شاعیر: کەماڵ ڕەحمانی کتێب: چرای خەیاڵ سەرناو: قوو سەبارەت: ١٣٩٣/٠٨/١٣ هەتاوی، میراوێی مەلا خەلیل بوون و مردنی قوو زۆر جوانه وردبینی زانا! جێی تێڕامانه هه‌ر له‌ ناو ئاوا له دایک ده‌بێ نابزوێ له‌وێ که دێ بشمرێ گه‌لێ به‌که‌می ده‌چته وشکایی ده‌ڕوا له‌ ناو ئاو زۆر به ‌ئه‌سپایی قه‌ت دڵی نایه به تووندی بڕوا خه‌و و بێده‌نگی ئازیزی تێکدا ئه‌ی وه‌ته‌ن بۆ تۆ من وه‌کو قوومه له‌ خۆشه‌ویستیت گه‌لێ ڕۆچوومه ده‌ لانکی تۆدا نه‌بێ ناخه‌وم بێ تۆ هه‌ستانم نابێ ده‌که‌وم هه‌ر به‌ ده‌نگی تۆ سوکناییم هه‌یه تا تۆم ته‌خت بی من شاییم هه‌یه شه‌رته هه‌تا هه‌م به‌جێت نه‌هێڵم بۆ حاڵی تۆیە فرمێسکی لێڵم زیندوومه ئه‌گه‌ر باوه‌شته‌ قه‌برم ده‌مێ له دووریت خۆناگرم ده‌مرم ++++++++++++++++++++++ سەرناو: تەنیایی سەبارەت: ١٣٧٩/٠٣/١٤ هەتاوی، زەنگیاوێ چاک دەزانم کە تەنیایی چ ڕەنگێکی تاڵی هەیە مەڵی دڵم لە ناو ڕکەی چ ژینێک و حاڵی هەیە بەڵام تەنیا، ئەی تەنیا خۆشەویستەکەم هەر چەندە تا تۆم دڵبەر بی هەر بە تەنیا دەمێنمەوە شەرت بێ وەکوو مەجنوونی لەیل لە سەر کێکی سووتاوی دڵ غەیری شەمی ئەوینی تۆ نەتوێنمەوە، نەتوێنمەوە ++++++++++++++++++++++ سەرناو: دڵت نەهێشتووم پێت کەمە هێشتا سەبارەت: ٩٥/٥/٢٩ پیرانشار دڵت نەهێشتووم پێت کەمە هێشتا نانوێنی ڕۆژت هەر تەمە هێشتا خەم دێ لە دووی خەم، تا دێن سەختر هێزێکم نییە بۆو خەمە هێشتا چاوم نابینێ غەیری جوانی یار کەچی دینی بۆم ئەستەمە هێشتا سەردمێ وەکوو پەپوولە شاد بووم ڕووم گڕی زەردی هەر شەمە هێشتا وەک کانی پڕئاو فرمێسکم لە چاو دێتەدەر، دەڵێ: کوا چەمە هێشتا؟ ! وەک لاس بۆ غەزاڵ سووتاوە 'کەماڵ' خۆی پێ زین نییە بۆو مەمە هێشا ++++++++++++++++++++++ سەرناو: گورگی ناخ سەبارەت: ٩٣/٠٢/٢٢ میراوێی مەلاخەلیل. زانايه‌ک وتی: گورگێکی زۆر هار له‌ ناو دڵاندا خۆی داوه حاشار شه‌ڕێکی گه‌وره‌ له‌ به‌ینی مه‌ و ئه‌و نابڕێته‌وه‌ به‌ ڕۆژ و به‌ شه‌و به‌ هێزی ده‌ستان ناکرێ چاری هه‌ر خاوه‌ن عه‌قڵ ده‌کا باشاری ڕه‌نگه‌ که‌سێکی بێ‌هێزی فه‌قیر ده‌ستی له‌ قوڕگی گورگی بکا گیر به‌ڵام زۆر که‌سی خاوه‌ن هێزی زۆر وه‌ک ماسییێ بێ خرابێته‌ تۆڕ هه‌ر که‌سێ گورگی به‌ عه‌رزی دادا به‌ دوور نیه‌ ببێ به‌ دۆستی خودا به‌ڵام هه‌ر که‌سێ هه‌لکا له‌ گه‌ڵی نه‌جاتی نابێ که‌س له‌ گێچه‌ڵی ئه‌وه‌ی له‌ گورگی دایمه‌ ده‌به‌زێ هه‌ر وه‌کو گورگ خه‌لکی ده‌گه‌زێ به‌ جحێڵی مرخی گورگی خۆت ببڕه‌ له‌ گه‌ڵت پیر بێ حاڵت زۆر شڕه‌ له‌ کاتی پیری گه‌ر وه‌کو شێر بی زۆر سه‌خته‌ له‌ ڕاست گورگه‌که‌ت نێر بی خه‌لکی که‌وا گشت دمیان تێک ناوه ‌گورگیان به‌ گه‌وره‌ وه‌ پێش خۆ داوه‌ بۆیه‌ ئه‌و خه‌لکه‌ تاڵی ده‌چێژن هه‌موو بۆ گورگان وه‌ک مه‌ڕی گێژن بۆیه‌ ئه‌و خه‌لکه‌ مه‌ڕی بێ‌شوانه‌ گورگ له‌ دنیا فه‌رمانڕه‌وانه‌ ئه‌و زاڵمانه‌ بۆیه‌ وا یه‌کن گورگی ده‌روونیان نزیک له‌ یه‌کن خه‌ڵک دژی یه‌ک، گورگه‌کان ته‌بان خوایه‌ هه‌ر بۆ خۆت ڕه‌حم که‌ پێمان گرگ درون گفت دانایی که گرگی خیره‌سر هست پنهان در نهاد هر بشر لاجرم جاریست پیکاری سترگ روز و شب مابین اين انسان و گرگ زورْ بازو چارۀ اين گرگ نيست صـاحب انـديشه دانـد چاره چيسـت ای بسا انسان رنجورِ پريش سخـت پيچيده گلـوی گـرگ خـويش وی بسا زورآفرينْ مردِ دلير هست در چنگال گرگ خود اسير هر كه گرگش را دراندازد به خاک رفته رفته می‌شود انسان پاک وان كه از گرگش خورد هر دم شكست گرچه انسان می‌نمايد، گرگ هست وان كه با گرگش مدارا می‌كند خلق و خوی گرگ پيدا می‌كند در جوانی جان گرگت را بگير وای اگر اين گرگ گردد با تو پير روز پيری گر كه باشی همچو شير ناتوانی در مصاف گرگ پير مردمان گر يكديگر را می‌درند گرگ‌هاشان ره‌نما و رهبرند اين كه انسان هست اين‌سان دردمند گرگ‌ها فرمانروايی می‌كنند وان ستمكاران كه با هم محرمند گرگ‌هاشان آشنايان همند گرگ‌ها همراه و انسان‌ها غريب با كه بايد گفت اين حال عجيب «فريدون مشيری» ++++++++++++++++++++++ سەرناو: بۆچی له‌یلا دڵی شه‌یدای شکا زوو سەبارەت: ١٣٨٥/٠٩/٠٥ پیرانشار بۆچی له‌یلا دڵی شه‌یدای شکا زوو کرا مه‌جنوون له‌ ده‌شتی غه‌م ڕه‌ها زوو ژیان چیته‌ له‌ گه‌ڵ هێندێ نه‌سازای ده‌ڕێژی تۆ حه‌یای خاوه‌ن حه‌یا زوو ئه‌وی ماره ‌و بۆ گه‌ل ژاره‌ و زمان تیژ خۆ پێم خۆشه له‌به‌ینی به‌ی هه‌تا زوو به‌ڵام تۆ هه‌ر له‌ گه‌ڵ مێرخاسه‌ کێشه‌ت له‌ گه‌ڵ جه‌ردان ده‌بی یێک و ته‌با زوو که‌ داری ئاره‌زووم زوو زوو وشک بن ئیتر نابه‌م بۆ که‌س دادی ڕه‌وا زوو‌ مه‌گه‌ر بۆو جێ نیازه‌ بێ نیازه‌ی ده‌کا گیرا نزای هه‌ر بێ نه‌وا زوو ++++++++++++++++++++++ سەرناو: چاوت ئەستێرە، وەکو مانگە ڕووت سەبارەت: پیرانشار چاوت ئەستێرە، وەکو مانگە ڕووت بێ‌تۆی ڕۆژ چییە ئاسمانی ژیان؟ ! کەلاوەیەکە پەپوی لێ ناژی غارێ چەکچەکی نەیکردوە بە لان بێ‌وەفایی تۆ ئازیز لە گەڵ من خۆت ببه قازی دەرچووە لە حەد مەگەر تاوان و سووچی من چ بوو غەیری وەی دڵم دا تۆ تا ئەبەد ++++++++++++++++++++++ سەرناو: ماڵم بێ تۆ وێرانە سەبارەت: پیرانشار ٩٦/١٢/٧ هەتاوی ماڵم بێ‌تۆ وێرانە بۆ وێرانەت کرد بە ماڵ بۆ کوندەبوو، زەمانە لێی شکاندم پەڕ و باڵ هەلناگیرێ بە تەنیا هێندە قورسە ژینی من بۆ لابارت بەجێهێشت هەر تۆ بوی هاوژینی من مناڵی بە بێ‌دایک وەک ئاگرە دیتنی نەک دڵنەرم، دڵڕەقیش دەتوێتەوە بە تینی گەلێکت هیوا هەبوو بۆ لووتکەیان نەخەوتی تۆ ئەو شاخەوانە بووی لە نیوەی ڕێگا کەوتی گەرچی دەمێ بەخۆشیم نەبردۆتەسەر "کەماڵ" قەت بەقەد ئەم چەن ڕۆژەم نەدیوە ساتی وا تاڵ ++++++++++++++++++++++ سەرناو: نرخی هونەرمەند بەرزە لەلای کورد سەبارەت: پیرانشار (٩٥/٠١/٢٥ کـ. هـ) کارێ دڵ‌ڕەقان کردیان بە پیرباڵ بەردی ڕەقیشی کردە مزی قاڵ هەرگیز باڕەقەل پێی بێ‌هێز نابی وەک بازی پیرە باڵی تۆ پیرباڵ نرخی هونەرمەند بەرزە لە لای کورد کێ بیشکێنێ دەیخاتە ناو چاڵ دەبێ ئەم دڵە چەن پیس و ڕەش بێ وا قوڕڕاوی کرد کانیاوی زوڵاڵ؟ ! تاڵ و سوێری زۆر، چێژتم لە ژینا بەڵام نەمدیوە قەت ڕۆژی وا تاڵ گوڵیان پڕووزاند، بولبولانی گەڵ! بۆ کپ دانیشتوون؟ ناکەن ناڵەناڵ؟ لێگەڕێ با سەگ بووەڕێ بە مانگ هیچی پێ ناگا، وازبێنە "کەماڵ" ++++++++++++++++++++++ سەرناو: خه‌وێکی خۆش سەبارەت: ٩٤/١١/٢١ پیرانشار ئه‌وشۆ له خه‌وما له سه‌ر کانی بووم په‌پووله ده‌فڕین ده‌تکوت خه‌نی بووم هه‌نگیش ده‌نیشتن له سه‌ر په‌ڕی گوڵ نه‌قیم بوون له سه‌ر ئه‌نگوستیله‌ی چڵ ده‌تکوت ده‌ریایه حه‌وا له شینی زه‌وی جوانتر بوو له بوکی چینی دار هه‌موو به‌رز، هێلانه له سه‌ر مه‌لیش هه‌ڵده‌فڕین، ده‌یانبه‌ست له‌نگه‌ر سروه به نه‌رمی وه‌ک خوشکێکی چاک دایدێنا سه‌ری گوڵزاری دڵپاک هه‌تاو بێ‌پشوو گۆرانی ده‌ڕست هه‌رچی گه‌ڵا بو گوێیان هه‌ڵده‌خست هه‌ر هه‌ڵده‌هاتم له ده‌شتێکی ساف دڵخۆش وه‌ک کوردی گه‌یشتوو به ماف ئه‌و‌ خه‌وه خۆشه‌م قه‌ت ناچێ له بیر خه‌وی هه‌موو خۆش ساوا هه‌تا پیر ++++++++++++++++++++++ سەرناو: به‌هار سەبارەت: به‌هاری ١٣٧٧ زه‌نگیاوێ به‌فری ته‌مه‌نی زستان توواوه‌ سه‌رچاوه‌ی به‌هار، دووباره‌ ژیاوه‌ هه‌ر جێیه‌ بچی فه‌رشی گیایه‌ عاسمانت ده‌ڵێی له‌ به‌رپێ دایه‌ به‌ ئاوی ئاواز بلبلی شه‌یدا گوڵی ژاکاوی دڵان ئاو ده‌دا له‌چکه‌ی سه‌وزه‌ یار له‌ سه‌ری ناوه‌ یا له‌ دم کانی، گیایه‌ ڕوواوه‌؟ ! له‌ سه‌ر په‌ڕی گوڵ ئاونگه دیاره‌ یا نه‌ ئاره‌قه‌ی سه‌ر کۆڵمی یاره؟ ! له‌ بن ڕیحانان ئاو ڕاوه‌ستاوه‌ وەکوو جواناوی ناو بسکی خاوه‌ دنیا سه‌راسه‌ر، وێنەی به‌هه‌شته‌ له‌ پیر و جوان، گشتی له‌ گه‌شته‌ سروه‌ دادێنێ بسکی گیا و گۆڵ بێ‌وه‌ی هه‌ستێنێ، تۆزێ تۆز و خۆڵ هه‌رچی ده‌یبینی مه‌ست و خۆشحاڵه‌ شووشه‌ی شه‌ڕابی خه‌می به‌ تاڵه‌ به‌هار کیژێکی جوان و دڵگیرە خه‌زانی خه‌می جوان و پیرە ++++++++++++++++++++++ سەرناو: کانی ژیان سەبارەت: ١٣٧٧/١٢/٢٠ هەتاوی، زه‌نگیاوێ‌‌ کانی ژیانم وه‌تی ته‌قیوە قه‌تی به‌خۆوه‌ ڕوونی نه‌دیوه‌ هه‌ر خه‌م و ده‌رده‌ میوانی دڵم قه‌ت په‌یدا نه‌بوو ده‌رمانی دڵم که‌سێ ناپرسێ له‌ حاڵ و ده‌ردم به‌زه‌یی نایه‌ به‌ ڕه‌نگی زه‌ردم فرمێسکی چاوم هه‌موو خوێنه‌ که‌چی له‌ یارم به‌شم جوێنه مردن له‌ کوێیه‌ زیندانی ماڵت؟ ! شیرینه‌ بۆ من شه‌ڕابی تاڵت به‌بێ نۆشدارووی ژوانت گوڵم چا نابێ زامی سۆهرابی دڵم بۆ قه‌لی ده‌ردی سه‌ر داری جه‌سته‌م تیری ڕاوکه‌ری، هه‌ڵۆی گیانه‌که‌م ++++++++++++++++++++++ سەرناو: وه‌فاداری سەبارەت: ١٣٧٧/١٢/٦ هەتاوی، زه‌نگیاوێ ڕوونه‌ که‌ له‌یلا سارا بوو‌ جێگای بیزانی حالی مه‌جنوونی شه‌یدای یۆسفی غه‌ریب له‌ ناچاری بوو‌ نه‌یزانی یاری ده‌ردی کاری بوو‌ خۆ تۆ ده‌زانی ده‌وای ئازارم له‌ مه‌جنوون پتر من ده‌رده‌دارم ئه‌دی له‌به‌رچی ڕووحی شیرینم ده‌رمانی ناکه‌ی قەلبی حه‌زینم زلێخا چه‌ندی یۆسف خۆش ده‌وێ باوه‌ر که‌ دڵم پتر تۆی ده‌وێ شاهێ به‌غه‌یری دڵت خۆ نییه‌ ئه‌دی له‌به‌رچی مه‌یلت تۆ نییه‌ بیکه‌ خاتری ڕۆژی جه‌ماڵت تۆ وه‌فادار و من شێتی خاڵت ++++++++++++++++++++++ سەرناو: خه‌زایی و کللۆ سەبارەت: ١٣٧٨/٠٢/١٩ زه‌نگیاوێ‌‌‌ غه‌زای خه‌زایی١ و کللۆ مه‌شهوورە له‌وێش زاڵم باش، مه‌زلووم ناجوورە وه‌ک جه‌هه‌نده‌می کاکی هه‌ژارە دنیا به‌هه‌شتی چینی زۆردارە به‌ڵام تۆ بڵێی بۆ زۆرداری دڕ تاکوو مێگه‌لی دنیا ده‌بێ قڕ پڕ له‌ ته‌عام بێ خووانی دنیا برسی ئاویشی نه‌چێ به‌ ده‌میا؟ ! ڕۆژێ هه‌ر دادێ، له‌ ته‌ختی چاڵ بێ شه‌کر وه‌ک ژه‌هر به ‌زاری تاڵ بێ ١. خه‌زایی باڵنده‌یه‌که‌ له‌ سێروو که‌مێک گه‌وره‌تره‌. ده‌گێڕنه‌وه‌ زه‌مانی قه‌دیم کللۆ یه‌کجار زۆر بووه‌؛ خه‌زاییش شه‌ری له‌ گه‌ڵ کردووه ‌و خواردوویه‌تی؛ جا وه‌رزێڕه‌کان له‌به‌ر ئه‌وه‌ی کللۆ هێندێکی زيان پێ‌گه‌یاندوون؛ به‌ خوای شه‌ڕیان له‌ قه‌له‌م داوه‌ و خه‌زاییان به‌ خوای چاکه‌. ++++++++++++++++++++++ سەرناو: له‌ دنیایه ‌دا هێمنی نه‌بێ سەبارەت: ٧٨/٠٢/٢٥ زه‌نگیاوێ بۆ ئه‌و مرۆڤه‌ی خاوه‌ن دوژمنه‌ چاکه‌ ئاکاری قه‌له‌سابوونه‌١ مه‌سه‌له‌ی کوردی هه‌موو جوانن که‌ نابێ دوژمن به‌ که‌م بزانن که‌سی دوژمندار هه‌تا بمێنی ڕووی ئاسووده‌یی به‌خۆ نابینی یاخوا ژیانی بێ‌گرژی نه‌بێ دوژمنایه‌تی، کێ دژی نه‌بێ بڵێن هه‌ر دڵی پڕ زام و ئێشه‌ کێ سه‌ری بوخرێ، له‌ شه‌ڕ و کێشه‌ ١. قه‌له‌سابوونه‌ باڵنده‌یه‌کی زۆر وریا و ئاگاله‌خۆیه‌؛ هێشتا نه‌دیتراوه‌ و نه‌بیسراوه‌، که‌س توانیبی بیگرێ؛ یان به‌ردی پێ‌دادرابێ. ++++++++++++++++++++++ سەرناو: یادێ له‌ خانای قوبادی سەبارەت: ٧٨/٠٢/٣٠ زه‌نگیاوێ هه‌زار ڕه‌حمه‌تت له‌ گۆڕی خانا خاوه‌ن هه‌ڵبه‌ستی به‌ نرخ و خانا هه‌ر تاکه‌ بەیتێ که‌ تۆ وتووته‌ به‌قیمه‌ت‌تر له‌ زێڕ و یاقووته‌ که‌س ده‌بێ هه‌بێ ئه‌م بەیتەی خوارێ گوێ لێ‌نه‌بووبێ جارێ له‌ زارێ «ڕاسته‌ن مه‌واچان فارسی شه‌که‌ره‌ن کوردی جه‌ فارسی به‌ل شیرین ته‌ره‌ن» ڕاسته‌ که‌ ده‌ڵێن: فارسی هه‌نگوینه‌ کوا وه‌کوو کوردی خۆش و شیرینه‌ «گه‌نجه‌وی» نادا شانت له‌ شانی به‌ شاگردیشت ناشێ «گورگانی» به‌های «دیوانت» خاکی ئێرانه‌ «خه‌سره‌و و شیرن»، ئه‌رمه‌نستانه‌ نه‌جدی ڕه‌وانی«مه‌جنوون و له‌یلات» ئه‌وه‌نده‌ به‌رزه، که‌سی پێ‌ناگات «یۆسف و زلێخات»١، له‌ وێنه‌ی نییه‌ عه‌زیزی میسری ورده‌کارییه‌ «که‌ماڵ» مەحتی تۆی پێ ته‌واو نابێ جه‌وهه‌ر و خامه‌ی دار و ده‌ریا بێ ١. ئەو ناوانەی دەنێو جووتکەوانەی‌بچووک دان، ناوی کتێبەکانی خانای قوبادین. ++++++++++++++++++++++ سەرناو: وه‌ڵامێک سەبارەت: ٧٨/٠٣/٢٤ زه‌نگیاوێ گیانه‌که‌م نالی و ناری یه‌ک نینه‌ چۆن خه‌نجه‌ر و شیر که‌ یه‌ک چه‌ک نینه‌ یه‌ک له‌ مه‌ریوان کردوویه‌ زهوور یه‌کیش له‌ خاکی پاکی شاره‌زوور هه‌ر تک خاوه‌نی هه‌ڵبه‌ستی چاکن له‌ غه‌زه‌ڵ‌وێژی بێ‌وێنه‌ و تاکن به‌ تایبه‌ت نالی گه‌لێ به‌ناوه‌ بایه‌خ به‌ وشه‌ی که‌س وا نه‌داوه‌ ++++++++++++++++++++++ سەرناو: گیانه‌که‌م مه‌یلێ سەبارەت: ٧٨/٠٩/٠٤ دۆڵه‌گوێزان گیانه‌که‌م مه‌یلێ، گیانه‌که‌م مه‌یلێ من که‌ مه‌جنوونم بۆ نابێ له‌یلێ من که‌ مه‌جنوون و مه‌فتوونی تۆمه‌ دێوانه‌ی باڵای بێ‌چوونی تۆمه‌ جارێ وه‌ره‌ بۆ نه‌جدی مه‌حه‌ببه‌ت نه‌جات ده‌ دڵم له‌ ده‌رد و مێحنه‌ت من که‌ سووتاوی شه‌می ڕووی تۆمه‌ تاکه‌ی بێزراوی دڵی ڕووی تۆمه‌ خۆ چاوی هه‌ستم، به‌ چاوی شینت نابینێ به‌بێ نووری ئه‌وینت به‌ نه‌شته‌ری خه‌م بۆ ده‌ریدێنی هه‌ر به‌ ناکامی ئیشکی هه‌ڵدێنی گیانه‌که‌م مه‌یلێ، گیانه‌که‌م مه‌یلێ جارێ ڕه‌چاو که‌ ئاکاری له‌یلێ ++++++++++++++++++++++ سەرناو: ناڵه‌ سەبارەت: ٧٨/٠٩/١٠ دۆله‌گوێزان ناڵێم وه‌کو نه‌ی، ناڵه‌م حه‌زینه‌ ئه‌گه‌رچی ئێجگار به ‌سۆز و تێنه! هه‌رتک له‌زێدی خۆن دوور خراوین دڵ به‌ تیری خه‌م له‌ت له‌ت کراوین زێدی وی زه‌ل و گه‌لێک ناخۆشه‌ که‌چی وا دڵی بۆی به‌ په‌رۆشه‌ چۆن له‌ به‌هه‌شتێ من ده‌رکرابم بۆو جه‌هه‌ننه‌مه‌ وا ڕاو نرابم ناڵه‌م دار و به‌رد وه‌گریان نه‌خا بلوێر له‌ ئاستی سه‌ری دانه‌خا چ‌بکه‌م زمانم زۆر له‌ مێژ ساڵه‌ ناتوانێ ده‌رخا ئه‌م ئاه و ناڵه‌ ++++++++++++++++++++++ سەرناو: زستان سەبارەت: ٧٩/١١/٠٣ (کـ. هـ) ڕۆژ تازه‌ ده‌یویست شه‌و ببه‌زێنێ زه‌وی ڕووناکی ده‌خۆی وه‌رێنێ وێستابووم له ته‌ک باخێکی زۆر چڕ وه‌ک داڕه‌کانی خه‌مبار و دڵپڕ به‌فر هه‌موو جێی چاک داپۆشیبوو زه‌وی له‌ جوانی پاک بێ‌به‌ری بوو ده‌هات بایه‌کی ساردتر له‌ سه‌هۆڵ هه‌ر ئه‌وه‌ند مرۆی پێ نه‌ده‌بوو کۆڵ ده‌یخوێند کوندێکی به‌دشم له‌ سه‌ر دار هێنده‌ی تر باخی کرد بوو عه‌زادار وتم: ئه‌ی باخی دڵگیر و جوان باخی شه‌دادت ببێ به‌ قوربان گه‌لێ دڵته‌نگی به‌ ئه‌م هه‌وایه هه‌ر وه‌کو مردوو نوزه‌ت لێ نایه وه‌ختێ خۆش ده‌بوو دڵ هه‌ر به‌ نێوت ئێسته‌ نافڕێ قه‌لیش له‌ نێوت تۆ به‌ سێ مانگان به‌جوانی پیری وه‌ک ساوای بێ شیر شڕ و زه‌ویری میلله‌تی ئێمه‌ هه‌زاران ساڵه‌ سه‌رما و نه‌گبه‌تی له‌ سه‌ری زاڵه‌ هه‌زاران ساڵه‌ ئه‌م ده‌شت و دۆڵه‌ ڕاوگه‌ی کڕێوه‌ و به‌فر و سه‌هۆڵه‌ ئێستاش نازانین گوڵ چۆنه‌ ڕه‌نگی چۆمی به‌هاران خوڕڕه‌ و ئاهه‌نگی ئێستاش به‌هارن چی دیار نییه‌ زستان خه‌ریکی کۆچ و بار نییه‌ ++++++++++++++++++++++ سەرناو: گه‌نه‌دار سەبارەت: ٨٠/٠٣/٠٢ گه‌نه‌دارێ مه‌نگوڕان گه‌نه‌دار١ ئه‌تۆ بێستونی منی زێدی شیرینی بێچوونی منی وه‌کوو پڕشه‌نگی هه‌تاوی نه‌ورۆز منت هێناده‌ر له‌ ژینی بێ‌سۆز نه‌ فه‌رهاد دڵی وه‌ک من له‌ تین بوو نه‌وه‌ک شیرینم، شیرین، شیرین بوو نه‌بوه‌ له‌ دنیا مه‌جنوون‌تر له‌ من له‌یلێش له‌مه‌یل و مه‌فتوون‌تر له‌ من یاڕه‌ببی ده‌وران چه‌رخت خه‌رابی نه‌بو به‌ مه‌یلن قه‌ت له‌ گه‌ڕ دابی هه‌ر جارێ چقڵێ ده‌ڕوێ له‌ ڕێگان قه‌ت نه‌بو مارێ نه‌نوێ له‌ ڕێگان که‌س نه‌بوو جارێ خه‌مخۆری مه‌بێ مه‌ڕهه‌می دڵی ناسۆری مه‌بێ مه‌گه‌ر خوا بکا ڕه‌حم به‌ به‌ختن ته‌خت کا ڕێگای دژوار و سه‌ختن ١. ناوی دێهاتێکی پیرانشارە. ++++++++++++++++++++++ سەرناو: پاییز سەبارەت: ٨٣/٠٩/٠٩ زه‌نگیاوێ زه‌وی له‌ جێ جێ لێوه‌ی١ کردووه‌ دیوی نیسێیان خووسی گرتووه‌ سپی و شینایی زۆر لێک دێته‌وه‌ پاییز ڕه‌نگێکی پێ‌ده‌گرێته‌وه‌ گه‌ڵا خزیون ده‌ قولک و که‌ندان له‌ ترسی سه‌رما و شکست و به‌ندان هه‌ر دارێ بیڵێی ڕووتاوه‌ته‌وه‌ له‌ ڕیزی جوانان شۆراوه‌ته‌وه‌ دم چۆمیش سه‌فای جارانی نه‌ما به‌زم و ئاوازی مه‌لانی نه‌ما بڕۆ شاخ و ده‌شت گشتی ته‌خت که‌ نابینی مه‌لێ غه‌یری چوێله‌که‌ بۆ به‌رزه‌ شاخان، مه‌ندیلیان کڕی هه‌ر بینا زه‌ویش کفنیان بڕی وه‌ک زه‌وی ڕه‌نگی مردوی گرتووه‌ سه‌یره‌ کفنیان بۆ نه‌ناردووه‌ پاییزه‌ و ڕۆژی به‌ند و شکسته‌ هه‌ر سـووکی٢ خۆشی سووک و شکسته ١. لێوە: شینکەی تازە دەرهاتوو. ٢. سووک: بازار. ++++++++++++++++++++++ سەرناو: مرۆڤ و ژینی مه‌لی داماوی له ‌سه‌ر داره‌ڕووت ئەم داماوییه‌ت منیشی ئه‌نگووت به‌ بای دیمه‌نی نێو باخ و گوڵزار به‌ ده‌نگ و هاژه‌ی مه‌لان و ڕووبار تۆزی خه‌م تاوێ، له‌سه‌ر دڵ لاچوو که‌چی به‌ دینت داپۆشراوه‌ زوو وه‌ک هه‌میشه‌ی خۆم خه‌مبارم بینی هاته‌وه‌ یادم مرۆڤ و ژینی ژینیان له‌ سه‌ختی وه‌کوو ئه‌م داره‌ وشک و هه‌ڵۆڵ و پڕگرێ و خواره ++++++++++++++++++++++ سەرناو: زانایی سەبارەت: ٩٢/١٠/٢٢ میراوێ عه‌زیزم وه‌دوی زانایی که‌وه‌ نه‌زان به‌جێماو، زانا پێشڕه‌وە زانا له‌ هه‌رجێ له‌ سه‌ر سه‌رانه‌ بێ‌قه‌در و بێ‌ڕێز، ته‌نیا نه‌زانه‌ ئه‌وانه‌ی شانه‌ له‌ سه‌ر ته‌ختی زێڕ چاوساغه‌ زانا، ئه‌وان وه‌کوو کوێر زانست وه‌کوو ڕۆژ ڕێ ڕووناک ده‌کا شه‌وی نه‌زانی وه‌ک ڕۆژ لێده‌کا زانین قه‌ڵایه‌ ڕۆژی ته‌نگانه‌ بژیو و قووتی هه‌رچی ئینسانه‌ زانست بۆ به‌شه‌ر وه‌ک باڵه‌ بۆ مه‌ل به‌بێ ماندوو بوون ده‌تباته‌ سه‌ر که‌ل کێ له‌ ته‌نبه‌ڵی دوور و بێزاره‌ بزانه‌ بێ‌شک ئه‌و خوێنده‌واره‌ له‌ کاری بێ‌سوود زانا ته‌ریکه‌ له‌ گه‌ڵ کتێبان دایمه‌ خه‌ریکه به‌ڕاستی کێیه‌ له‌ حه‌ق ده‌پرسێ؟ ! ئه‌وه زانایه‌، له‌ خوا ده‌ترسێ هه‌ر گه‌لێ که‌وا خوێندنی نه‌بێ له‌ سه‌ختی زیاتر تووشی چی ده‌بێ؟ ! ++++++++++++++++++++++ سەرناو: حەیا سەبارەت: ٩٣/١١/٠٧ میـراوێ هه‌ر که‌س ئاقل بێ، شه‌رم‌به‌خۆیه بێ‌شه‌رم کێ بێ، دینی درۆیه حه‌یا و شه‌ڕه‌فه ده‌تباته سه‌رێ به‌ لێشاو‌ خێرت دێنێته‌ سه‌ر ‌ڕێ قسه‌ی خۆشه‌ویست با له‌ بیر نه‌چێ: کێ به‌حه‌یا بێ بۆ به‌هه‌شت ده‌چێ کۆڵه‌که‌ی بڕوای پته‌و حه‌یایه‌ هه‌ر که‌س نه‌یمێنێ دینی ڕمایه‌ حه‌یا نه‌مێنێ هه‌موو شت ده‌که‌ی تا ڕۆژێ سه‌رت له‌ به‌ردی ده‌ده‌ی ++++++++++++++++++++++ سەرناو: تەمبەڵی مەکەن سەبارەت: ٩٥/٠٣/٣٠ پیرانشار ڕۆژ هاتۆتەدەر، بە تیشکی زێڕین زێڕوەشانی کرد هەموو ڕوی زەوین سروە دادێنی بسکی گوڵ و دار بێنی خۆش گەڕا دە دێهات و شار بارانەی بەهار، چۆم و ئاوهەڵدێر گشت هەرا دەکەن بە دەنگی دلێر ڕاپەڕن لە خەو لە پێش ڕۆژهەڵات تەمبەڵی مەکەن لە شار و دێهات چاوی لێتانە خاک و زمانتان دەوڵەمەندی کەی، ببێ ئاوەدان دەوڵەمەند نەبێ گەلێ زمانی خاکی نەبینێ ڕوی ئاوەدانی لە قافلەی گەڵان زۆر دوا دەکەوێ خۆ ناگڕێتەوە، قەت پێش ناکەوێ ++++++++++++++++++++++ سەرناو: بۆ خاڵە حوسەینی کۆکەن سەبارەت: ٩٥/٠٥/٠٦ پیرانشار بە ئەشقی شیرین فەرهادی پێشوو بێستوونی شەق کرد، بەمە ناودار بوو ئەی فەرهادەکەم تۆ چلۆن دەمری؟ بە ئەشقی خاکت کێوت هەڵدڕی ++++++++++++++++++++++ سەرناو: کرێکۆڵێکم، ماندوو، زەحمەتکێش سەبارەت: خانێ ٩٥/١١/٢١ کـ. هـ. کرێکۆڵێکم، ماندوو، زەحمەتکێش پشتم داڕووشاو، پڕ ئازار و ئێش منیش ژیانم گەلێ پێخۆشە بە کڕێوە شاخم زۆر پێ‌ناخۆشە بەڵام بەڕۆژێ نەگرم گوێی کارێ بێ نان دەمێنم سەر لە ئێوارێ دەبێ زۆر لەخۆم پتری هەڵگرم لە ژێر باری زۆر پشتم ڕاگرم دەموێ ئاتاجی ناکەسان نەبم تووشی منداڵم لە برسان نەبم با پشت و لاقم دایمە بکەن ئێش تاڵی ببیسم لە بێگانە و خێش هەورازی ژینم با هەر سەخت بێ بەڵام منداڵم ڕێگای تەخت بێ وەبەر ڕنوو بێم یا گوللە زاڵم! خودا دەسێنێ حەقم لە زاڵم ++++++++++++++++++++++ سەرناو: سەردەمی مناڵی سەبارەت: ١٣٩٦/٠٣/٢٠ کـ. هـ مناڵ بووم لەگەڵ بابم چوومەدەر لەناو ڕەوەزێ دەنگێ هاتەدەر ئەحمەدڕاوکەرە ئەو دەنگە فەرمووی مرۆ زۆر خۆشە بیرەوەری زووی ئێستاش ئەو دەنگە هەر دێ لە بن گوێم پەندێکە نابێ بیخەمە پشت گوێم؛ نابێ لە سرووشت قەت وەدوور کەوم بێ ئەو لانکە چۆن خۆش دەبێ خەوم؟ ! ئای چەندە خۆش بوو دەمی مناڵی دە دەمەدا بێ فکر و خەیاڵی ++++++++++++++++++++++ سەرناو: وەبزانە زۆڕنات بەدەم وەناوە سەبارەت: ٩٦/٨/١٥ هەتاوی، پیرانشار قاچاغچییەک بوو لە دورانی زوو جیران دەهاتن چیان پێویست دەبوو هەرکەسێ پێشتر پووڵی نەدەدا خۆی لێ گێل دەکرد بێ چرپە و سەدا یەکێ وتی: ها ئەوەش پووڵەکەی زوڕنا بکڕە بۆم، وەپشت گوێی نەدەی وتی: کاکی خۆم هەر لەئێستاوە وەبزانە زۆڕنات بەدەم وەناوە ++++++++++++++++++++++ سەرناو: تۆرەمەی مرۆ لەشی کەسێکن سەبارەت: ٩٦/٠٨/٢٣هەتاوی، پیرانشار تۆرەمەی مرۆ لەشی کەسێکن هەموو بەرهەمی هێز و دەسێکن وەک چۆن جێیەکت گەر وەژان کەوێ ئازای بەندەنت هیچی ناسرەوێ تۆ کە بە دەردی خەڵکی نازانی چۆن دەشێ بەتۆ بڵێین ئینسانی بنی آدم اعضای یکدیگرند که در آفرینش ز یک گوهرند چو عضوی به درد آورد روزگار دگر عضوها را نماند قرار تو کز محنت دیگران بی غمی نشاید که نامت نهند آدمی «گلستان سعدی» ++++++++++++++++++++++ سەرناو: پێشینیان ده‌ڵێن سەبارەت: ٧٧/١١/٠٨ زەنگیاوێ جێگه‌ی شاخاوی پڕ خڕ و دۆڵه ژینگه‌ی نه‌ته‌وه‌ی ئازایه ڕۆڵه کوێ شاخاوییه وه‌کو کوردوستان زێدی دڵگری کوردی قاڕه‌مان که خوای بانی‌سه‌ر عاله‌می دانا خه‌ڵکی خه‌ڵق کرد له گێڵ و دانا بۆوه‌ی بزانن به‌هه‌شتی چۆنه مه‌وته‌نی ئێمه‌ی کرده نمۆنه پێغه‌مبه‌رمان درودی خوای له سه‌ربێ کێوی جودی و چۆمی فوڕاتی کوردوستانی به کێو و چۆمێکی به‌هه‌شت داده‌نێ. ئه‌مه‌ش حه‌دیسه‌که ‌و سه‌رچاوه‌کانی؛ جودي و فرات وذكر إسماعيل بن إسحاق قال: «حدثنا إسماعيل بن أبي إدريس، قال: حدثني كثير بن عبد الله بن عمر بن عوف، عن أبيه، عن جده قال: قَالَ رَسُولُ اللَّهِ ص «أَرْبَعَةُ أَجْبُلٍ مِنْ جِبَالِ الْجَنَّةِ وَأَرْبَعَةُ أَنْهَارٍ مِنْ أَنْهَارِ الْجَنَّةِ وَأَرْبَعَةُ مَلَاحِمَ مِنْ مَلَاحِمِ الْجَنَّةِ.» قِيلَ: فَمَا الْأَجْبَلُ؟ قَالَ: «جَبَلُ أُحُدٍ يُحِبُّنَا وَنُحِبُّهُ والطُّورِ جَبَلٌ مِنْ جِبَالِ الْجَنَّةِ وَلُبْنَانُ جَبَلٌ مِنْ جِبَالِ الْجَنَّةِ وَالْجُودِيُّ جَبَلٌ مِنْ جِبَالِ الْجَنَّةِ.» وَالْأَنْهَارُ الْأَرْبَعَةُ: النِّيلُ، وَالْفُرَاتُ، وَسَيْحَانُ، وَجَيْحَانُ، وَالْمَلَاحِمُ: بَدْرٌ، وَأُحُدٌ، وَالْخَنْدَقُ، وَخَيْبَرٌ.» ١) الكتاب: التذكرة بأحوال الموتى وأمور الآخرة، المؤلف: أبو عبد الله محمد بن أحمد بن أبي بكر بن فرح الأنصاري الخزرجي شمس الدين القرطبي (المتوفى: ٦٧١هـ)، تحقيق ودراسة: الدكتور: الصادق بن محمد بن إبراهيم، الناشر: مكتبة دار المنهاج للنشر والتوزيع، الرياض، الطبعة: الأولى، ١٤٢٥هـ، عدد الأجزاء: ١. ٢) الكتاب: الجامع لأحكام القرآن = تفسير القرطبي، المؤلف: أبو عبد الله محمد بن أحمد بن أبي بكر بن فرح الأنصاري الخزرجي شمس الدين القرطبي (المتوفى: ٦٧١هـ)، تحقيق: أحمد البردوني وإبراهيم أطفيش، الناشر: دار الكتب المصرية – القاهرة، الطبعة: الثانية، ١٣٨٤هـ - ١٩٦٤ م، عدد الأجزاء: ٢٠ جزءا (في ١٠ مجلدات). سورة الطور (٥٢): الآيات ١ الى٨. ++++++++++++++++++++++ سەرناو: پاڕانەوە سەبارەت: ١٣٧٥ پیرانشار، وەختی خۆی لە گۆڤاری سروەش‌دا بڵاو بۆتەوە. خودای بێ‌شه‌ریک، خودای بێ‌شه‌ریک هه‌ر که‌س به‌ زیکری تۆ نه‌بێ خه‌ریک بێ به‌خت و چاره‌ی هه‌ر وه‌کو ئه‌وه‌ به‌غه‌یری شه‌یتان نه‌ده‌بێ و بووه‌ ئه‌تۆ ئاگرت کرده‌ گوڵستان ئاوت بۆ مووسا شه‌ق کرد و وه‌ستان زاری ماسی بۆ کاخێکی دڵگیر تا یۆنس نه‌بێ ئه‌زیه‌ت و زه‌ویر خوایه هه‌ر ئه‌تۆی په‌نای هه‌ژ‌اران مه‌ڕهه‌م و ده‌وا بۆ ده‌رده‌داران پێغه‌مبه‌ر فه‌رمووی: فه‌رموویه‌ سوبحان هه‌رکه‌س بێته‌ پێش قه‌ده‌مێ لێمان لێی ده‌چمه‌ پێشێ سه‌د قه‌ده‌م پتر من به ‌ساڵی نوور ئه‌و بێ به ‌متر که‌وایه‌ (که‌ماڵ) ده‌یوێ بێته‌ پێش قبووڵ که‌ تۆبه‌ی به ‌گه‌وره‌یی خێش له‌ خه‌تاکانی ئه‌وجار ببوره‌ له‌ ئاستی خه‌تا هه‌رچه‌ند ڕووسووره‌ له‌چاوی تاعه‌ت که‌ بێ‌نه‌سیبه‌ گه‌وره‌یی ده‌ریای ڕه‌حمت عه‌جیبه ++++++++++++++++++++++ سەرناو: گه‌وهه‌ر سەبارەت: هاوینی ١٣٧٥‌ گه‌وهه‌رێ که‌وته‌ ده‌ستی نه‌زانێ نه‌بوو له‌ وێنه‌ی له‌ گشت جه‌هانێ شیاوی ده‌ستی پاشای به‌ناو بوو پڕشه‌نگی جوانی وه‌کو هه‌تاو بوو که‌رێکی پیس و لاوازی هه‌بوو غه‌یری تۆپاندن بۆ هیچ نه‌ده‌بوو به‌ خه‌یالی خۆی به‌ باشی زانی بیخاته ئه‌ستۆی له‌ بۆ جووانی من ئه‌و گه‌وهه‌ره‌م چه‌رخی ناله‌بار خستوومێ ملی ده‌ورانێکی هار ابله كوردل يكی ابلهی شبچراغی بجست كه با وی بُدی عقد پروين درست سزاوار بازوی جمشيد بود فروزانتر از ماه و خورشيد بود خری داشت آن ابله كوردل كه با جانش بُد جانِ خر متصل چنان گوهری را كه نايد بدست شنيدم كه بر گردن خر ببست! من آن گوهرم، بختِ ناسازگار مرا بسته بر گردنِ روزگار! منسوب به «فردوسی» سەرچاوە: بهشت سخن، دکتر مهدی حمیدی، تهران، انتشارات پاژنگ، ١٣٦٦، ج١، ص٢١٥. ++++++++++++++++++++++ سەرناو: یادێ له ‌مامۆستا هه‌ژار سەبارەت: ١٣٧٦ زه‌نگیاوێ گه‌ڵت به‌رگی ڕه‌ش چلۆن نه‌پۆشێ زووخاوی خه‌م و ماته‌م نه‌نۆشێ بۆ تۆ که‌ تامای ژیای به‌مه‌ردی مامۆستای شێعر و په‌خشانی کوردی کوا ده‌بێته‌وه‌ ئازای وه‌کو تۆ وه‌رگێڕێکی واو زانای وه‌کو تۆ کوا ده‌بێته‌وه‌ دڵسۆزی وه‌ک تۆ تۆزی ڕێگا بێ بۆ هۆزی وه‌ک تۆ تاکوو نه‌ژاکای به‌ڵام لێ بارێ له‌ ته‌ختی سه‌ختی نه‌هاتێ خوارێ به‌ڕاستی زانای وه‌کوو تۆ که‌م بوو‌ ته‌واوی دنیا بۆت دڵ به‌خه‌م بوو‌ هه‌ڵۆی تیژباڵی کوێستانی پاکی که‌سم نه‌دیوه‌ وه‌کۆ تۆ خاکی بۆ که‌سێ هه‌یبێ هه‌ستی گه‌ل‌ویستی تاکو بمێنێ هه‌ر خۆشه‌ویستی ئه‌و خزمه‌ته‌ی تۆ، قه‌ت له‌بیر ناچێ مه‌گه‌ر گه‌لی کورد گشتی تێداچێ ++++++++++++++++++++++ سەرناو: بۆ کۆچی ناوه‌ختی کاک مارف ئاغایی سەبارەت: ٧٦/١١/٣٠ زه‌نگیاوێ چاوه‌ی ژیانم چۆن نه‌بێ قوڕڕاو بارانی ئه‌شکم نه‌بارێ له‌ چاو چۆن گوڵی خۆشی و شادیم نه‌ژاکێ بلبلی دڵم ده‌ردی نه‌گاتێ ئه‌ستێره‌ی گه‌شی ئاسمانی ئه‌ده‌ب دوڕی بێ‌وێنه‌ی ناو کانی ئه‌ده‌ب بۆ هه‌ڵوه‌رینی گوڵی ته‌مه‌نت بۆ زوو وه‌ستانی دڵی ته‌مه‌نت مه‌رگت داغێکی ناوه‌ به‌ جه‌رگم چانابێته‌وه‌ تا کاتی مه‌رگم نه‌خشی یادی تۆ له ‌سه‌فحه‌ی خه‌یاڵ لاناچێ تاکوو نه‌خرێمه‌ نێو چاڵ دنیا به‌زه‌یی به‌ که‌س دانایه‌ به‌خته‌وه‌ر که‌سێ که‌ له‌و‌ دنیایه‌ تا کاتێ ژاری مه‌رگ ده‌نۆشێ بۆ گه‌ل و هۆزی خۆی تێ‌ده‌کۆشێ ++++++++++++++++++++++ سەرناو: مانگی چارده سەبارەت: به‌هاری ١٣٧٦ مه‌گه‌ر چییه‌ قه‌دی تۆ ئه‌ی مانگی چارده‌ شه‌وی سه‌روی سه‌هی وا سه‌ری به‌ دیتنی ده‌کا نه‌وی؟ ! مانگه‌شه‌و هه‌ر که‌ دادێ من تۆم پتر دێته‌ یاد به‌ڵێ به‌ زوولف و روخسار هه‌ر ده‌ڵێی مانگ و شه‌وی نه‌م دیوه‌ ئه‌ستێره‌یه‌ک، گه‌ش بێ وه‌کوو چاوی تۆ بۆ دیتنی من خه‌وم قه‌ت له‌ چاوی ناکه‌وی به‌ سه‌ر و گیانت گیانه‌، سه‌رت له‌ سه‌ر داده‌نێ هه‌رچی ته‌نیا جارێکی چاوت به‌ چاوی که‌وی به‌ خاتری ئه‌م جوانییه‌ت، ڕه‌حمێ بکه‌ به‌«بێدڵ»١ به‌و بێدڵه‌ی به‌ بێ تۆ تاڵه‌ خۆراک و خەوی ١. ئه‌و کات نازناوی شێعریم «بێدڵ» بوو. ++++++++++++++++++++++ سەرناو: چرای خه‌یاڵ سەبارەت: به‌هاری ١٣٧٧ زه‌نگیاوێ گوڵی دڵخۆشیم ژاکاوه‌ ئه‌مشه‌و بێ خۆری ڕوی تۆ فه‌وتاوه‌ ئه‌مشه‌و هه‌رچی ده‌یبینی شاد و به‌که‌یفه‌ ته‌نیا دڵی من داماوه‌ ئه‌مشه‌و هه‌موو که‌س گه‌ییه‌ کاروانی ئاوات هه‌ر دڵی منه‌ جێماوه‌ ئه‌مشه‌و به‌ بۆنه‌ی بسکت چاو له‌ شه‌و ده‌که‌م ئه‌ویش له‌ به‌ختم گۆڕاوه‌ ئه‌مشه‌و بۆیه‌ وا دایسێ چرای خه‌یاڵم په‌پووله‌ی هیوام سووتاوه‌ ئه‌مشه‌و «بێدڵ» بۆ شاعیر خه‌میش گه‌وهه‌ره‌ ئه‌م شێعره‌ له‌ خه‌م گووراوه‌ ئه‌مشه‌و ++++++++++++++++++++++ سەرناو: مریدی تۆم... سەبارەت: خه‌زه‌ڵوه‌ری ١٣٧٧ هەتاوی ڕۆژڕه‌شی ڕۆژ چاوی تۆم، که‌ وه‌ک ئه‌ستێره‌ی گه‌شه شه‌و که‌ هه‌ڵدێ ڕۆژی ڕووت، له ‌تاوت جه‌رگم ڕه‌شه‌‌ چۆن له‌ دووریت چاو و دڵ، نه‌توێته‌وه‌ و نه‌سووتێ چی بۆ په‌روانه‌ی دڵم، وه‌ک شه‌می ڕووت دڵکه‌شه‌ شه‌هی هه‌موو دنیایه‌ ده‌ یانه‌ی خۆشی دایه‌ له‌ به‌ر ده‌رکت هه‌ر که‌سێ، شای بتان جارووکه‌شه‌ له‌ باوه‌شی وه‌فا دا، من هه‌ر ئه‌تۆم نه‌دیوه‌ چی ده‌بێ گه‌ر جارێ تۆش، بێیه‌ نێو ئه‌و باوه‌شه‌؟ ! کراسێ له‌ په‌لکی گوڵ، چاکه‌، چاکه‌ بۆ به‌رت سووره‌ گوڵم ئه‌گه‌رچی ئه‌وه‌ش زووره‌ بۆو له‌شه‌ تا ده‌می مردن له‌ دڵ، ناچیته‌ده‌ر ئه‌وینت مریدی تۆمه‌ تا هه‌م، ئه‌گه‌ر شێخی یان قه‌شه‌ ++++++++++++++++++++++ سەرناو: مانگی هیوا سەبارەت: پاییزی ١٣٧٧ زه‌نگیاوێ یاری موو گه‌نمی ڕوو کام گه‌رچی تۆ گه‌نم و من کام له‌ باخی وه‌سڵت گوڵم با جارێ بگه‌م به‌ کام با شه‌وێ له‌ بن هه‌ور بێته‌ده‌ر مانگی هیوام بوومه‌ مه‌جنوون له‌ تاوت جارێ نه‌بووی به‌ له‌یلام «که‌ماڵ» له‌ به‌ر ده‌رکی تۆ گه‌دا بێ چۆن نه‌ڵێ شام ++++++++++++++++++++++ سەرناو: تاوی ڕوو سەبارەت: ٧٨/٠٣/٠٤ زه‌نگیاوێ دڵ هاته‌ سه‌یری چاوت سه‌فا کا نه‌یزانی که‌وا تورکی سه‌فاکه‌ برینی قووڵی مه‌لی دڵی من ڕوحمێکی بکه‌، جارێ ده‌وا که‌ به‌ باده‌ خه‌مم، به‌ باده‌ی چاوت یه‌کجاری ژینم، یا خوود به‌باکه‌ چاک و ژاکاو و سیسه‌ گوڵی دڵ تاوێ تاوی ڕووت، لێی بدا چاکه‌ دڵ تاکه‌ی ببێ، به‌ لانه‌ی خه‌مت یانه‌ی خۆشی بۆ ئه‌وچه‌ل ئاواکه‌ ++++++++++++++++++++++ سەرناو: باخی ئه‌وینداری سەبارەت: ٧٨/١١/٠٩ دۆڵه‌گوێزان له‌ناو باخی ئه‌وینداری، گوڵێکی سیس و بێ‌ڕه‌نگم له‌ به‌زمی بلبلان دا من، به‌ ته‌نیا مات و بێ‌ده‌نگم په‌پووله‌ی دڵ نیوه‌گیانه‌، گوڵی ژینم له‌ فه‌وتانه‌ وه‌کو مه‌جنوونی دێوانه‌، له‌تاو له‌یلایه‌ دڵته‌نگم دڵارامێ دڵی بردووم، له‌ ئارامی دڵی کردووم له‌ تاوانی وه‌کوو مردووم، ده‌ڵێی نه‌خشی له‌ سه‌ر سه‌نگم له‌ دنیای من به‌هار نایه‌، خۆشی و شادی بێ‌مه‌ئوایه‌ به‌ هه‌شتم وه‌ک سه‌قه‌ر وایه‌، گه‌ڵای پاییزێیه‌ ڕه‌نگم هه‌تا که‌ی من بناڵێنم، له‌ هه‌وری چاو ببارێنم بڵێم له‌یلم، شه‌مم، زێنم، هه‌تا که‌ی ناکه‌وێ چه‌نگم ++++++++++++++++++++++ سەرناو: شادی و ئه‌وین سەبارەت: ٧٨/١٢/٠٦ دۆڵه‌گوێزان زۆر له‌ مێژه‌ زیز بووه، له‌ سه‌ر لێوم پێکه‌نین چی خۆشی بوو له‌ ناو دڵ، به‌ یه‌کجاری هه‌ڵفڕین شاهی مڵکی شادی بووم، تا تۆ یارم بووی گوڵم یه‌کتری ناگرنه‌وه‌، ئه‌گه‌رچی شادی و ئه‌وین شینه‌ چاوت بۆیه‌ پێم جوانه‌ ڕه‌نگی شین که‌چی هه‌وێنی شینه‌ چاوت، ره‌مزی شینه‌ ڕه‌نگی شین یادی ڕووی تا ده‌که‌م، ده‌چمه‌ گوڵزار گیانه‌که‌م هێشتا نه‌م دیتۆته‌وه‌، گوڵێ وا جوان و شیرین وه‌ک ژیان و به‌ختمه‌، پرچی ئاڵۆز و ڕه‌شت بێنی پرچت گه‌ر نه‌که‌م، نابمه‌ خاوه‌ن به‌خت و ژین له‌ڕێگای دڵبه‌ر «که‌ماڵ»، دات له‌ده‌س عه‌قڵ و که‌ماڵ گه‌رچی پێشانی نه‌دای، جوان جه‌ماڵی بێ قه‌رین ++++++++++++++++++++++ سەرناو: باغی زانست سەبارەت: ٧٩/٠٥/٣٠ پیرانشار نه‌بیسراوه‌ له‌ دنیا گوڵێ وا شه‌نگ و شۆخ بێ سه‌روی سه‌هی و سنه‌وبه‌ر به‌ری هه‌نار و خۆخ بێ هونه‌رمه‌نده‌ به‌ ناوه، قه‌تم نه‌دی بێ‌هونه‌ر ناوی نه‌ڕوا له‌ یادان، هه‌ر چه‌ندی شه‌نگ و شۆخ بێ هونه‌ر وه‌کو ده‌ریایه‌، نازانێ چی تێدایه‌ تا نه‌چێته‌ ده‌ نێوی، کێ له‌ لێوار و ڕۆخ بێ بۆی وه‌کو بووکه‌ دنیا، زه‌حمه‌ته‌ لێی وه‌ڕه‌ز بێ جوانێکی جوان و شیرین، پیری به‌ کۆخه‌کۆخ بێ هه‌ر له‌ دنیای ئه‌وینه‌، هێزی دڵم که‌ نابێ پرسێ بکه‌ی به‌ عه‌قڵ و چاوت له‌ بارودۆخ بێ کێیه‌ ده‌بێ به‌ ڕاهیب، له‌ ده‌یری پاکی شه‌ڕه‌ف؟ ! ئه‌مه‌ ده‌س نادا له‌ کاخ، مه‌گه‌ر له‌ کونجی کۆخ بێ چی ده‌ بیر باخی زانست، له‌ مه‌زرای دڵ دا نه‌بێ یاڕەبی پڕ له‌ دڕکی په‌ژاره‌ و ئاخ‌وئۆخ بێ ++++++++++++++++++++++ سەرناو: گەنەدار (٢) سەبارەت: ٧٩/١٠/٢٨ گه‌نه‌دارێ مه‌نگوڕان به‌هه‌شتی دنیا، دێی گه‌نه‌دارە کوا ئه‌مه‌ دێیه‌؟ ! خۆشتر له‌ شارە پاییز بوو که‌ چووم بۆ ئه‌م به‌هه‌شته‌ که‌چی وه‌مزانی تازه‌ به‌هاره‌ هه‌ر جێیه‌ ده‌چی پڕه‌ له‌ کانی له ‌کوێ‌ بڕوانی گوڵ و گوڵزاره‌ خه‌ڵکێکی سه‌خی، هه‌ر وه‌کو حاته‌م چ ده‌وڵه‌مه‌ندی، چ وه‌ی هه‌ژاره‌ پیرانی هه‌موو دنیادیده‌ و ژیر گه‌نجه‌کانی وه‌ک شێری شکاره‌ پڕ له‌ مامزی شۆخه‌ که‌ شێریش به‌داوی عه‌شقی وان گرفتاره‌ مه‌دره‌سه‌که‌ی وێ، له ‌سه‌ر گردێکه‌ گشت ماڵه‌کانی لێڕا دیاره‌ ئه‌م گرده ‌نه‌قیم، مه‌کته‌ب نه‌خشی ڕووی دێ گوستیله‌که‌ی ئه‌نگوستی یاره‌ مناڵه‌کانیان له‌ ده‌رسێ گوڵن نابینی دڕکێک، له‌م لاله‌‌زاره ++++++++++++++++++++++ سەرناو: خه‌م سەبارەت: ٨٠/١٢/٢٠ خه‌مم ئه‌وه‌نده‌ زۆره‌ نازانم بڵێم چه‌ندە گه‌ر کێوی ده‌ماوه‌نده‌ له‌ ئاستی وه‌کوو که‌ندە باغم لێ‌بۆته‌ زیندان، ژیانه‌وه‌ی منه‌ فه‌وتان وه‌ک که‌کره‌یه‌ به‌ زارم چی شیرن‌تر له‌ قه‌ندە دڵم وه‌کو مامزه‌ ناسک و چوک و کزه‌ زۆر سه‌خته‌ خۆراگرێ له‌ به‌ر خه‌می دڕنده‌ ئه‌و که‌سه‌ی به‌ دیتنی خونچه‌ی دڵ ده‌گه‌شاوه‌ وه‌کوو شه‌خته‌یه‌ ئه‌مڕۆ بۆته‌ ماری گه‌زه‌نده‌ گه‌رچی دڵداری بۆ من نزم‌بوونی پێوه‌ بوو هه‌ر ئاشقه‌ به‌ڕاستی سه‌ربه‌رز و ڕه‌ندومه‌ندە گه‌رچی ئه‌و پێوه‌بوونه‌م ئێجگار گران ته‌واو بوو داوێک بوو له‌ جێی زه‌ره‌ر موو به ‌موو پڕ له‌ په‌ندە ئه‌گه‌ر میر و سه‌روه‌رم گه‌ر شاهی تاج له‌ سه‌رم یارم گه‌وره‌ خۆیه‌تی من که‌مترم له‌ به‌نده‌ «که‌ماڵ» ڕۆحی نه‌ماوه‌ خه‌وی لێ‌هه‌ڵگیراوە تاکه‌ی نایه‌ هاواری خۆ مرد خودای ده‌هه‌نده‌ ++++++++++++++++++++++ سەرناو: هه‌ر تامه‌زرۆم سەبارەت: ٨١/١٠/٠٥ زەنگیاوێ چی بڵێم من له‌ وه‌سفی سه‌روه‌ری خۆم مه‌حه‌ممه‌د؟ ! نیمه‌ تۆشه‌یێ غه‌یری که‌ ئالی تۆم مه‌حه‌ممه‌د١ گه‌رچی شه‌و و ڕۆژ ده‌مم به‌ کانی یادت وه‌یه‌ وه‌کوو تینووی له‌ چۆڵان، هه‌ر تامه‌زرۆم مه‌حه‌ممه‌د به‌ شه‌وقی تۆ ڕووناک بوو دنیای پڕ له‌ نه‌زانی چۆن به‌ ئیشقت نه‌سووتێم من وه‌کو مۆم مه‌حه‌ممه‌د به‌ دڵێکی راست و ڕووناک، کێ حوببی تۆی له‌ دڵ بێ له‌ ژێر باری گوناهان نابێ پشت‌کۆم، مه‌حه‌ممه‌د یاڕه‌بی پێم هه‌ڵوه‌رێ، ببم به‌ تۆزی سه‌ر ڕێ به‌ غه‌یری ڕاسته‌ڕێت‌دا، ئه‌گه‌ر بڕۆم مه‌حه‌ممه‌د ١. ئاماژەیە به‌م حه‌دیسه؛ ‌ ١٠٢٥-«آلُ مُحَمَّدٍ كُلَّ تَقِيٍّ: هه‌موو خۆپارێزێک له‌ بنه‌ماڵه‌ی پێغه‌مبه‌ره.» تخريج السيوطي (طبراني) عن أنس. تحقيق الألباني (ضعيف جدا) انظر حديث رقم: ١٢ في ضعيف الجامع. ++++++++++++++++++++++ سەرناو: حه‌یا که‌ی ده‌کا؟ ! سەبارەت: ٨٣/٠٣/٠١ زه‌نگیاوێ با دێت و باران، خوناوکه‌ی ده‌کا گه‌نم له‌شایان، که‌روێشکه‌ی ده‌کا بلبلی شه‌یدا، وێنه‌ی هونه‌رمه‌ند ده‌ردێ به‌ سازی چریکه‌ی ده‌کا١ زه‌رده‌زێڕینه‌، کۆشی گوێی گوڵان پڕ له‌ ئاڵتوونی عه‌نتیکه‌ی ده‌کا هه‌میشه‌ کاڵه‌، میوه‌ی دڵخۆشی به‌هاره‌ هه‌ر له‌ فه‌ریکه‌ی ده‌کا با دایک و، خونچه‌ و چرۆ وه‌ک مناڵ ئه‌م لک و چڵه‌، له‌ بێشکه‌ی ده‌کا لێوڕێژه‌ هه‌ستی شاعیر له‌ خۆشی بۆیه‌ ده‌چی که‌ی هه‌ر تکه‌ی ده‌کا کانی گیا و گۆڵ، وای ده‌وره‌ داوه‌ له‌ ڕووی ڕووگوڵ و ملوێنکه‌ی ده‌کا ئه‌م هه‌موو جوانیه کرا به‌نی بوون داوای ته‌سبیحات له‌و خه‌ڵکه‌ی ده‌کا که‌ هه‌یهه‌تی ئه‌م هه‌موو دیمه‌نه‌ ده‌بینێ ئاخر حه‌یا که‌ی ده‌کا؟ ! ١. دەردێ بە سازی چریکە کردن: یانی چاک دەخوێنێ. ++++++++++++++++++++++ سەرناو: دڵداری سەبارەت: ٨٣/٠٨/٢٥ زه‌نگیاوێ وه‌ک ئاسکی له‌ پێش چاوم، چاوه‌که‌م بۆ کوێ ده‌ڕۆی ڕووت که‌ وه‌ک گوڵ ناسکه‌، هه‌ر دڵێ بولبوله‌ بۆی مانگیش وا ده‌رکه‌وتووه‌، جوانی خۆی ده‌رخستووه‌ بۆ ئه‌وه‌ی زه‌رد هه‌ڵگه‌ڕێ، ئه‌ی مانگی چارده‌ له‌ کۆی؟ ! خوێن شیرن وه‌کو هه‌نگوین، من ئه‌و هه‌نگه‌م غه‌یری تۆ نایه‌ته‌ به‌ردڵ گوڵم، هه‌ر گوڵێ بێ، ڕه‌نگ و بۆی هومێدم وایه‌ که‌م بێ خه‌می دڵم له‌به‌روه‌ی له‌ کورتی ده‌دا هه‌رشت گه‌ییه‌ ئاخر پله‌ی خۆی پێم وایه‌ ڕووت گوڵێکه‌، له‌ سه‌ر لێوی ڕووبارێ قه‌ت وشک نابێته‌وه‌، ئه‌وه‌ندی زوو زوو بیشۆی گوڵه عومری دڵداری، وشک بی به‌ یه‌کجاری یاخوا که‌ له‌م گوڵزاره‌، ناچاری ده‌بێ بڕۆی ++++++++++++++++++++++ سەرناو: لاوه‌کان توخوا! سەبارەت: ٨٤/٠٣/١٢ زه‌نگیاوێ تا سووری١ عومرم پڕ چین‌تر ده‌بێ خۆشه‌ویستی تۆم به‌تین‌تر ده‌بێ وه‌کوو قه‌یسییه‌ خوێنت له‌ به‌ختم تا جوانتر ده‌بی، شیرن‌تر ده‌بێ هه‌ر وا ته‌نگ ده‌بێ دنیا بۆ شادان بۆ مه‌ی دڵبه‌خه‌م به‌رین‌تر ده‌بێ داهاتوو ڕه‌شه‌ بۆ ده‌ور و به‌رن شکور گه‌لی مه‌، گه‌شبین‌تر ده‌بێ چه‌وساوه‌ ڕۆژێ ده‌گه‌شێنه‌وه‌ چاوی زاڵمه‌ خوێنین‌تر ده‌بێ به‌شی خوار و خێچ ئاخر سوکییه‌ یه‌کڕه‌نگ و ڕاسته‌، سه‌نگین‌تر ده‌بێ لاوه‌کان توخوا! هه‌ر به‌ گوڵی دین خاکن جوان و ڕه‌نگین‌تر ده‌بێ ١. سوور: دیواری دەورەی باغ. ++++++++++++++++++++++ سەرناو: هه‌وێنی ژین سەبارەت: ٨٥/٠٦/٠٥ پیرانشار داوی ئه‌گریجه‌ت دانا له‌ سه‌ر ڕوو زانیت مه‌لی دڵ ده‌خرێته‌ داو زوو ئه‌وین بۆ دڵم، وه‌ک ئاو بۆ ماسی هه‌وێنی ژینه‌، ‌ نه‌ک عاده‌ت و خوو دوای ئیشقی نزمی دنیا، خوایییه‌ نه‌کا له‌ وه‌شیان نه‌بم سه‌رکه‌وتوو ئه‌گه‌رچی ژیان، وه‌ک ژه‌هری ماره‌ هه‌نگوینه‌ خوایه‌، بۆ دۆستانی توو ئه‌و کاته‌ له‌ ژین، به‌شم که‌کره‌یه‌ نامژم له‌ شیله‌ی گوڵی ئیللاهوو ++++++++++++++++++++++ سەرناو: جێژنی مه‌ولوود سەبارەت: ٨٦/٠١/١٢ کاسه‌که‌ران که‌ له‌ دایک بووی گه‌و‌ره‌تر مرۆ حه‌وا له‌چاو خاک نه‌یما هیچ شکۆ حه‌قیه‌تی زه‌وی فیزێ لێ بدا خه‌ڵک نه‌هێڵن له‌ دڵ خه‌م و سۆ ئه‌تۆ باخێکی هێند سه‌وز و جوانی وشکارۆی عه‌ڕه‌ب گه‌ش بۆوه‌ ‌به ‌تۆ‌ خوایه‌ له‌ کارت سه‌ر سووڕ ده‌مێنێ گوڵێکی وه‌ها ڕوواوه‌ له‌ کۆ؟ ! جێیه‌ک له‌ به‌ری هه‌ر هه‌ڵده‌هاتن ئێستا بۆی ده‌چن به‌ ده‌ست و ئه‌ژنۆ ڕه‌سوولی نازدار، ئه‌وڕۆژه‌ی ئه‌تۆ هاتوویه‌ دنیا له‌ یه‌ک ده‌بین کۆ به‌ خۆشه‌ویستیت گه‌ر ئاوی نه‌ده‌ین زه‌وی تاعه‌تن، نادا به‌روبۆ ++++++++++++++++++++++ سەرناو: دێوی خەم بۆ شه‌می ڕووت ئه‌و دڵه‌ی من هه‌ر وه‌کو په‌روانه‌ دێ سوور ده‌زانێ که‌ به‌شی هه‌ر ئاگر و سووتانه‌ دێ هه‌ر وه‌کو مه‌جنوون له‌ تاوت سیس و خه‌مبارم و، له‌تۆ ئه‌و ده‌مه‌ شادم هه‌واڵێک بۆ منی دێوانه‌ دێ چاوه‌ڕێم ڕۆژێک ببینم، ڕۆژی ڕوخسارت به‌ڵام به‌ختی من وه‌ک شه‌وێ وایه‌، که‌نگێ ڕۆژ شه‌وانه‌ دێ ساتێ به‌ر نادا له‌ ئێخه‌م، ده‌ستی پیسی، دێوی خه‌م ده‌نگی ناڵه‌م وه‌ک بروسکه‌ و ئه‌شکم وه‌ک بارانه‌ دێ ++++++++++++++++++++++ سەرناو: مەخابن سەبارەت: هاوینی ١٣٩٢ ورمێ ده‌ردی من ده‌وای نییه مه‌خابن بژیشکێ له‌ لای نییه مه‌خابن خه‌مم شه‌و و ڕۆژ هێرش ده‌هێنێ دڵم هیچ په‌نای نییه مه‌خابن یارم کافره، وه‌ک ڕۆژێ ڕونە هێشتا دڵ بڕوای نییه مه‌خابن وشک بوو باخی ژینم له دوری بارانی هیوای نییه مه‌خابن له‌ پاش ناخۆشی باوی خۆشییە خۆشی من سه‌دای نییه مه‌خابن «که‌ماڵ» له‌ تاو یار حه‌یای تکاوە که‌س بۆ ئه‌و تکای نییه مه‌خابن ++++++++++++++++++++++ سەرناو: دەشتی لاجان سەبارەت: ٩٢/١٠/١٤ (کـ. هـ) ده‌شتی لاجان خۆشه‌ داییم هه‌ر وه‌کوو باخی ئیره‌م وه‌ک که‌وسه‌ره‌ کانیەکانی، هیچ کاتێکی ناکه‌ن که‌م له‌ سه‌ر شاخێ لێی بڕوانه‌، ده‌مێ جێژنی گوڵانه‌ له‌کوێ به‌هه‌شت هێنده‌ جوانه؟ ده‌رمانه‌ بۆ هه‌رچی خه‌م خاکه‌که‌ی بێ‌به‌رد و پاکه‌، به‌پیتی و گۆڕی تاکه‌ چی بچێنی تێیدا چاکه‌، هیچ تۆوێ ناگۆڕێ له‌م کیژه‌کانی گشت جوانن، ژنانی شێری ژیانن پیاوه‌کانی پاڵه‌وانن، گه‌نجه‌کانی گه‌نجی جه‌م پڕ له‌ باخ و هه‌رچی داره‌، ئاووهه‌وای سازگاره‌ ده‌غڵ و دانی بێ‌ژماره، پڕ له‌ قۆپی و جۆ وو چه‌م وه‌ک به‌هاره‌ هاوینی وێ، به‌ پایزی دڵ ده‌پشکوێ به‌ زستانیشی ده‌بی نوێ، وه‌رزه‌کانی خۆش سه‌رجه‌م شاخه‌کانی زۆر بڵندن، لانه‌ی شێر و پڵنگن قه‌ڵای سه‌ختی ڕۆژی جه‌نگن، ناکرێ له‌وێ سته‌م تاریفی قه‌ت دوایی نایه‌، هێند جوان و باسەفایه‌‌ ڕه‌ببی بیپارێزی خوایه‌، گیراکه‌ی دوعایه‌که‌م ++++++++++++++++++++++ سەرناو: مانگی ڕەمەزان سەبارەت: پیرانشار ٩٧/٠٣/٢٠ مانگی ڕەمەزان باریک بوو وەک تاڵ ویست و ئیرادەی کردین مشت‌وماڵ ڕۆژوو هەستێکی دەدا بە ئینسان فەقیر لەبیرە لە پیر تا مناڵ چەوری زگیشت دەتوێنێتەوە پێستت جوان دەبێ وەکوو زێوی قاڵ ئەوندە ویستت پێی بەرز دەبێ بەرزەفڕ دەبی وەک هەڵۆی تیژباڵ زگ‌دڕاو نابی جوان بەڕۆژوو بی گەڵێ ناحەزە مرۆی زگ جەواڵ خودای گەورە خۆی پاداشت دەدا بە پێی دڵپاکیت، دڵ بکە زوڵاڵ بە برسییەتی نوور دێتە ناو دڵ تاریکی دەڕوا و شەیتان دەبێ لاڵ بە قسەی جوانت ڕۆژوو پڕخێر بە بە زمان‌پیسی قەت مەیکە بەتاڵ لە تاعەت کردن بێقەرار نەبی هەر بە سەبر بە هەتا هەی 'کەماڵ' ++++++++++++++++++++++ سەرناو: مەسیحی وەسڵ سەبارەت: ٧٨/٠٨/٢٠ دۆڵه‌گوێزان ئه‌ستێره‌ی گه‌شی به‌ری به‌یانم هه‌وێن و هیوای خۆشی و ژیانم چرای ڕووناکی یانه‌ی تاریکم تریفه‌ی مانگی‌چارده‌ی شه‌وانم ئه‌گه‌ر سێبه‌ری لوتفی تۆم نه‌بێ ده‌بم به‌ به‌فری به‌ر تاوی هاوین له‌ گه‌رمی ڕۆژی ئه‌وینی تۆیه‌ لێده‌دا دڵم له زستانی ژین ئێجگار له‌مێژه ‌سروه‌ی سرورم نه‌دیوه‌ بێ و له‌ په‌لکی گوڵم دا که‌س نیه ‌به‌ په‌نجه‌ی گه‌رمی مه‌حه‌ببه‌ت ئاوڕێ وه جه‌سته‌ی خه‌سته‌ی دڵم دا هێنده‌ ژاکاو و سیسه گوڵی دڵ زۆر سه‌خته‌ تازه‌ گه‌ش ببێته‌وه‌ جا مه‌گه‌ر به‌ فووی مه‌سیحی وه‌سڵت سه‌رله‌نوێ ڕووحی وه‌به‌ربێته‌وه ++++++++++++++++++++++ سەرناو: شیعر سەبارەت: ٧٨/١١/١٨ دۆڵه‌گوێزان شیعرێ به ‌وێنه‌ی بای واده‌ و باران بۆنی ژیانی تازه‌ی لێ‌نه‌یە بۆ ڕاپه‌ڕاندن له‌ خه‌وی غه‌فڵه‌ت نه‌ وه‌ک سێڵاو و بـوومه‌له‌رزه‌یه شیعرێ هه‌ر وه‌کو ئاوێنێکی ڕوون سیمای داهاتووی تێدا نه‌بینی به ‌زوانێکی زۆر شیرین و ڕه‌وان ده‌رسی ڕابردووت تێ‌نه‌گه‌یێنی شیعرێ که‌ تامی شادی نه‌دیبێ به‌ تاڵاوی خه‌م یا نه‌بووبێ ته‌ڕ کوا ئه‌مه‌ شیعره‌ و کام مه‌لی ئیحساس له‌ ئاسمانی‌دا ده‌کا گه‌شت و گه‌ڕ؟ ! ++++++++++++++++++++++ سەرناو: بەهار سەبارەت: ٨٢/١٢/١٣ زه‌نگیاوێ دیسان به‌هاره‌و وه‌ختی سه‌یرانه‌ سه‌رما و به‌فر و خه‌م ڕوو له نه‌مانه‌ کراسی تازه‌و شینیان کرده‌ بەر لکی دار هه‌مووی له‌ کوێستان و ده‌ر ئاوی چۆم زۆر و پڕده‌نگ و هاشه‌ ڕه‌نگی وه‌ک گوڵی سیسه‌خه‌شخاشە ئه‌وه ‌زووخاوی ده‌ردی زستانه‌ وه‌ده‌ری ده‌نێ زه‌وی و زه‌مـانه ده‌نگی بلبل و چریکه‌ی قومری به‌شه‌ر بۆ ده‌بێ ده‌به‌ری نه‌مری؟ ! به‌راستی به‌هار تۆ شای وه‌رزانی له‌ تۆدا کۆیە هه‌موو جوانی ++++++++++++++++++++++ سەرناو: په‌ڕی هه‌ست سەبارەت: ٨٣/٠١/١٣ زه‌نگیاوێ دانیشی له‌ دم چۆمێ ئه‌و به‌ر که‌نداڵ و دار بێ وه‌ک ئاوێنه‌ وێنه‌یان ده‌ناویدا دیار بـێ چه‌ل‌چه‌ل سه‌رت هه‌ڵبڕی بۆ ئاسمانی شین و جوان به‌م جۆره‌ زۆر و ده‌رکه‌ی ده‌رد و سۆمایی چاوان شنه‌ی ده‌نگی مه‌لان بێ بلاوێنێ گه‌ڵای گوێ به نیشتن و فڕینیان په‌ڕی هـه‌ستت ببزوێ هه‌ر له‌ وه‌رزی به‌هاره‌ به‌ بای باڵی په‌پووله‌ په‌ڕی ناسکی هه‌ستت دێته‌ له‌رین و جووڵه‌ ++++++++++++++++++++++ سەرناو: هه‌ر چوار وه‌رزت به‌هار بی سەبارەت: ٩٢/٠٧/١٦ ميراوێ له‌ سه‌ر باڵی په‌پووله‌ خۆشه‌ سه‌یری گوڵان که‌ی وه‌کو بولبول به‌بێ خه‌م تاوێ تام له‌ ژیان کـه‌ی چه‌ن خۆشه‌ی ئه‌و هه‌نگه‌ بی شیله‌ی گوڵان هه‌ڵده‌مژی وه‌کو ئاسکی ڕه‌زاسوک له‌ سه‌ر سنگی ده‌شت بژی ڕاخوشی وه‌کو ڕووبار به‌ناو دڵی خڕ و دۆڵ له‌ گه‌ڵ سروه‌ دابێنی بسکی نه‌رمی گیاوگـۆڵ چله‌ی زستان نه‌بینی بای به‌یانی بتکا سڕ هه‌ر چوار وه‌رزت به‌هار بێ جێگات باخێکی زۆر چڕ ++++++++++++++++++++++ سەرناو: تاکه‌ی وابێ سەبارەت: ٩٢/٠٧/٢١ ميراوێ‌‌ تاکه‌ی وابێ، مه‌هێڵه‌ کانی ژیانم لێڵه‌ با جارێ پڕ له ‌گوڵ بێ زه‌وی دڵم مه‌کێڵە کێوی وره‌م ڕوخاوه‌ وه‌تی دڵت گۆڕاوه‌ دوریت وه‌ک بوله‌رزه‌یە چم له‌ سه‌ر یه‌ک نه‌ماوه‌ بێ‌مه‌یلی تۆیه‌ بۆیه‌ وا شێواو و زه‌بوونم که‌ وه‌ک شه‌ماڵ هه‌ڵیکرد له‌ ناو ده‌ریای ده‌روونم ++++++++++++++++++++++ سەرناو: هه‌روا بووه‌ و هه‌روا ده‌بێ سەبارەت: ٩٤/١١/١٦ پیرانشار کوڕێکن بۆ په‌یدا ده‌بێ له جوانی بێ هه‌وتا ده‌بێ گه‌رچی ڕۆژێ هه‌ر چا ده‌بێ به‌ڵام پێشێ زۆر لا ده‌بێ هه‌روا بووه‌و هه‌روا ده‌بێ به‌یانی هه‌ڵناسێ له خه‌و ئاخر نانوێ تا نیوه‌شه‌و گه‌ر نه‌گرێ له‌و خوویه‌ی جڵه‌و ده‌بێ لێی‌ده‌م قامچی به قه‌و هه‌روا بووه‌و هه‌روا ده‌بێ تا ده‌رسانی پێ‌ده‌خوێنم چه‌نه‌م ده‌چێ هێند بیدوێنم چبکه‌م خودای هه‌موو شوێنم له ته‌مبه‌ڵی بتۆرێنم هه‌روا بووه‌و هه‌روا ده‌بێ هه‌سته کوڕم چاک بخوێنه له‌و ته‌نبه‌ڵیه واز بهێنه به ڕێ‌ون‌بوو ڕێ بنوێنه بۆ گه‌له‌که‌ت شادی بێنه هه‌روا بووه‌و هه‌روا ده‌بێ ئه‌و به‌یانیه شێعره‌کانی عێل به‌گی جافم ده‌خوێنده‌وه سه‌عات ببۆ ده عه‌بدولباسیتی کوڕم هه‌ڵنه‌ده‌ستا به‌م شێعره وه‌خه‌به‌رم هێنا. ++++++++++++++++++++++ سەرناو: با نەمێنێ چەوەندەر سەبارەت: ٩٦/٠٧/١٣ پیرانشار با نەمێنێ چەوەندەر قەندی کارخانەم ناوێ مێوژ و تووم هەبێ بەسە نە چۆم ما، نە کانیاوێ قەندی جاران خورما بوو پێست و چاوی دەکرد گەش نایەڵێ شێرپەنجە بێ وەکوو قەڵایە بۆ لەش ++++++++++++++++++++++