شاعیر: کامەران موکری کتێب: شیعرەکانی کامەران موکری لە ڕۆژنامەکاندا سەرناو: ئەی شارەکەم سلێمانی سەبارەت: ڕۆژنامەی برایی - ١٩٦٨ خونچەی لێوی بزەی ساوا لە دڵۆپی ئەشکی چاوا لە بێخی دڵی ناسکا توایەوە وەک خوێن تکا لە سەر سنگی کچۆڵە و ژن بە خوێن نووسرا: ئەمان کوژن کۆرپە بە دایکا هەڵزنا خەم بە دڵی وەک ئاسنا بەیان کاتی خور هەڵاتن هەڵی کرد ڕەشەبای مردن بە خرمەی ئەستێرەی دۆشکا گەلێ دڵ وەک شووشە شکا سلەیمانی... شاری خەم چێژ ڕاهاتووی کوشتار و دەست ڕێژ سلێمانییەکەی بەرگەر یەکسەر هەمووی بوو بە ئاگر تانک، زرێ پۆش، تۆپی مەزن بانگیان ئەکرد: ئەبێ بمرن دوژمنی ئابڕوو تکاو بڕبڕەی مەردێتی شکاو لە ناو شارا بە بێ وچان تۆوی ترس و مەرگی ئەچان پشکۆی سام و خەم و سزا بە پەنجەی ژینا ئەچزا ماچی خوێناوی دایک و کوڕ لە شەقاما ئەبوو بە گڕ سوپای ساوا و بێ چەک کوشتن قەدەغەی کرد تەرم ناشتن لاشەی کوڕ لە کۆشی دایکا پێلووی سووری پیا ئەلکا ڕۆڵەکانی نورد بانگیان کرد ئەژی ئەو کەسەی ئەمڕۆ مرد کاتێ ئەڕۆن بەرەو سەیوان بانگ کەن: ... بەقوربانتان بم بزەی دەم نەوەکو سام و ترس وخەم با فوارەی خوێناوی گەش باخی کورد بگرێتە باوەش داتک لەگەڵ نەغمەی هەنسک ڕای ئەوەشان دەس و ناسک ئەیوت: ئەی جگەری پارەم ئەبی بە گوڵ ئەم بەهارەم ئەشکت بۆ ئەکەم بە ئاورنگ گڕەی دڵیشم بە گزنگ سلەیمانی.. شاری دڵتەنگ بانگی لێ هەڵسا بە یەک دەنگ وتی: دوژمنی ترسنۆک ڕۆڵەی کورد نایەنە سەر چۆک دوژمنانی ئاوات و ڕەنج بانگیان ئەکرد: ئەی کوڕی گەنج یا بەدەست ڕێژێک یەتکوژین یا بلێ... نەژین بڵێ من کورد نیم.. کوردستان ئەکەم بە گۆڕی مەبەستتان وێران بێ، کاول بێ خاکم من کۆیلەیەکی دڵ پاکم وڵاتم، چیم هەیە دەگمەن با پێشکەش بێ بە ئەهریمەن کیژۆڵەی چاو کەژاڵی جوان هەموو بن بە کەنیزەکتان نا.. هەزار جاربانگ ئەکەم: نا دوژمن نیم بەرامبەر کورد، نا بانگ ئەکەم بە وشەی پەتی بژی، بژی کوردایەتی ها.. ئەوە ڕووم، دڵم، سنگم ئەوە بازووم، ئەوە چنگم پێشکەش بێبە گوللەی دوژمن مل کەج کردن نازانم من من کوردم، ئاگری هەستم گڕ ئەسێنێ بۆ مەبەستم نابم بە کۆیلەی بێگانە کەنیزەک نین ئەو کیژانە لەسەر مشتێ خۆڵی وڵات بێ پەروا گیان ئەکەم خەڵات نا، هەزار جار بانگ ئەکەم نا دوژمن نیم بەرامبەر کورد، نا دوژمنانی خەبات و ڕەنج بانگیان ئەکرد: ئەی کوڕی گەنج! بانگ کە بڵێ: بمرێ مناڵ هەڵوەری گوڵی باخچەی ئاڵ! داڕزی پەنجەی هونەروەر دەک بشکێ ئەژنۆی کورد پەروەر وێران بێ خاکی شارەکەم! بە پایز بێ بەهارەکەم! نا هەزار جار بانگ ئەکەم: نا دوژمن نیم بەرامبەر کورد، نا لە پێناوی ساوای کورد لە ڕێگیی درشت و وردا لە سەر گوڵاڵەی خوێن ڕەنگم جۆگەی خوڕ و گۆمی مەنگم بەردێکی کەژی وڵاتم لەسەر ئامانج و ئاواتم دڵم، ژیانم ئەبەخشم با بێ بە بڵێسە لەشم لە لای ئێمە سزاو مردن پیرۆزە نەک مل کەچ کردن ئەبم بە قوربانی گوڵێ چاوێ، دەمێ، دەستێ، دڵێ لەم خاکە بێ و هی ئەم خاکە گیانم لە مردن بێ باکە چاڵێکیان هەڵکەند فراوان قووڵ وەکوو دەروونی تاوان هەشتا لاوی کوردیان ڕیز کرد لە دڵ بەهێزەکانی کورد ---- برا و هاوڕێ کوڕ و باوک درانە بەر شێلگەی تفەنگ نرانە چاڵەوە بێدەنگ خۆڵیان پیاکردن سەرانسەر تەخت کران بە گرێدەر پێش مردن هەموویان وتیان: ئەمرین بە بێ باک بۆ ژیان برایان! چمکی خەم مەگرن ئێمە ئەمرین، ئێوە خۆش بن ئەی شاری سلەیمانی جوان ماڵئاوا لە تۆ و لوردستان نا، هەزار جار بانگ ئەکەم: نا دوژمن نیم بەرامبەر کورد، نا لە پێلووما ژیان نووسی نابێ بژین بە مەئیووسی وەرن لەسەر دڵ بنووستن کەمال و ئەنوەر و یاستن لەگەڵ کاروانی شەهیدان بوون بە قوربانی کوردستان ئەژین لەم لاپەڕەی ئاڵا لە گوڵاو و لەگەڵ شەماڵا لە مەرگی سەختی دوژمنا لە نرکەی هەڵمەت بردنا نا، هەزار جار بانگ ئەکەم: نا دوژمن نیم بەرامبەر کورد، نا ++++++++++++++++++++++ سەرناو: بووکی سەیوان سەبارەت: ١٩٥٤ - ڕۆژنامەی ژین ژمارە ١٣١١ کچی جوان گەردنی نەرمی وەکو گزنگی هەتاو کەمەری تەنگ، قۆڵی سپی، قژی زەردێکی خاو پەنجەی تا بڵێی ناسک، چاو بە ورشە ورشی کاڵ نزیک چەناگەی ناوەڕاست چاڵی تاقە یەک خاڵ کچی جوان لەش و لاری نەخشی ئەو پەڕی جوانی شەرمی، هەستێکی نیانی هەڵئەدا هەر وەکو کانی هەر زێڕ بوو لە پشتی سەریەوە تاکو کەمەری تەنگ بریسک و هوڕی وەکو سنگی بەهار جلی ڕەنگا و ڕەنگ دڵی بە کوڕێکا چوو بوو هەژار بوو، بێ تەلار پارەی نەبوو، سامانی نەبوو، بێجگە لە دڵی هەژار ئەو لاوە نەی ئەوێرا داوای کچە بکا تا مردن دووریش نەبوو هەر ناوهێنانی بە تەنیا نەبێتە هۆی کوشتن چونکە سروەتی ڕەشی گەڵاو ڕێی لێ تەنی بوو تا ئاسمان ئەو کچە دەوڵەمەند و ئەم هەژار و بێ سامان خۆ ئێستە دڵیش هەر بە پارەیە مامەڵەی پێ ئەکەن یەکێک بچێتە داوای دڵێک ئەڵێن چەند پارە ئەدەن کچە بە زۆر مارە کرا لە پیاوێکی پیری دەوڵەمەند بە سنووق ئاڵتوون و پارەی زۆری هەبوو بە کەمەرەند فرمێسک کە ئەڕژانە سەر گۆنا دڵۆپ دڵۆپ ئەتووت کە هێزی مردنە وادێتە خوارەوە کوت و نت پەنجەی ئەم و ئەو ئارایشی ڕووی کچەیان ئەکرد فرمێسکی لێڵیش ئەیسڕی و، ئەو ڕەنگە ئاڵەی ئەبرد بووک ئارایشی کرا بە سووراوو پشتێن و گەردانە هەنسک و دڵی بە خورپە کەوتەڕێ، هی ئەو کچە جوانە بەو ناڕەوایییە بە زۆر دایان بە شوو بە نابە دڵ سا چۆن نەوەرێت ئاواتی ئەو کچە هەر وەکو گوڵ ئەوەندەی پێ نەچوو هەروا چەند مانگێک نەبێ تاڵ بووک بوو بە بووکی سەیوان و بە میوانی جەرگی چاڵ بەو داخەوە سەری نایەوە بەو دڵەوە بوو بە میوانی گڵ نرخی چیە ئیتر دوای مەرگی ئەو توخوا پارە و خشڵ!! کەس و کاری نەیان ئەزانی بگرین بۆ دڵی یان بۆ گیان بە دەستی خۆیان بوو، دڵیان پلیشانەوە بۆ سامان ئەی بووکی سەیوان، یادت لە گوڵی ئەرخەوانا سوور بۆ مەرگی زۆرداریییە، هەستی من شەپۆل ئەدات بێ سنوور ++++++++++++++++++++++ سەرناو: توانەوەی بەفر سەبارەت: بە یادی نەورۆز - (١٩٥٨) گۆڤاری شەفەق ژمارە ٣ توایەوە بەفری بەستەڵەک ترپەی پێ دێ هی ڕەشبەڵەک لە جاڕی نێرگسا، لە دەشت وەک پەری و فریشتەی بەهەشت کچانی ناڵ و واڵا پۆش هەڵئەپەڕن، گەرم، بەجۆش ڕمبازی شۆڕە سواری شەنگ جۆش زیاتر ئەدا، بە ئاهەنگ ئەم دیمەنە وردانە، جوان تامێک ئەبەخشن بە ژیان تامێک، یادێک، وەک شەماڵ دینێ و ئەیدا، لە ڕووی خەیاڵ بۆیە مەلی، دڵ، ئەفڕێ ڕێی هەزاران ساڵ ئەبڕێ تیری زەهراویی «ئەهریمەن» ئەیسمێ سەر دڵی وەتەن ڕوومەتی بەر قوتیلەی کز ئەلەرزێ وەک گەڵای پایز لەپڕ تیرێکی ئاگرین ئەیدا، لەپەنجەرەی ڕەنگین با، دڵی، ئەسمی، یا، ڕوو سنگی کۆرپەی خوە لێ کەوتوو ڕووی کچ، کە دەر ئەکەوت وەک گوڵ تێی ئەچەقی تیر، وەک چقڵ هەموو ئاوازێکی بە جۆش هەموو گۆرانییەکی خۆش ئەتوانەوە «یەک» ئاوازە «نەخمەی تۆڵە و ژینی تازە» «کاوە» کە هەڵی کرد، ئاڵا گەل لە قەڵای زۆردار ئاڵا ئەو چەکوشەی تاکو «ئەمڕۆ» شانازییە بۆ من و تۆ لەسەری دوژمنا بوو ڕزگاری بوو کوردی زیندوو گۆرانییەکی خۆش داهات ئێستەش باوە لە ناو وڵات ئەی شمشاڵی گەرووی هەستم ڕێکی خە، لەگەڵ هەڵبەستم سەرەتای ئەو گۆرانییە ئەمەیە: «کە پڕ جوانییە» «ژین کە دیلی بێ سەرومڕ ئیتر بۆچی نەبین بەگڕ» تا خوێنمان نەڕژێتە گڵ هەرگیز ناگەشێتەوە گوڵ بەم تێکۆشانە گەلی کورد ئاگرە گەشەی هەڵکرد بەم ڕەنگە نەخمەی پڕ خرۆش هەڵئەسا، لە، دڵەوە، جۆش ئەی هاوڕێی خۆشەویستی من ئەی نەبەردی، مەچەک ئاسن لام وایە، بەهارە، بەتەنیا جەژنی گوڵە، هۆزار، چیا ++++++++++++++++++++++ سەرناو: لای لایەی ئەمڕۆ سەبارەت: ١٩٥٤ - ڕۆژنامەی ژین ژمارە ١٢٠١ کۆرپەی شیرینم بێرە کۆش ڕۆڵەی بە شیر مەست و سەرخۆش بێ، بنۆشە تۆ پڕ بە دەم بادەی ژیانت کۆرپەکەم بێ، نێرگسە جاڕی بەهار بێ، چاوگەشم، بێ، قۆچکە لار بێ، ناو دەمت با هەڵمژم بێ، دەم بە دەم با بیمژم ڕوومەت گوڵی چەناگە گوڵ باڵندەی جوانی لانەی دڵ لەو ڕۆژەوە من مناڵ بووم هەر بەرەو بوونی تۆ ئەچووم بەری دڵم، مایەی ژیان بەخشندەی زەردی سەر دەمان بەندی جگەر خۆشی بەسەر بەنرخ و فەڕ ئەی بێ زەرەر بێ، نووری هەر دوو چاوەکەم بێ، دیدە مەستی نوقڵە دەم ناتدەم بە کەس پیاوی ناکەس بێ هەست و سودو بێ دەربەس بدا بە کوشت بۆ زیوو زەڕ بیت بە خوراکی شوانی شەڕ ئەی کۆتری سپی جوانمئەی لەرەی لەحنی ڕەوانم تۆ دۆستی گشت مناڵانی ڕەش بی و سپی، برایانی دواڕۆژی ڕووناک و خۆشە چاو لە دوژمنت مەپۆشە وریا بە دەستەی سەرمایە نەیشێوێنن ئەم دنیایە نەیکەن بە کڵپەی سووتێنەر تیا بسووتێت ڕۆڵەی بەشەر جوانی مانگی بریسکەدار ڕەنگی گوڵی ناو لالە زار شنەی شەماڵ لەرەی لقان چاوەندازی شیرین و جوان بێ تۆ شێوەی شین و زاران تۆی تریفەی مانگی دەم کەل تۆی ئاواز و جریوەی مەل تۆی ئۆخەی دڵ خۆزگەی بە کوڵ تۆی ڕەنگی گوڵ تۆی بۆنی گوڵ ناتکم بە ئاگری بەتین بسووتێنیت خەرمانی ژین ناتکەم بە نووکی شیر و تیر ناتکەم بە پێوەند و زنجیر هەموو کۆرپەی هەموو کەسان نازدارن بۆ دڵی ئینسان دەست لە خوێناوا سوور نەکەی بۆ شەڕ گێڕان خزمەت نەکەی ئەتکەم بە قوربانی هیوا هیوای گەلی پتەو بڕوا ئەتکەم بە بەردە بازی ڕێ میللەت پێت بەسەرا بنێ بە ئاشتی کۆرپەم ڕۆڵەکەم تا دوا ڕۆژ پەروەردەت ئەکەم ++++++++++++++++++++++ سەرناو: نابەزین سەبارەت: ١٩٥٤ - ڕۆژنامەی ژین ژمارە ١٢٠٥ و ١٢٠٦ بیکەرەوە دەرگای ڕەشی زیندانت دابڕێژە کۆتی قورسی گرانت شوورە بکێشە لە پەنجە و بازوو لە ناو خوێناوا شوورەکەت هەڵچوو با بۆم شەپۆل دات تاریکی مەنگت ئەی زنجیر با بێت، لە پێما دەنگت با بێت قامچی و دار، بەن لە تەختی پشت بە فەن ئەو گۆشتەم، بۆ بکەن بڕشت کوا قامچی کوا دار کوا زڕەی زنجیر کوا خوێن کوا سزا کوا نرکەی ئەسیر؟ سزام دەن، سزا، پڕ ژان و ئازار نابیسن ئاهێک، ناڵەیەک، هاوار دەستان هەڵمگرن چی لە بارتانە درێغینەکەن لەو سزدانە نەفیم کەن بۆ دوور بۆ سەحرای بێ پەی بێ ئاوو سێبەر بێ هەورو هەر دە پەنجەکەی پێم هەڵوەرێنن لە دارکاریما قەت دامەمێنن لە تەختی پشت و ڕوومەتی زەردم بۆم دا بتاشن دوو کێل و بەردم لەسەر تاتە شۆر بە خوێناوی خۆم لێم گەڕێ بێ هەست تا خۆم خۆم ئەشۆم لە پێستی ژێر پێم هی پشتی دەستم کفن هەڵدڕن بە تاوی هەستم *** وازکە دەروازی ڕەشی زیندابت قوڕ برسەر خۆت و خزمەتکارانت بە پشکۆی ئاگر ڕوومەتم بە داخ ونجڕ کەن وێنەی نەقشی سەر بەیاخ سنگم شەقار کەن نەک سنگی بێ خەم لەت و پەتم کەن هێشتا کۆڵ نادەم کۆڵ نادەم ئەبەد هەتاکو مەرگم ئەبم بە قوربانی گەلی بێ بەرگم قامچی کوای لە کوێی پشتی زامدارم پێت ئەڵێ ڕوو ڕەش ناڵێم «بێزارم» مەچەک کەلپچەی بەزان بە جارێ ئەگەر چی خوێنی پیا دێتە خوارێ پێ، پێوەندەکەت دائەڕزێنێ گەردن تەوقەکەت هەر ئەپسێنێ دەلاقەی زامم قەبری ستەمکار جێ داری لێدان فەخرە بۆ هەژار ئێمە دوژمنی دیل و کوڕنووشین زیندانی تارت هەر هەڵئەلووشین باوەڕ بەهێزتر لە دار و ئاسن لە سێدارەتان بە هێزتر گەردن ئەتکەین بە قووربان پێی کڕێشاوی زەنجبەری برسی پەنجە خوێناوی ژیان ببێتە کۆڕی ئاگرین دنیا وەرگەڕێ ئێمە نابەزین لە ناو قەفقەنی زنجیری زۆردار قەڵای دوا ڕۆژین، مردن بۆ زۆردار لە چاوی دایکا دڵۆپێکی سوور لە ناویا شێوەو دیمەنی جەسوور ڕۆژ، دوا ڕۆژ ماچی ئەکا لێوی کەل ئەیکا بە قەقنەس مڵۆزمی گەل ئەو خوێنەی کانیی دڵ هەڵی ئەدا نەخشی ئەکێشێ ئازادی تیادا سەیرکەن ئەوا دڕندەی کۆڵدان وا تاسا لە ژێر پێی قارەمانان وازکە دەروازەی ڕەشی زیندانت دوا ڕۆژ بێ سوودە ناڵە و گریانت ++++++++++++++++++++++ سەرناو: وڵاتی من سەبارەت: ١٩٥٧ - ڕۆژنامەی ژین ژمارە ١٣٤٦ وڵاتی من شیرینە خاکێکی نازەنینە بەهار، دەشتی زەرد و سوور ئەبێت بە کۆمەڵی نوور لە تەلانی باخەوە لەسەر لووتکەی شاخەوە ئاوی ڕوونی ڕەنگاو ڕەنگ ئەیکا بە جۆشی ئاهەنگ هاوین نزاری نازار شاخی هەزار بە هەزار شەوی فێنکی کوێستان دیمەنی بەری بەیان باخی زەرد و سوور و چڕ ئاوی تەزیوی دەنگ گڕ بەفراو ئەڕژێت تک تک بۆ دەمی گوڵی ناسک قاسپەی کەوی بەیانی کە، لەرەی دێت بە جوانی ئاواز هەڵئەسێ گەش گەش بەرەو شەخڵێکی ڕەش شەماڵی دوای نیوە شەو کاتێک چاو ئەچێتە خەو باوەشێنی ئارامە چپەو نەغمەی بەتامە کە بەیانیان گوڵی بووک نەشمیلانە و ئێسک سووک کراس دائەماڵی سەوز مەل ئەکەوێتە وەنەوز ++++++++++++++++++++++ سەرناو: گلۆر بوونەوە سەبارەت: ١٩٥٨ - گۆڤاری هیوا ژمارە ٢ ساڵی دووەم لە مەچەک بازووی وەک ئاسن لە گلێنەو دەسی خرپن کۆشکی هەستان نهۆم نهۆم ئەیووت وڵات هی خۆمە خۆم لە قژی دەسکەنە کراو لە دەماری لاوی کوژراو هێلانەیەکی چنیبوو ئەیووت ئەت وڵتی مردوو ------- منم شوێنم خۆش و بەرزە بە ڕوومەتی ناسکۆڵە و سوور بە دەم و پەنجەی وەک بلوور نەخشانبووی کۆشک و تەلار قاسەی سیخناخ بوو لە ملیار ئەیووت منم خواندێکم بەیەک ئان سێ گیان ئەپێکم لە یەک کاتا هەزاران جێ بە فرمانم وێران ئەبێ منم دەسداری خوێن مژێ کەس ناتوانێ من بکوژێ کەچی کاتێ ڕەشەبای قین گێژی دا لوورە لوور بە تین هێلانەکەی تووڕە دایە ناو گۆمی قووڵی سووری خوێناو ئێسقانی لاشەی لە شارێ وەکو زیخ کەوتۆتە ژێرپێ ++++++++++++++++++++++ سەرناو: لەدایک بوونی ئینسانێک سەبارەت: ١٩٥٤ - ڕۆژنامەی ژین ژمارە ١٢١٥ لاپەڕەی ٢ شەو تریفەی مانگ لوورەی تیژ هاژەی ئاو خوڕەی چەم دێی بێدەنگ لە دۆڵێکی کپی متدا لانکەی برسی ڕووت پێسی بەسەر ئێسکدا لکاو شیتاڵی چڵکن دەستی پۆخڵ پێی کڕێشاوی پشتی بە دار جەزرەبەدراو چاوی فرمێسکاوی دێی بێدەنگ گۆزەت بەتاڵ خپلەی کرواوی *** زنجێکی تاریکدەنگێکی تازە گیانێکی تازە دێتە ژیانەوە بانگێکی تازە ئەدا لە پەردەی بوون مناڵێک وا بێ مامان لە ژنە جوتیارێک بوو چاوی سەرسام سەرنجی ئەو پارچە گۆشتە ئەدەن چۆن ئەژی؟ چۆن ئەمرێ؟ بە کۆتەوە یان ئازاد؟ هەر وەک ئەمان یان باشتر؟ خۆیان ئەزانن من ئەزانم بێ گومان بە ئازادی ئەژی تریفەی مانگ ژیانی تازە ++++++++++++++++++++++ سەرناو: کۆتری ئاشتی سەبارەت: ١٩٥٤ - ڕۆژنامەی ژین ژمارە ١٢١٠ - ١٢١١ بەیانییە تۆ بخوێنە ئەی کۆتری سپیی نەشمیل قاچ ئاڵتوونت نەرمی خنجیل تۆ نخوێنە بەیانییە کاتی خۆش و گۆرانیە لە خەو هەموو ڕاپەڕینە ئاواتمان ئاوەدانیە بەیانییە *** لە سەر سنگی دایکی هەژارساوا، مناڵ چاو ڕەش و، کاڵ نازدار، نازدار بزێو، بزێو زەردە بە لێو خەبەردار کە بەیانییە *** تپ بخوێنەبۆ پیر و جوان بۆ پاڵە و ڕەنجبەر و بۆ شوان بانگی ئاشتی بۆ ئاوەدان بەو جوانیە *** با بێتە دەربۆ گشت بەشەر بۆ ئازادی و حەقی ئینسان مناڵ با بێنە هەڵپەڕین بە ئاوازی ئاشتی شیرین بتنێنە سەر دەسی خرپن بانگ کەن ژیان نەوەک مردن کاتی خۆشی و گۆرانیە تۆ بخوێنە بەیانیە *** بانگ دەبڵێ! «تف بێت لە شەڕ «تف لە چارەی شیڕگێڕی گەڕ «تف لە پارەو زێڕێ گڵاو «تف لە ئیستعماری بەد ناو نامەوێ حەق ژێر کەوێ بڵێن، ڕۆژی گرانییە هیوای ئێمە هەرزانییە ئازادی و کامەرانیە تۆ بخوێنە بەیانییە کاتی خۆشی و گۆرانیە *** ئەی کۆترم ئەی مژدەبەرتاجی ئاشتیت ناوەتە سەر ئەم پەنجانە ئەم گەلانە پەرژینە بۆ ئاشتی بەشەر بابێت سۆزی ئاشتیانە لەو چەمانە لەو کەژانە بۆ خۆشی و شادمانییە بەیانییە کاتی خۆشی و گۆرانیە *** تۆ بخوێنەبا بێنەدەر شوان و سەپان کاکەی ڕەنجبەر داس لەسەر شان ژنان و پیاو قۆڵ هەڵکراو لەشکرێکی ئینسانییە بۆ ئازادی قوربانییە بەیانییە بەیانییە کاتی خۆشی و گۆرانیییە *** شەبەق ڕەنگی وەک ئەرخەوانڕووناک و دڵ فڕین و جوان لوتکە و نزار بە لالەزار ڕازاو و جوان و نەخشاون گوڵاڵەن بە شەونم پاراون ڕۆژێکی شادمانییە ژێرکەوتن بۆ شەڕانییە گەلان یەکن جیا جیا نیە تۆ بخوێنە بەیانییە کاتی خۆشی و گۆرانیە *** تۆ بخوێنە بۆ زەرد و سووربۆ میللەتان نزیک و دوور بۆ کاکەی ڕەش دڵ پاک و گەش بۆ سپی و ڕەش لەگەڵ یەکا کە بانگی ئازادی ئەدا بۆ ئاوەدانیی سەر زەوی سەر ئەکەوی سەر ئەکەوی ئەی کۆترم بەو جوانییە تۆ بخوێنە بەیانییە *** ئەوانەی کۆشکیان سەد قاتەبادەیان خوێناوی لاتە بۆ ئاخنینی قاسەیان ئەیانەوێ گەل ژێرکەوێ کڵپەی شەڕێک هەموو جیهان بسووتێنێ تا ئەو، زێڕی لێ دەرهێنێ باکی نیە ئەو وەحشیە خوای شەڕ فرۆش بە خوێن سەر خۆش لەوەی ئەگەر کەس نەمێنێ شەڕانییە *** سەرمایەداربازرگانی چەک و خوێناو باکی نیە دنیا بە خوێن بێتە لافاو پارەی ئەوێ قەسری ئەوێ ئەو شەڕچییە بەڵام... قەڵای هەر ئەنەوێ سبەینێ تەختی ئەکەوێ ئەو کەسەی بڵێ وانیە یان لەوانە نۆکەرانە وەیان باوەڕی زۆر کزە دوور لە زانین و لە مزە تۆ بخوێنە بۆ سەرکەوتن ئەی کۆتری جوانی گۆشتن بە بێگومان هێزی ئینسان سەرکەتووە شەڕ تیا چووە ئەو کەسەی بڵێ وانیە نادانییە نادانییە تۆ بخوێنە بەیانییە بەیانییە کاتی خۆشی و گۆرانیە ++++++++++++++++++++++ سەرناو: کە مردم سەبارەت: ١٩٥٤ - ڕۆژنامەی ژین ژمارە ١٢١٦ لاپەڕەی ٢ من ئەمرم نایەڵم کەس بمنێژێت دوا سەرنجم ئاو ئەدەم بە بریسکەی ڕم بە ترووسکەی ئاوات بە هێرشی سەرکەوتن *** دوا هەست و تاسەم هەڵئەکێشم لە گیانە: دەنگی سرودی ئازادی نرکەی تۆڵە چریکەی دیلی ئازاد بوو زڕەی زنجیری شکاو گرمەی زیندانی ڕماو هاژەی جۆگەی خوێناو *** ئەمرم نایەڵم کەس بمنێژێتئەمرم لەگەڵ ئاوازی: تەپڵدا ترپەی پێی سوارەدا هاواری هەڵمەتدا شریخە شریخەی گوللەدا کاتێک کە زۆردارە بەرازەکان دوا ئاخی مەرگی سەرشۆڕێ هەڵئەکێشن *** کە مردم مەمنێژنبا لاشەم بێتە پێشێلی لەشکەری سەرکەوتوو هێزی برسی و هەژار سوپای بۆ ئازادی تینوو چەند بەرزیە مەرگی پیرۆز ++++++++++++++++++++++