شاعیر: کامەران موکری
کتێب: زەبری ھۆنراوە
سەرناو: سروودێ
سەبارەت: ١٩٥٧

ئەستێرەیەک بووم پەردەی شەوەزەنگ
بە ورشە ورشی گەشم ئەپووا


تۆوی گوڵاڵەی پێ دەشتی بێدەنگ
لە خۆشت شەوقی ڕووی من ئەڕووا

***

ئێوارە وەختە، لە دەمی کەڵا
کاتێ ڕووناکیم ئەڕشتە کانی


لەگەڵ فڕین و جریوەی مەلا
جریوەم ئەهات بە شادمانی

***

کشام وەک تیری زیوین زۆر بە تاو
سەرەو خوار هاتم بەرەو ئاوی زیو


وەک مەلێکی گڕتێبەردراو
کەوتمە دوای دەوەنی ناو شیو

***

چەشتم ناسۆر و سزایەک بەتین
جەستەم بە خەم و مەینەت داڕزا


تا پشکۆی دەروون، پشکۆی نەبەزین
گڕی لە دار و لە دەوەن بەردا

***

دوای ئەم سزایە ئینجا بووم بە مانگ
تریفەم دنیای ڕۆشن کردەوە


دەمەو ئێوارە نزیک کاتی بانگ
وترا کۆڵنەدان جێی خۆی گرتەوە

***

ئەم بەستە خۆشەی هەستم بۆی وەتەن
گۆرانیی گەرمی کوڕە شوانێ بوو


ئەو شوانەش دوایی هات وتی بە من
ئەمە سروودی قارەمانێ بوو

***

ژین ئاگرێ بێ و کڵپە بسێنێ
لە بەفری دیلی ئێجگار خۆشترە


دەنگێ بۆ شادیی گەل بنرکێنێ
لە دەنگی زەلیل زۆر بە جۆشترە

++++++++++++++++++++++