە شیوو باسکی کوێستانی وەها نەخشی دڵی خەمدیوە مەیلی خاکی ڕەنگینم بەتۆفانی جەفا دانامرێ هاڵاوی ئاگرینم لەسەر سەفحەی دڵم جێ‌گیرە بۆتە دین و ئایینم وەتەن ئەی نیشتمانی خۆشم ئەی مەڵبەندی نەسرینم ئەتۆی ئارامی دڵ بۆیە بەبێ تۆ ناگرێ سامانێ دەسەنگەردام و ناترسم دڵم پر تین و هێزدارە دەبێ بڕوا بەبەر پێما ئەگەر سوێسن، ئەگەر خارە لەلام زۆر خۆشترە کوژرانی ناو سەنگەر لە سێ دارە بەنوکی نێزەکەم جەرگی ڕەقیب وەک قەل لەسەر دارە نەشێواوم کوڕێک نیم کەس بڵێ بۆگەل لە ڕوح نانێ ++++++++++++++++++++++ سەرناو: فەوزیە سەبارەت: ناوچەی باڵەک ١٩٦٧/٣/١٥ز، گوندی سایە - مانگی خاکەلێوی ١٣٤٦ی هەتاوی - کاروانی خەیاڵ، چاپی دوهەم: هەولێر، ساڵی ١٩٩٧ زاینی، لاپەڕەی ١٨٩-١٩٤ وەرە سەر دەر کە وەکو مانگ لە سوێ گوڵەکەم تاوێ لەگەڵ من بدوێ وا لەڕێتا سەری سەر گەردانم چاو بە گریانەوە لێت دەڕوانم گیان پەپولێکە لە دەورو بەری تۆ وا گڕی گرتوە لەسایەی سەری تۆ دڵ بە ئاواتەوە هەر دێتەوە لات سەری داناوە لە ڕێ‌ی هات و نەهات وەرە سەیری من و ڕەنگی زەردم دەردی دووریت و هەناسەی سەردم لێک دەکەن ڕۆژی من و پرچی ڕەشت ڕەنگی فرمێسکی من و کوڵمی گەشت زەردە زۆر کەوت و بەیان زۆر ئەنگوت بە هەناسەی شنە گوڵ زۆر پشکوت چاوی من هەرچی دەڕوی تۆ ڕاما لێوەکەت پێ نەکەنی‌و هەر واما جوتێ لیمۆ کە لەسەر سینگی تۆن ویست و دڵخوازی منی تامەزرۆن چ بڵێم چەندە سروشت ئارەقی ڕشت تاوەها جوتێ مەمی تۆی داڕشت تەمەنت گەیوەتە چاردە بە خەیاڵ تازە زەرد هەڵ دەگەڕێ لیمۆی کاڵ شەم لەناو پەردەوە کز دەنوێنێ مەم لە بن ئێخەوە دڵ دەڕفێنێ جوتێ گۆی زێڕە بەچەند مانگ و ساڵ خڕی هەڵداوە لەسەر زێوی قاڵ سینگ و مەم تۆ بڵێ نەک زێڕو زێو زێڕو زێو کەی بوە وا نیشە بزێو بەدەم ئەو گۆیەوە دەنکێ یاقوت بەسەری لالەوە ما ئاگری ڕووت بە کزەی باوەکە لیمۆ دەوەرێ مەمی تۆ هەر بە هەناسێک دەلەرێ ئەی 'مەهاباد' ئەتۆ جێ‌ی شانازی پێ‌ی گەیاند باوەشی گەرمت قازی کۆرپەکانی تۆ لە خان و سەردار بەسەری بەرزەوە چونە سەردار نیە ژین نرخی لە پێناوی تۆ سەر بچێ‌و بەرزەوە بێ ناوی تۆ بەرزە جێت تۆ سەری کوردستانی لانی کار مامزی، جێ‌ی شێرانی دیمەنت چەشنێ دەبزوێنێ ئەوین گاڵتە بۆ کیژو کوڕی تۆن مەم و زین کوڕو کاڵی تۆ هەمو شۆخ و شەنگ کیژی چاومەست و خڕو نێو قەد تەنگ گەڕەکێکت هەیە 'مزگەوتی سور' ڕوح لەسەر وێ دەگەڕێ دوراو دور دەرک و بەر پەنجەرە، ژورو هەیوان حەوش و کۆڵان و قولینچک و سەربان سەر شەقام و چەم و پردو ڕێ باز پڕ لە پشتین شلی نەشمیل و بەناز گوڵی لێ شین بوە هەرچی دەتەوێ غەڵفی هێناوە تەڕو شلک و نوێ ڕۆژ درەنگانێ دەمەو ئێوارە کیژو کاڵ دێنە سەر ئەو ڕوبارە گۆزە ئاو هەڵدەگرن، بازنە لە قۆڵ چەتری سەر کوڵمەیە برژانگ و مژۆڵ هەر گوڵینگی شەدە زۆر پڕ کارە دەلەرێ‌و دەستڕێ ژەنگی گوارە نایەڵێ خشڵی سەری هەڵگرێ ژەنگ زەردە دەرکەوت و تروسکەی دێ پەرەنگ دڵنیانین لە زمانی بە درۆ پێکەوە دێنە زمان چاوو برۆ مانگە شەو هات و لە دەرک و بانان کۆڕی دڵداری دەبەستن جوانان بسکەکانیان بە پشوی با دەشەتێ بۆنی خۆشی بە هاوادا دەڕەتێ دڵ دەلەرزێنێ شەوانی شەوە زەنگ دەنگی بەرموری کچی شۆخ و شەنگ نیە جێ‌یەک وەکو ئەو شارە لەلام هەرچی تێ‌ی دایە لەلام جوانە بەڵام گوڵی وەک تۆی نی‌یە پاک و ڕوسور لالەیو کەوتی‌یە 'ناوماڵی بلور' 'فەوزیە' تاقە گوڵی ناو شاری پەیکەری جوانی ئەتۆو گیانداری 'نوێژگە' گەرچی لە پەنای ماڵەکەتە حەج بەڵام دەورو بەری خاڵەکەتە دەی شەماڵ تۆش وەرە خەم خۆری کۆن زۆری وەک من بە تەمای هاتنی تۆن بگە فریای دڵی پڕ لە خوێنم دەگڕێم ڕێم نی‌یە بیشی دوێنم بچۆلای‌و بڵێ بەو دەم قەندە ئاگرت کردەوە لەو مەڵ بەندە هەر لە ڕۆژی هەوەڵی دەر بە دەریم عیشقی تۆش هۆیەکە بۆ کوێرەوەریم بەهەوای تۆوەیە دێ خورپە لە دڵ دڵ هەر ئی تۆیە هەتا دەیخەنە گڵ ئەو دەمەم خۆشە کە تۆش لەولاوە کەزیەکانت بدەیە دەم باوە با پەرێشانی بکا وەک دڵەکەم هەڵمژم لێرەوە بۆنی گوڵەکەم ئەی مەهاباد بەخوام ئەسپاردی لێرە دڵ سارد بو منیش بۆم ناردی هاتەوە باوەشی گەرم و گوڕی تۆ هەڵوەدای ئاوو گڵی تۆن کوڕی تۆ هەرچی هەی تۆ گوڵی یان گوڵدانی ئاوەدان بی، وەتەنی کوردانی ++++++++++++++++++++++ سەرناو: گاڵتەی جێژن (غەزەلی عیشقی!!) سەبارەت: عێراق، گوندی سورەبان، جێژنی قوربانی ١٩٦٧ز - ١٣٤٦ی هەتاوی - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ١٩٥-١٩٧ جۆگەلەی خوێنە لەناو دیدەیی گریانمدا زۆر لە مێژە نی‌یە هیچ 'عانە' لە گیرفانمدا هەر دەڵێ‌ی جەرگی منە لەت لەت و سورو کون کون ئەو 'تەماتە'ی هەڵی خست 'مێرێ' لەسەربانمدا جگەرەی 'ڕۆزمەن' ئەڵێن زۆرە بەڵام من نەمدی غەیری ئەو ڕۆژە لەناو باخەڵی میوانمدا تۆ کە 'جوجە'ی وەرە ناو کاولی مەعدەم چ دەکەی لە سەرانگوێلک و تەویلەو، لەبن هەیوانمدا سەرم ئەسلەع بوە هەر چەشنی 'کدو'و ئێستە نی‌یە دانەیەک ئەسپێ لەناو زولفی پەریشانمدا دوێنێ شەو هیچ نەبو بیخۆم و لەداخان نوستم لە خەوا دیم 'تەڕە پیواز'ە لەنێو نانمدا من کە دەمگوت نی‌یە 'شۆخێک' کە دڵم بڕفێنێ 'گۆشت بزن'هات و بە جارێک سەرو سامانمدا 'دۆستەکەم' هات و گوتی ئێستە ووڵات چۆلە وەرە کە دەچم 'ماکەری موختارە'١ 'لە جێ‌ژوانم' دا من لەلام وابو کە هەر 'گیپە'یە ڕێ‌ی چارە کەچی 'ساوەریش' چەشنی مەسیحایە لە دەرمانمدا هێندە بێ گۆشتم و تامەزرۆ هەزار جارم کرد فکری ئەو تۆزە چەقاڵتەی کە لە نێوڕانم دا چابو زوم زانی زگی هەڵنەدڕیم 'کاک... ' 'دەنکە مێوژ'ێکی ڕەشی دیبو لە 'جزدان'م دا ٢ 'ڕانک و چۆغە' شڕەکەی من کە بەسوری هاوین لەرزو تام لێ‌یە، ئەبێ چۆن بێ لە زستانم دا؟ هەمو کەس دەردی هەیە کاکە بەڵام دەردی من هەر گرانتر دەبێ وەک گوێلکێ لە پزدانم دا دەنگی 'ڕیخۆڵەمە' شمشاڵ لە زگمدا چدەکا؟ ئەوە 'ساز'ێکە لەناو بەزمی فەقیرانمدا شیعرەکانم مەبە کاکە نەکو ڕۆژێک لەنەکاو تۆش بدەی کەوڵی 'خەزو'و 'تورمە' بەسەرشانم دا 'جێژنە'یەو بۆنی کەباب دێ لەهەمو لایە منیش هەر 'کوڵۆی خوێ'یە کە قرچەی دێ لەقەلیانم دا مام عەلی٣ خۆش بی ئەتۆو دەردو بەڵات هەرچی هەیە بالە 'نانی ڕەق' و 'چای شیرنی' بەیانانم دا ١. موختار: کوێخا سجل. ٢. جزدان: کیفی باخەڵ ٣. عەلی عەجەم: نان و چێشتی لێ دەنا لەمەقەری سورەبان ئاشپەزبو. ++++++++++++++++++++++ سەرناو: مەلا سەبارەت: ١ی مارس ١٩٦١ز - شێخاڵی، خاکەلێوەی ١٣٤٠ی هەتاوی - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ١٩٨ بەهارەو سورەگوڵ دایان گەمارۆ هەڵاڵەو نەستەڕەن شین بون لە ئاسۆ وەکو دەشتی خوتەن خەمڵیوە سەحرا لەبەر نازی شەقایق عەتری شەوبۆ سەفای ئەو کاتە گەرچی ئاشکرایە بەڵام تامی نی‌یە بۆمن بەبێ تۆ شەوی دیکە مەلایەک هاتە ئێرە کە قوربان حەزدەکەم من بێمە لای تۆ لە جێگای خۆم بەراتم سەد تەغارە فەقێشم هەربوە تا هەشت و تانۆ هەمو ساڵێش لە گوندی داویانمێ مەڕو مانگاو بزن بۆ ماست و بۆ دۆ بە ئاغای گوت مەبەستی خۆی کەم و زۆر ئەویش گوێ‌ی دایە ئارام و لەسەر خۆ لە پاشان پێ‌ی گوت ئاغا وا دیارە کە ڕۆیین بۆ مەلایان بۆتە ئاهۆ کە نیتە ناتەواوی‌و نا گوزیری ئەدی بۆچی دەڕۆی ئاخر مەلا بۆ تەواوی ژینی تۆ هەر هاتو چۆیە لە هەردوک لاوە بۆیە ڕایەڵ و پۆ نەما جێ‌یەک کەتۆ سەدجار نەچوبی گەورک و مەنگوڕو پیران و ئاکۆ هەقی نوێژێ لە ڕوتی وا ئەسێنی کە ئاگری پێوە نێ‌ی لێ‌ی نایە بۆ سۆ بەراتی چاک و قەدرو حورمەتی زۆر بڕۆ شوکرێ بکە دانیشە بیخۆ مەلا ڕۆیشت و بریا هەر نەبایەن مەلای واو شاعیری وەک من چەقەسرۆ ++++++++++++++++++++++ سەرناو: ڕزگاری سەبارەت: ١٩٦٨/٩/٩ز - زینوێ، عێراق - لە ئاهەنگی ١١ی ئەیلولی ١٩٦٨ لە گەڵاڵە خوێندرایەوە - مانگی خرمانانی ساڵی ١٣٤٧ی هەتاوی - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ١٩٩-٢٠٢ وەرە با ئاگری دڵ دابمرێ تاکەی ئاخر غەمی تۆ دام بگرێ؟ دڵ وەکو چاوی خەواڵوت داماو ژین وەکو کەزیەکەت ئاڵۆزو بڵاو خۆشەویستیت لە دڵی دێوانە وەک خەزینێکە لەناو وێرانە دەس بدا دەست لە ژیان هەڵدەگرم بۆ بزێکت کە بەشادی بمرم خوێنی دەڕژێ کەسێ لێوت بمژێ سەیرە من تۆم نەدی خوێنم دەڕژێ تا فیدای تۆ نەبێ ژین یەکجاری تۆ وەدەس چۆن ئەکەوی ڕزگاری؟ بە کەمی مەگرە ژیانی بە ئەوین دە ئەوین دایە هەمو تامی ژین دیمەنت، هەردت، هەوارگەت، ئاوت ئەو چیای سەر لەتەما شێواوت پۆلە ئاسک مەلی ئاوارە لە چۆڵ لاوی داخ بردە لەدەس دوژمنی زۆڵ کەویە بەفرت لەنواڵەی کوێستان دارو بەردت، هەموجێت، کوردوستان بانگ ئەکەن ئێمە ئەبێ سەربەست بین لەش ئەنێژین، ئەمرین، دەربەست نین نابەزین، ئێمە ژیان وەرئەگرین ناسرەوین، ئێمە ئەبێ سەر بکەوین خائنت با لەتۆ ڕو وەرگێڕێ خۆی بەدەس دوژمنی تۆ بسپێرێ سەری شۆڕکا دژی تۆ تێ‌کۆشێ بۆبژیو خوێنی شەهید بفرۆشێ سەری پێ‌دەشت و دەمی کێو پارە سەر لەبەردان کوتێ ئەو پەتیارە بەرژەوەندی نەبێ، ویژدانی نەوێ نەسرەوێ ڕۆژو شەوێ دانەکەوێ چارەنوسی تۆ بخاتە ژێر پێ چارەنوسێک کە بەبێ ویش هەردێ تۆ بسوتێنی، بەمن پێ بکەنێ قوڵکە بۆ ناشتنی خۆی هەڵبکەنێ تۆ بەڵام هەر هەتە دواڕۆژی خۆش زۆر کوڕی دیت هەیە بۆتۆ بە پەرۆش کوڕی ئازا کە دەبەر تۆ دەمرێ ڕێ‌ی هەمو فێڵێ لە بیژو دەگرێ لەمپەڕی تۆیە لە ڕۆژی تاڵی هاودەمی تۆیە دەمی خۆش حاڵی تێک دەدا کەندو کوڵۆو کۆسپی ڕێت جاشی ڕوڕەش دەکەوێتە بەر پێت گەلی تۆ کاتێ ئەتۆی دی داماو چاوی سەرچاوە بو، بۆ تۆ پڕ ئاو خێری بۆ لاوە بو شەڕ بۆتۆ بو زێڕی بۆ دوژمن و زەڕڕ بۆتۆ بو ڕاپەڕی دەستی درێژ کرد بۆ چەک کیژ لەخۆی داڕنی گوارەو کرمەک هاتە ناو سەنگەری خۆ پاراستن کەوتە بەر ڕێژنی ئاگرو ئاسن بەرزی کرد پەرچەمی شۆڕش زانی تۆ بەخوێن دەست بکەوی هەرزانی وەکو تیرێ لە کەوانت دەرچو دەدڵی دوژمنەکانت ڕاچو سەر نەوی بو لەبەرت سەر بزوێن تەرمی ناپاکی وی ڕاماڵی خوێن ڕۆژێ دێ تەم لە سەرانت بڕەوێ تیشکی ئازادی لە داوێن بکەوێ کوڕەکان بێن و لەدەستا گوڵی ئاڵ کیژەکان تێکەڵی کەن بسک و خاڵ لەبن ئاڵای تۆ هەمو دەس بگرین پاکی سارێژ بنەوە کۆنە برین دەنگ بەرز کاتەوە ڕۆڵەی دڵسۆز: نیشتمان، جێژنی کوڕانت پیرۆز ++++++++++++++++++++++ سەرناو: کاڵە سەبارەت: ١٩٧٠/٢/٢ز، ناوپردان، عێراق - ١٣٤٩ی هەتاوی - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ٢٠٣-٢٠٥ جوتێ کاڵەم هەبو ساڵێ لەچەرم تیسکن و تای یەک و ئەستورو گەرم سفت و بێ گنج و گرێ‌و لێک و لەبار شلک و بێ مەنفەزو بێ هەنگ١ و نەرم لوت قوت و پانیە بڵیندو ڕەنگ خۆش کەوڵی شێرێ بو لە ڕۆژی خەتەرم لێو بە گژ نیژو سەری پەنجەدار کوڕی گووەندو شەریکی چەپەرم٢ سوک و بێ هەست و لە هاتو چۆدا خۆم بەوە هەستم ئەکرد بەختەوەرم لە چیاو ڕژدو هەڵەت چنگوڕکی گیر ئەکرد بێ ئەوە بێڵێ بلەرم بەن لەموی بزنی سپی‌و ڕەش تێکەڵ وەکو ئاوریشم ئەهاتە نەزەرم بەو بەنە گرژو درێژە دەم بەست هەر لە گوێزینگەوە! تاکو کەمەرم! کە لەپام توندم ئەکرد بۆ ڕێگە دڕک و داڵ حەددی چبو بێتە بەرم خەڵکی ئەو ناوە لەبەر قۆچاغی هەرچی ئەی دیم وەی ئەزانی تەتەرم دەرەوەی توکی وەکو مەخمەر بو ناوەکەی لوس بو وەکو پێشە سەرم تا ئەوانم هەبو بێزم نەدەهات ناوی هیچ چەکمەو پوتینێ بەرم وەختی ڕێگا وەکو پێڵاوێ لەپام کاتی خەو دەبوە سەرینێ لەسەرم ڕوی نەبو چەکمە لەپا بێ بۆلام گەربهاتایە بە تەقیەو بە شەرم وەکو ئەو کاڵەیە نەم دی ئیتر ئەو حەوت ساڵە کە من دەر بەدەرم شۆرشی کرد لەگەڵم خۆشم ئەویست نەک بڵێ‌ی من بە سروشت وا لەچەرم تا شە بەردێکی دڕو بەد فەڕو تیژ ئەوی کون کردو لەتی کرد جگەرم ئەو کە بەو جۆرە لەدەستم بۆوە ڕۆژ بە ڕۆژ زۆر ئەبێ دەردو کەسەرم هەر لەبەر حورمەتی ئەو من پاش ئەو لە هەمو کاڵە ئیتر بێ خەبەرم شینی ئەو کاڵە تەواو ناکەم قەت سەد وەک ئەو نامە بمێنێ ئەسەرم هێشتە هەر بیری ئەکەم یادی بەخێر لێم جیابۆوە ڕەفیقی سەفەرم ١. هەنگ: هێندێک جار لەسەر پشتی ڕەشەوڵاخ کونێک لە چەرمەکەدا ئەبێ‌و کرمی لێ دێتەدەر بەو کونە ئەڵێن هەنگ. ٢. چەپەر: سەنگەر. ++++++++++++++++++++++ سەرناو: گەزوڕبە سەبارەت: عیراق، گوندی دێلزە، ١٩٧٢/٤/٤ز - مانگی ڕەزبەری ١٣٥١ی هەتاوی - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ٢٠٨-٢١٢ ئەڵێم ئەوجار ناوت بێنم ئەوجار ئەڵێم بتناسێنم ١ پەردە لە چڕو چاوت لادەم بەڵکو ئاوا بەنت بادەم کەوڵت ئاواژو کەمەوە سەری بەڕەی هەڵدەمەوە لە ڕابردوت لە ئاکارت لە سوێندی پارو پێرارت لە پەژارەو تێ‌گیراویت لە دامان و سەر سوڕماویت لە فێڵت لە لایی لاییت لە شوێنە ونکەو دولاییت لەو زەبرە کە پێ‌ی ئەتاسای مەرگی لە تەنیشت دا ئەنای دیسان ئەو بەنازەوە بە خۆت و دۆستی٢!! تازەوە بەرانبەرم خۆت ئەدوێنی منی 'هێدی'ش ئەبزوێنی خۆمن نە خەوتوم نە کاسم من تۆش و ئەویش ئەناسم ئەو دڵ ڕەشە دەس چڵکنە چیرۆکی وی لەلای منە ٣ ساڵانیش کەوا خۆت ئەنواند وەڕەزی خۆمان پێک دەشکاند بە نیوەڕۆو نیوە شەوێ کوێ حەستەم بو دەچوینە وێ سەر هەندرێن، زۆزک، سەفین سەر گۆیژەو پیرس و مەتین وابو تۆ بڕت نەدەکرد لەگەڵ من دەرت نەدەبرد لەبەر ئەوە بە ئەسپایی دەکشایەوە بۆ دەشتایی گۆڵمەزمان دەبردە دەشتێ لەوێش دەستم دەت گەیشتێ دەشێوای‌و پەستا پەستا هاوارت لەدو هەڵدەستا کوێرە ڕێ‌یەکت دەدی‌یەوە بەوێ‌دا خۆت دەدزی‌یەوە هەر لە چەنگم ڕزگار ئەبوی دەربەست سەرماو گەرما نەبوی دڕکی ڕێ بە پێتدا دەچو بەڵام تۆ لەلات هیچ نەبو ئەگەر لەناو ئاگری سور بای پێت خۆش بو، هەر لەمن دوربای ڕێگەت ئەبڕی بە شپڕێوی شەو ڕەویت ئەکرد وەک ڕێوی خۆت داویشتەوە ناو تەلار ناو کۆشکی هەزار بە هەزار دەستت ئەکرد بە قسەی زل زل تاوانت نە دەگرتە مل دەست و پێوەندو موچە خۆر لە ڕەنگ و شکڵی جۆر بە جۆر دەستیان ئەکرد بە هاتو چۆ دڵسۆزی‌یان دەرئەبڕی بۆ تۆ دەستیان بۆ لە ئەستۆ دەدای دیسان پاڵیان پێوە دەنای: -خەمێکی زلە ئەو خەمە خوێنیان بخۆی هێشتا کەمە قوربان ئەو لە کوێ تۆ لە کوێ ئەو چۆن لەگەڵ تۆی پێ دەکرێ سێ چوار کەسن بونە چەتە!! بچۆ بیان گرە فرسەتە سەر لەنوێ شانۆت پێک دێنا هەر چەکی هەت بو دەت هێنا هەر چەند خۆت تاقی کردەوە هەر دۆڕای‌و نەت بردەوە زۆرت یەخەی خۆت دادڕی چەک بیرو باوەڕی نەبڕی لە پاش ئەو هەمو چەوتی‌یە من هیچم لە دڵدا نی‌یە من کوڕێکی مەردو ڕەندم من بە بەڵێنم پابەندم خۆم دەخوارەبا ناگرم بۆ لێ قەومانیش ئاگرم من ئەڵێم باشی٤ بپێوە بەشداری تر بەشی پێوە بەشی خۆت هەڵگرە بۆخۆت هەتا تۆ ماوی بەسە بۆت بەشی منیش با ئی من بێ حەزناکەم بە خوێن ڕشتن بێ چ زستان بێ چ بەهار بێ ئیشی هەردوک لامان دیاربێ لە دروێنەو وەردو شێوێ ئیتر سەرمان لێ ناشێوێ یەکمان بۆ نیسک و نۆک چاندن یەک بۆ وشتر لەوەڕاندن ئێمە کە ئاوماڵ بین نابێ شتی وامان لە ناودا بێ من مارمێلکەم پێ خۆش نی‌یە!! بابۆتۆبێ قەیدی چی‌یە؟ لەسەر ئەو دەشتە نەرمەڕا لەسەر ئەو هەمو ڕەڵمەڕا حەیفە تۆ بەو قاچە جوانە بێ‌یە ناو ئەو بەردە ڵانە من لێرە ئەی کەم بە هۆهۆ تۆش لەو خوارە وەرەو بچۆ تۆ دانەوێڵەش نە چێنی خۆ باشە مەشکێک ئاو دێنی دروێنەو پاراوی توتن بڕینەوەی خوری‌و بەرگن گێرەو شەن و بێڵ وەشاندن بەڵمی چەڵتوک هەڵتەکاندن هەموی خەمی من بەمەرجێ تۆش فەرمانی خۆت بێنیە جێ ئازابی لە ڕاوی کولۆ نەهێڵی بێنە ناو پەمۆ ئێمە پێکەوە تەبابین چاو لەدەستی هیچ کەس نابین ٥ لەو هەلە کەڵک وەرگرە یەکیەتی شتێکی ترە وا ئیتر قەت وێک ناکەوین بۆ شایی‌و شین برا دەبین لە کەری شەیتان وەرە خوار با دەس لەناو دەس نێین ئەوجار 'لێ‌لێ'ی٦ من و 'یالەیل'ی٧ تۆ بابگرن جێگای 'برا ڕۆ' تۆش لەسەر پێ‌ودانی زوت هەرمشت و ماڵ دەکەی گەروت خۆت لە خواردنم هەڵ دەکەی دیارە چاوەڕێ‌ی هەل دەکەی هەر گوتم ئەوڕۆ نا سبەی تۆش پەی بە کارەسات دەبەی بەڵام ئەو ڕۆژە هەر نەهات ئاوەز٨ ئەڵێ‌ی زیزە لەلات ئەوی گەل ویستی تۆ نەت ویست چەندی من گوتم تۆ نەت بیست شیری چەورت هێند خواردەوە خۆت زگە ڕۆ فێر کردوە ئێستاش چی ئەکەم تێر نابی بەڵام تاکەی ئەبێ وابی؟ خۆ کاکە گەروت ئاش نی‌یە پاروی زل ئاخر باش نی‌یە بێتو دەقوڕگت بمێنێ لەوانەیە بت خنکێنێ من دڵسۆزی بو کردم بۆت لەوانەیە بت خنکێنێ من دڵسۆزی بو کردم بۆت وەباڵی خۆت بە ئەستۆی خۆت لەسەر ئەو بیرو ڕا کۆنە کەمن باش ئەزانم چۆنە ئەزانم ڕۆژێک لە ڕۆژان برینت لێ دێتەوە ژان٩ ژانێک کە بێتو بتگرێ بەهیچ کەس چارەت ناکرێ جابۆیە گەر بەمن ئەکەی واباشە خۆت فریو نەدەی بە خۆت و قەمەی ژەنگاویی خۆت مەخە سەختی‌و تەنگاوی ئیتر پێ لە ئاگر مەنێ بەو 'گەزوربە'ت نادەنێ ١. لە ئاخرو ئۆخری ئینتقال‌دا کە حکومەتی عێراق دوای بەیانی ١١ی ئازاری ١٩٧٠ دای نابو بۆ ئەوە کە حوکمی زاتی بۆ کوردستان تەنفیز بکا دەستی کرد بە مشاغبەو لە هێندێک شوێن ئاڵۆزی و ئیستفزازی ئەکردو لەگەڵ ڕوسیاش پەیمانی عەسکەری بەستبو دیار بو ئەیویست بەڵێنەکانی خۆی لەگەڵ شۆڕش بخاتە پشت گوێ شیعری 'گەزوبە' بەوبۆنەوەیەو لە ڕادیۆی کوردستانی عیراق خوێندرایەوە: ١٩٧٤ ٢. حکومەتی عێراق بۆ ماوەی پازدە ساڵ پەیمانی نیزامی لەگەڵ ڕوسیا بەستوە. ٣. یەکیەتی سۆویات ساڵی ٢٠ هەتا ١٣٢٤ی هەتاوی لە ئێران پشتێ کۆماری مەهابادی گرت و دوایی بەڵێنی نەفتیان پێداو پشتی بەردان و لە نەتیجەدا زۆر لە نیشتمان پەروەران لە سێدارە دران. ٤. عیراق لە دو نەتەوەی کوردو عەرەب پێک هاتوە، کە کوردیش لەو ووڵاتەدا شوێنی دانیشتن و مافی ژیانی هەیە، کەس بۆی نی‌یە گوێ‌ی لێ باخنێ. ٥. عیراق کە ووڵاتێکی دەوڵەمەندە بەهۆی دەرخستنی نەفتەکەیەوەو نفوسیشی کەمە لەبەر شەڕی کوردوستان وای لێ هاتبو پارەی لە کوێت و وڵاتە عەرەبی‌یەکانی خەلیج قەرز دەکرد کە مەسرەفی ئەو شەرە دابین بکا کە خۆیان بەسەر کوردیان دا سەپاندبو. ٦. لێ‌لێ: گۆرانی فۆلکلۆری کوردە. ٧. یالەیل: گۆرانی فۆلکلۆری عەرەبە. ٨. ئاوەز: ئەقڵ، تێ‌گەیشتن. ٩. حکومەت خۆی ئاڵۆزی‌و ئاژاوەی ئەناوە ئەی ویست شەڕ دەست پێ‌بکاتەوە، ئەویش بە پشتیوانی یەکیەتی‌ی سۆویات کە پەیمانی عەسکەری‌ی لەگەڵ بەستبوو چەکی ئەدایە. ++++++++++++++++++++++ سەرناو: نەخۆشی ژنان سەبارەت: کەرەج، ١٣٥٨ی هەتاوی - ١٩٧٩ز - کاروانی خەیاڵ، چاپی دووهەم: هەولێر، ساڵی ١٩٩٧ زاینی، لاپەڕەی ٢١٣ کابرایەک بۆ دەس نوێژ دەچو ئیشی زۆر بە پەلەی هەبو پیرێژنێکی دی لە ڕێ‌دا ئەویش ڕادەبرد بەوێ‌دا هەر چەند کە زۆریش تەنگاو بو چونکە پیرێژن ناسیاو بو ناچار هەروا کە ڕادەبرد سەبرێک سەڵاوێکی لێ کرد ڕاش نەوەستا لەسەر وەڵام پیرێژن یەخەی گرت بەڵام هاتە پێش گوتی ببورە براکەم نەقڵی من دورە: دوکتور بە منی ئەسپاردوە من تەرکی قسەم کردوە پێی گوتوم کە کەس بدوێنم بەرز ئەبێ پلەی خوێنم کز دەبێ ڕوناکی چاوم تێک دەچن دڵ و هەناوم دوای ئەوە سوار دەبێ پشوم دەکەونە ژان سینگ و گەروم ژان لەسەرم بڕواتە دەر کۆخەڕەشەم دەگاتە سەر جا مەبەستم دڵی تۆیە من ئەو دەردەم لێ‌یە بۆیە ئەگەر کەسێک ڕووم تێ‌دەکا وەک تۆ سڵاوم لێ دەکا ناوێرم خولاسەی کەلام بڵێم 'وە علیک السلام' ++++++++++++++++++++++ سەرناو: ورینگە سەبارەت: نووسین: کەماڵ ڕەحمانی ھەر لە ڕێت کەوتم و نەمزانی لەبەرچی وایە ڕۆژ نییە ڕووی تۆ، کەچی چاوی لەبەر ھەڵنایە لەشی نەرمت لە وشەی ناسک ئەگەر داڕێژم سەد ھەزار ھێندی وشەی تر ھەوەسی تێدایە نواندنی مەڕمەڕی سینەت لە کراسی تەنکا وەک لەرەی مانگی شەوی چاردە لەناو دەریایە سەر دەشێوێ لە خەیاڵ و لە من و، ھەڵبەستم بۆنی کەزیەی تۆ ئەگەر دێ بە کزەی شەوبایە خەمی من بۆیە لە ژێر سێبەری تۆدا دەڕەوێ پرچی تۆ پەرچەمە، باڵای تۆ وەکوو ئاڵایە مەم لە ئێخەت سەری ھەڵداوە ئەویش سەرتاپای چەق و چۆیە، تەزووە، لەرزە، مچوڕکە، تایە کە ھەنێت بسکی لەسەر لادەچێ، لالەی ڕووتە گەردنیشت ئەگە خاڵ لێبگەڕێ مینایە چاوی تۆ زۆر لە ئەوین ئەدوێ لەگەڵ من چ بکەم مەست ئەدرکێنێ قسە و، دوایە دەکا حاشایە دەمی عیسا وەکوو ئەفسانە لەلام وا بوو بەڵام کە بزەی تۆم دی منیش ھاتمە سەر ئەو بڕوایە حەز دەکەم قەت لەسەرت کەم نەبێ موویەک، چونکە ھەیە پەیوەندی لەگەڵ ژینی من ئەو ھەودایە تا کراس دەخزێ لە سینگت مەمی تۆ دەکوشێ، بەڵام دزی خۆماڵییە، ناگیرێ بە ھیچ دەزگایە نییە وەک شیعری من ئەوڕۆ تەڕ و تێراو، ئیتر قەدی شلکی تۆ کە ھەڵبەستی خوایە، جیایە شەرم و، ئاوات و، نیاز و، ھەوەسی لێ دەڕژێ پەیکەری تۆ لە سەر و سینگ و کەمەر تا پایە ھێندە شیرن ئەدوێم بۆ تۆ، لەناو بێشکە مەگەر دایە بەو شێوەیە بۆی کردبی لای لایە ھێدی یادی دەمی تۆی پێ نەکرا، چارە چییە؟ خاڵەکە ھێندە بچووکە، بە خەیاڵا نایە ++++++++++++++++++++++