شاعیر: کامەران موکری کتێب: دیاری سەرناو: ئەستێرە و مەل و خەزان ئەو گوڵەی، خەزان، وەرانی و نەمرد ئەو دڵەی، ناسۆر، لە هیوای نەکرد ئەو پڕیشکانەی، دامردنەوە بەڵام هەمیسان، گریان گرتەوە ئەو ئەستێرەیەی کشا، بۆ ناو چەم لەسەرە مەرگا، خەندەی لەسەر دەم ئەو مەلەی، بای وەشت، باڵی هەڵوەران لە بەستە وتن، نەکەوت لە ئاسمان وان، لەناو دڵی، منا میوانن چەنکە نموونەی قەت کۆڵنەدانن ++++++++++++++++++++++ سەرناو: بووکی لادێ چاوی، کاڵیان، ئەڕشت بە کل بۆیان پێچا، سەرپێچی زل ملوانکەی دەنک گەورەی زەرد نیشتە سەر، سنگێکی بێگەرد کراسیان پۆشی، شین، تەنک خەنە، نەخشی، پەنجەی ناسک پانی بەرزەکەی ڕەنگاوڕەنگ هەیاسە، بۆ کەمەری تەنگ بووک، ڕازایەوە، ڕەنگ سەد جۆر وەک باخی بەهاری بەر خۆر کەوای سورمەی خواستەمەنی پۆشی ئەندامی بەدەنی دەسماڵی، پووڵەکەچن، ئاڵ ئاڵا، لە درزی سینەی کاڵ سوخمەی، گووروونی گۆڵ ڕەش سنگی کفی گرتە باوەش! ڕەشبەڵەکیان، ڕێکخست، گەرم هەڵپەڕکێ چەپی بوو... نەرم پەنجەی نەرم و شل و نازدار ئاڵا لە دەست و پەنجەی یار تک تک ئارەقی ڕووی وەک گوڵ ئەیگرت بۆنی مێخەک، سمڵ زاواش، کەڵەگەت، شۆخ و شەنگ ناوشانی پان، سەرنجی مەنگ سەریان قۆچکەتاش کرد... جوان جوان دایدابۆوە، فەقیان پان سمێڵی قیت... قەترانی ڕەش ڕوومەتی پان و چاوی گەش بووک، خرایە، ڕێ، بۆ جووتیار لەم زنجەوە، بۆ ئەو دەوار ئاغاش، بە فیز، دێت و دەچێ ورد، ورد نەرم هەنگاو ئەنێ هەروا دوای دوو سێ مانگی تر بەربوو لە گیانی بەگ ئاگر پیلان، تاڵ تاڵ چنییان بۆی زۆر ڕێگە و شوێنی دانا خۆی ناردی بە شوێن زاوای شەنگا لە تاریکی شەوەزەنگا ناردی، بۆ فرمانێک، بێدەنگ ناردیشیە، سەر ڕێگای.. تفەنگ لە نیوەشەودا، کوتوپڕ دەستڕێژێکیان لێ کرد لەپڕ کوشتیان... ئاغاش فرمێسکی ڕشت!! بمزانیایە کێ بوو... ئەمکوشت!! کێ بوو کوشتی جووتیاری من وا دیارە وێڵە بۆ مردن!! دوای فرمێسکی درۆ، ڕشتن بەڵێنی «تاوانبار» کوشتن ژنی جووتیاری مارە کرد خونچەی «تازە پشکوتوی» برد! ++++++++++++++++++++++ سەرناو: بۆ شاژنە جوانەکە شاژنە شۆخ و شەنگەکە دڵدارە جوانە مەنگەکە مەلی، پەڕ و باڵ، هەڵوەریو ئەی غەمگینی ئاوات بەزیو ئەی وەک پرشنگی خۆرەتاو، پەرچەمی زەردی نەرم و خاو چاوی گەش، لێوی تەڕ، گۆنا یا ڕنگی کاڵ، لە گەردنا نموونەی جوانین، گەش و جوان بۆ سیس بن، کز بن، بە گریان؟ ! نامەکەت گەیشت، تەڕوبڕ بە هەناسەی گەرمی، وەک گڕ وشکم کردەوە، ئەی دڵدار خوێنمەوە، هەنسک و، جەخار لە هێلانەی عەشقی دڵا کە تاسەی گەرمم ئەکوڵا نەمدی زیاتر، لە وێنەی تۆ ڕوومەتی گەش، چاو و برۆ پەردەیەکی زەردی ماتەم هەر وەکوو توێژاڵێک لە تەم کشا بوو، بە سەر ڕووی گەشا نائومێدیی لە باوەشا من تۆم، خۆش ئەوێ ئەی پەری بەڵام ئاخ، ژنی جوان مەگری باڵای تۆ، گەردنی نەرم سەرنجی ورد، تاسەی گەرم لار و لەنجەت، زەردەخەنەن لەرینی ئەو ژێرگەردنە جوانن، بەڵام ئاخ ژنی لاو لە پاش چی!! ئەی ئەگریجە خاو تازە بوویت، بە مەلی قەفەس بۆچیمە نامە... ئیتر بەس نامەوێ من، تۆ لەو کوڕە داگیر کەم دڵی زۆر پڕە لە خۆشەویستی تۆی شیرین لە دڵسۆزی – ئەی نازەنین – ئەی گوڵی باخی بێگانە بەسە ئەم ئاخ و گریانە نامەوێ لەمەودوا هەرگیز بگریم وەک هەورەکەی پاییز ++++++++++++++++++++++ سەرناو: بەفر بەفر، وەکوو فریشتەی بووک دێتە خوارێ، ورد، ئێسک سووک تەلاری بووکێنی ئاسمان جێ دێڵێ بەرەو باخی جوان مراوی، لە ترسی سەهۆڵ بەجێ دێڵێ جۆگەلەی دۆڵ لە دوور، قاسپەی کەوی تەنیا زریکەی مەلی ناو چیا «ئەی کلووی بەفرە جوانەکە» «وەرە، بۆ بەر، هەیوانەکە» بە تیشکی چرا و مانگەشەو زەرد، بە، وەکوو گەردنی ئەو خۆزگە لەم ژوورە تەنگەدا لەم گەنجینە بێ دەنگەدا لە تەکما، ئەبوو، نازەنین بزەی نازدار نیگای شیرین زیڕەی سەماوەرێکی زەرد بریسکەی ڕوومەتی بێگەرد مناڵێکم هەبوایە... گوڵ چۆنە... ئاوا بوایە بۆ دڵ ڕووم ئەکردە ژنی نازدار ئێوارە وەختەی پرشنگدار ئەموت گۆشتەکە، دەمەو بانگ دانێ لەبەر تریفەی مانگ «ئەی بەفری پڕ لە شنە شن» «جارێ مەیە... سەرمامە، من!» ++++++++++++++++++++++ سەرناو: جارانم جاران، دڵم بە مەئیووسی دێڕی خەفەتی ئەنووسی تەرمی زەوقم سست ئەگەڕا کڵپەی پەژارەم ئەگەڕا جاران، هەستم تەماوی بوو هەرچیم ئەوت خەماوی بوو لە دەشتی ناسۆریما، هەر ئەگەڕام وێڵ و دەربەدەر ئەموت ئاخ، بۆ شارەزایە زاممی ساڕێژ بکردایە نە گوڵ، بەو ڕەنگە جوانەوە نە چڵ، بەو چرۆیانەوە نە مۆسیقای شەماڵ، هاوین نە هاژەی ئاوی کەف زیوین نە جریوەی مەلی سەرچڵ نە غەمزەی کچی، ڕوومەت گوڵ ساڕێژیان نەکرد زامی من برینی جەرگێکی کون کون تا پەنجەی تۆ، پەنجەی نەرم ساڕێژی کرد، زامی گەرم تۆ ئەڵێم خوای خۆشەویستی کە سەرچاوەی شادی و هەستی ئەی خۆشەویستیی نیشتمان تۆ بووی منت کرد شادمان ئەی گیانەکەم کە تۆم ناسی ئیتر نەژیام، بە کەساسی ++++++++++++++++++++++ سەرناو: جوانیی بەهار توێژاڵی بەفری غەمگینی سەر کەل ئەڕژێتە ناو چەم، وەکوو پەڕی مەل وێنەی بێهێزی جێماو لە کاروان لە خاڵ خاڵ ئەڕژێت شەپۆلی گریان کە دێن لەسەردا بۆ کۆڕی مردن گورجن، لە ترسی هوزاری جرپن بەفر ئەڕژێتە گۆڕستانی شاخ ناویرێ هەرگیز بکا ئاخ و داخ ئاوی قەڵبەزەی سپی و ڕەنگا و ڕەنگ لە گەرووی کەژا، ئەیکا بە ئاهەنگ وەختێکە تاڤگە دێتە پێکەنین مەلانی بزێو دێنە هەڵپەڕین بووکی بەهاری جوانی ڕازاوە لە کوردستانا خەیمەی هەڵداوە ورشەی پەڕەی گوڵ، وەک ورشەی نیگا بولبولی عاشق بۆی ئەبێ شەیدا لەسەر لووتەکەی شاخ تاجی زەردەپەڕ پرشنگ ئەهاوێ بۆ ناو ئاوی کەڕ لەسەر کەناری چەمی پڕ نەغمە ئەو خونچە سوورەی ناسک و نەرمە بەرگی داماڵی سەوزی ئاودامان خۆی شت بە قەترەی بەفراوی کوێستان وردە شەپۆلی جۆگەلەی بڵاو ختووکەی بەردە لە کەناری ئاو! گول کاسەی بادە، شەونم بۆتە مەی مەل مەست و سەرخۆش دەمی پڕ ئۆخەی وەکوو فریشتە گوڵی هەڵوەریو لەسەر سنگی ئاو، جۆگەی وەکوو زیو ئەڕۆن بەرەو خوار بە پشتە مەلە ئەپژێتە دەمیان تیشکی ئەو کەلە گەڵا پان ئەکا بە جۆلانە: مەل گوژمە گوژمێتی لەم پەل بۆ ئەو پەل! یا گەڵا مێوێک ئەکا بە لانکە شەونم لەسەر گوڵ وەکوو ملوانکە تەپاوتل لەپڕ بەردێک بۆ ناو دڵ دێتە خوارەوە تا ئەبێت بە خۆڵ وەک ئەویش شەیدای گوڵێک بێ وەک لێو ئارەزوومەند بێ بۆ باخی نشێو شەخەڵ هەر جارە جۆرە ڕنگێکە ئاوازی گەرووی چەشنە دەنگێکە لە هەر جووڵەیەک دەنگێک ئاوازێ لە هەر وەشەیەک یا ڕاز یا نازێ چەند جوانە گوڵی قەیفە بۆ سوخمە نێرگسی نازدار بکەی بە دوگمە! لە تەم دەسماڵی سپی زۆر تەنک شەوبۆ، پوولەکەی جوان، دەنک دەنک کیژۆڵەی نازدار ئەم دەشت و چەمە لار و لەنجەی تۆ، بزەی تۆی کەمە ورشەی کراست کە بێ لەم دەشتە ئەوسا کە ئەڵێم باخی بەهەشتە! ئێوارە وەختە زەردە پەڕی ئاڵ زەماوەندی خۆش دێنێتە خەیاڵ کە شەو دێت ئاسمان ئەستێرەی جوانی بە مشت ئەکاتە ناو دەمی کانی گوڵ، پرشنگ، جۆگە، وەنەوشەی نازدار هەموو دڵداران بۆ ژینی بەهار ئەستێرە دەمی نایە سەر گۆنا تک تک ئارەقی ئاورنگی ڕژا! لە تاڵ تاڵی گوڵ تەلی کەمانە شەماڵ شمشاڵی ناو ئەو چەمانە بەڵام ئاخ دڕکە ئەم سات و وەختە لەناو بەهارا تیژ و خۆشبەختە! ++++++++++++++++++++++ سەرناو: دڵی تەنیا دڵی پێخەفی... تەنیا بۆ دووری من ئەگریا کە کردیانە پێم ئاسن پێی نەچەمێوە، گەردن تەزوویەکم، پیا ئەهات وەکوو، شەماڵی ئاوات کەشتی ئاوات، ڕەنگ ئاڵتوون لەناو ڕووباری دەروون پەردەی سپی کردەوە ئاڵاکەی هەڵکردەوە کە پێوەند، زڕەی هەستا چرای تۆڵەم، هەڵکرا مانگ، دەمی ماچ کردم... گەش هات و من، گرتمە باوەش شەماڵ بە بەستەی شیرین دەریا شەپۆلی ڕەنگین سروودیان ئەوت بۆ دڵ گەشامەوە، وەکوو گوڵ ++++++++++++++++++++++ سەرناو: دیاری گریانی زۆر، هەناسەی سارد، ئەشکی خوڕ خورپەی بزێو، نائومێدی کوتوپڕ لاڵانەوەی دڵی هەژار، هەناسە خەمی دەروون، تینی ئاگری تاسە ئەمانەیەو لەمان، قووڵتر، کە هەستێ وەکوو گڕێک، لە دەروون، یان لە هەستێ دیاریی دڵدار، بۆ یارە نازدارەکەی یا، ڕازی گیان، هی گیانە بێزارەکەی بەڵام وا من، کچی شۆخ، ئەی جوان و مەنگ دیاریی خۆمت، بۆ ئەنێرم، ڕەنگا و ڕەنگ نە ئازارە، نە فرمێسکی دڵ و چاو نە سوێی برین، نە هەڵڕشتنی زووخاو دیارێکەی من، وردە، شیرین و تازە گەرم و گوڕە، وەک شەپۆلی ئاوازە نەختێ ورشەی ئێوارانی، خۆرەتاو بەسەر پەڕەی گوڵێکی ئاڵا پژاو ئەو پرشنگە، وەکوو ورشەی نیگای کاڵ لەسەر، ڕووی تۆ... ڕوومەتێک ناسک و ئاڵ لەو کانییەی، ڕەنگی بەشیو، وەک زیوە دڵۆپ دڵۆپ، لەو شەپۆلەی تەزیوە وەک شەونمی ئەو دوو لێوە، ناسکە کە پڕیەتی لە تاسە و لە ترووسکە هەروا، نەختێک، لە زەردەخەنەی شیرین هی دەمی گەش، یان کەلی ئاسمانی شین لەم دیاریانە، لای من، کە ڕەنگینتر بێ یا، لەمانە، جوانتر، نازەنینتر بێ بە ڵێنێکە، کە شیرازەی ژیانی من و تۆیە... هۆنیمەوە بە جوانی سەرنجی ورد، قوڵپی ئەو ژێر گەردنە بەژنێکی ڕێک... ئەو چەناکە خرپنە چپەی نەرمت، لەرەی دەنگت لە گەروو دڵیان پڕ کرد... لە تاسە و لە ئارەزوو ئاوازەیەک.. یان، لەرەیەک لە دەنگێ یا ورشەیەک، لە گۆنای شۆخ و شەنگێ تەلی هەستیان وەک تۆ نە لەرزانوە پەریی عەشقیان، لە خەو هەڵنەسانوە ++++++++++++++++++++++ سەرناو: زەردەخەنە لەناو، باخی دڵی گەرما لە ئاسۆی دەروونی نەرما بووی بە فریشتەی نازەنین گۆڵاڵە سوورەی گەش، شیرین لە کۆشی خەیاڵما هەرگیز ئاوات بووی، ئەی کچی ئازیز لە ئاسمانی یادما بە شەو ئەبووی بە تریفەی مانگە شەو لەگەڵ شەماڵی، پێدەشتا یا، بای بزێو، لەگەڵ وەشتا دڵی من ئەفڕی، دۆڵا و دۆڵ ئەیبڕی، شەخەڵ، دەشتی چۆڵ بۆ ناو باخی دڵداری گەش تا ئارام بگرێتە باوەش هەنسکی چاوەنواڕیمت ڕازی وردی دڵداریمت کرد، بە بەستە، بە ئاوازە بە نەغمەی شیرین و تازە لانکەت لە دڵما دانابوو کەچی، لە پڕ، ڕۆژانی زوو ئاو، بەسەر چوو، وەکوو خەو ڕۆژی دڵداریت کرد بە شەو دەک شەرمەزار بی، شۆخ و شەنگ لە پڕ، لە ناکاو، بە بێ دەنگ! گوڵی هیوام، کاتێ وەری لە جیاتی ئەوەی، بۆی بگری لەسەر، ڕووی، ئەو گوڵە نەرمە کردت بە ئاهەنگ، بە نەغمە شەرمەزار بی، هی دڵت، دڵ ڕۆژانی، ڕابردووی بە کوڵ بەڵێنی جاران.. کەنیشکە دەک هەر خەم، بۆت بێ بە بێشکە ئەرێ بۆ، وازت لێ هێنام؟ ! ئەی کچی جوان، کچی نەفام! تەلار؟ یا پارە؟ بڵێم زەڕ؟ زڕەی گوێچکەی تۆ بکا کەڕ ناو؟ .. کام ناو؟ ! هی دەوڵەمەندی بەڵێ، بەمانەوە... بەندی نەمناسی بووی؟ ! ببوورە لێم لۆمەت ناکەم، ڕووت لێنانێم ببوڕە! نەمزانی سامان بۆتە هیوای تۆ... کچی جوان ناوت نایەنم... تۆ، وەک گوڵ ئەورێیتە ناو خاک و گڵ ناگریم..! تۆ بگری، بەسزمان پەنا، بەرە، بەر ئەشک و ژان ئەوسا لەسەر پارەی مردوو بگری، خۆزگەت بە ڕابوردوو بڵێ خۆزگەم بەو دڵەی زوو بەو ژیانەی لە کیسم چوو زەردەخەنەکەت، بێ گومان ئەڕژێتە ناو خوڕی گریان ئەتوێتەوە، ناو ئەشکی سوور نامبینیت مەگەر، هەر، لە دوور نایبیستی نەغمەی ڕازەکەم بەستەی شیرین ئاوازەکەم برۆ بۆ ژووری ئاوێنە وەک تیمسالێک خۆت بنوێنە تیمسالی مەڕمەڕی بێ گیان ئەی قوربانیی ساردی ژیان منیش وەک پەپوولەی پاییز ئەگەڕێم بۆ خونچەی ئازیز بۆ دڵێک، من، نەوەک ئاڵتوون بگرێتە دڵ، ناخی دەروون ++++++++++++++++++++++ سەرناو: فریشتە ڕوومەتی وەک گوڵی بێگەرد قژی خاو، ئاوریشمێکی زەرد چاوی کاڵ، ئەگەر چی نەرمە بەڵام نیگای ئێجگار گەرمە باڵای وا، دەمێکی وا تەنگ ئەندامی ئاوا شۆخ و شەنگ نەبووە، ... یا من نەمدیوە هەر لەو چەشنە بەژن، یا کەمەر لەو ڕەنگە کوڵمی گەش و ئاڵ لاملێکی وا جوان و کاڵ جوانێکە تاک، وەک فریشتە ئاخ وەسفی من، زۆر درشتە کوا شیعرێک ورد، خۆش و گەرم وەک ئەندامی لەشی... نەرم کە شین ئەپۆشێ وەک ساماڵ وەک مانگە، لە ئاسۆی خەیاڵ من هەر ئەوەندەم لە دەس دێ کە دێت وەک کەو، تێپەڕ ئەبێ پێشکەشی کەم، یەک هەناسە پڕ، لە پەرستن، لە تاسە ++++++++++++++++++++++ سەرناو: قورتوبە سەبارەت: ئەمە نموونەیەکە لە هۆنراوەکانی «لۆرکا»ی بوێژی شەهیدی ئیسپانیا... شاری «قورتوبە» تەنیایە ئەڵێی لەو پەڕی دنیایە ئەو شارە کۆمەڵە نوورە تا بڵێی لە ئێمە دوورە ئەسپێکی ڕەش، مانگێکی ڕوون هەگبەکەم و، نەختێ زەیتوون ئەگەرچی، شارەزای ڕێگەم بەڵام، بێگومانە... ناگەم ئەڕۆم، بە سەر سنگی دەشتا بە ناو جەرگی، باکەی وەشتا ئەسپێکی ڕەش، مانگێکی سوور شاری نازدارم... وا لە دوور *** لە کۆشکەکانی... شارەوە لە بەرزی و لە تەلارەوە مەرگە، لێم مۆڕ ئەبێتەوە ڕێگەم.. هەر نابڕێتەوە *** ئای ئەسپەکەم چەند ئازایە چەند بێترسە، چەند خێرایە بەڵام ئاخ قورتوبەی شیرین مردن وا تاو ئەدا بەتین پێش ئەوەی بگەمە ناوشار ئەگاتە سەرم بە هاوار «قورتوبە» دوورە تەنیایە ئەڵێی لەو پەڕی دنیایە ++++++++++++++++++++++ سەرناو: لافاو ئەی فرمێسکی لێڵ بلەرزە لە عەزرەت باران و تەرزە دیسان هەستی هۆنراوەی دڵ وەکوو مەنجەڵ هاتۆتە کوڵ ئەمجارە دڵۆپی ئەسرین ئەکەوێتە هەڵبەست چنین ئێوارە بوو پرشنگی خۆر دوور کەوتەوە لە شار بە زۆر هەوری پاییزی ڕەش و زەرد چین چین ئەنیشتە سەر ڕووی هەرد گوێژە گریا، گریا بەخوڕ لافاو هەستا بەتین و گوڕ ئاسمان بەرگێکی پۆشی ڕەش مەرگ ناوشاری گرتە باوەش خوێناوی شاخی مات، تەزیو خانووی ڕائەدا بۆ ناو شیو بێشکەی مناڵی ئێسک سووک بوو بوو بە گۆڕێکی پچووک وەکوو بەلەم لەسەر ڕووی ئاو ئەڕۆی بەرەو نەمان، بەتاو پرچی سپی دەسک دەسک لەگەڵ گۆنا و دەمی ناسک ئەڕژانە ناو جادە و کۆڵان داه و دیوار، بەرد ئەگریان دایک ئەیزیڕان بۆ مناڵ مناڵیش «پارچە گۆشتی کاڵ» ئەکەوتە ژێر دار و پەردوو شین بوو «هەموو» نەک کاس مردوو لەمەشا تۆ تیاچووی هەژار؟ ئاخ لە خەشی هەور و زۆردار!! خانووی گڵی کۆڵانی تەنگ ئەکەوتە ناو گۆماوی تەنگ کە پەنگی ئەخواردەوە ئاو ئەیزریکان سوپای لافاو ئەینەڕان بەسەر شارا شار، ئەکەوتە قریشکە و هاوار لاوێک، تا دوێنێ بوو، دڵخۆش پەریی هیوای گرتبووە کۆش خۆی دانابوو، بڕوا بۆ دوور «بۆ خوێندن» بەڵام ئاوی سوور لەگەڵ دایکیا دەست لە گەردن هەڵی لووشین ئاوی مردن «کامل»: ئەی کوڕە شەنگەکە «کامل»: لاوە بێدەنگەکە چۆن؟ ! تۆ ئێستە چوویتە ژێر گڵ دەک کوێر بن «پاییزیش و گوڵ» ئەو گەنجە، ئەو کوڕە جوانە ئێستە لە سەیوان میوانە ئاخ ئەیویست سبەینێ بەیان بڕوا بۆ خوێندن لاوی جوان چاوەڕێ بوو، دواڕۆژی گەش کامل گیان بگرێتە باوەش دڵنیا، چاوەڕێ بوو لاو بڕوا بۆ خوێندن ئاخ لافاو! لەپڕ ورووژمی برد بۆ ژوور مرد، ئاواتی گەش «بێ سنوور». مرد، دڵێک و گیانێک، دەروون دواڕۆژێکی شیرین و ڕوون ئێوارە بوو، پرشنگی خۆر هەور دایئەپۆشی بە زۆر لاوێکی بەسزمان هەژار کەوتە بانگکردن و هاوار بەڵام چی!! دوای یەک هەناسە ئەو بەسزمانە کەساسە چووە سەر لاشەی دوو مناڵ گریا بۆ ژینی ڕەش و تاڵ لاشەی مناڵانی هەر دوو دەرهێنا لە دار و پەردوو مرد، زەردەخەنە و چاوی جوان مەد، دوو ڤمناڵی بەسزمان ئێوارە بوو لێشاوی سوور هەر لاشەی ئەهێنا لە دوور دەمێک سەرێک و پرچی زەرد تاوێک دەس و پەنجەی بێگەرد یان لەپڕ پیرێکی بێهێز «ئختیاری ئەکرد لێی گورێز» پەلاماری ئەدا بۆ گۆشت «گۆشتی مناڵ خۆشی ئەڕۆشت» مردن ئەیگێڕا، زەماوەن ئەئەگریان هەژار، دەوڵەمەن دەرگای ئاسن، دیواری زل بەرەو شیو ئەڕۆیشتن بەتل پەنجەرە و پەردە و چاوی کاڵ ئەگریان بۆ نەختێ ساماڵ تەرزەی ڕەقی دەنک گەورەش بە سلێمانی ئەڕشت خەش ئەرێ پاییز، ئەرێ باران! بۆ قارت گرت لە کوردوستان؟ ! ئەرێ هەوری مات و بەسام بۆ، ڕاتداین وەک پەڵاش، نەمام! شەوێ، ئەسووڕاینەوە لاو بازوومان بۆ کار هەڵکراو چووینە کۆڵانێک هاژە هاژ ئاو لاشەی کردبوو بە کاژ کوڕێک، هات شەل، گاڵۆک بە دەس بانگی کرد هاوار «لافاو» بەس توخوا خەڵکی ئازا «وەرن» ئەم خانوەم بۆ هەڵگرن کچەکەمی تیاتە هاوار کچێکی ناسکۆڵە و نازدار یەکێکیتر هاواری کرد سێ خوشکم، دایکم، باوکم مرد ئاخ خوشکی کەساسینە، من چیبکەم لەگەڵ هێزی مردن ئەمویست بە سواڵیش بوایە گەر بەخێوتان کەم تا مردن هەر بۆ ڕۆشتن، لەتاو برسێتی؟ بۆ نان؟ ها گیانم بریتی ئاخ هێلانەم شێوا ڕما بەیاخی یەئسم هەڵکرا کچێکیش شۆخ، چواردە ساڵان لە ژوورێکا خنجیلە و جوان ئەینواڕییە باخی خەیاڵ دواڕۆژی خۆش و ئاسۆی ئاڵ نوێنی بوو بوو، بە گۆڕ و مرد ئاخ لافاو چی بە ئێمە کرد؟ ! نابێ شاری پیرۆز و جوان ساڵێک دڵخۆش بێ، بێ زیان یا لافاو، یا بۆمباران یا لێزمەی گوللەی بێوچان ئەبێ ساڵێ جارێک ئێرە وێران کا، بیکا بە گێرە ئەبێ شینێک هەر ساز بکا خەڵکی وا پرواز بکا دەرگای شادیمان دابخا ئاڵای ڕەشمان بۆ هەڵبکا نیوەشەو بوو دەنگێ هەڵسا بانگی بەناو شارا ئەدا ئەیوت ئەوەی ماڵ وێرانە ڕوو بکاتە خەستەخانە! ++++++++++++++++++++++ سەرناو: من ڕەشم سەبارەت: ئەم هەڵبەستە هی بوێژی ئەمریکی «ماک کریا»یە من ڕەشم وەکوو کینییا ئەمرم لە ڕێی ئازادییا وەکوو ڕنگی شەوێکی ڕەش یا وڵاتی منی بێ بەش! وەک جەرگی ئەفریقاکەم نیشتمانە... بێنەواکەم ڕەنگم ڕەشە، پێستم ڕەشە ئەم دەنگە هی قولە ڕەشە: - جاران کوێلەیەک بووم هەژار بەر دەرگانەی کۆشکی زۆردار ماڵی قەیسەرم، ئەماڵی ژینم بەسەر برد بە تاڵی من بووم، بۆیاخچیی دوور وەتەن قۆندەرەکانی واشنتەن لە کۆشما بوو، هەر منیش بووم بە هێزی دەماری بازووم بە عەرەقم، بە خوێنی گیان بنچینەی کۆشکم هەڵئەسان هەرەم بناغەی من دامنا بەردم ئەدا، بەسەر شانما قوربانی یەک بووم لە کۆنغۆ بە لەچیکێکان بێ «شەرم و شۆ» دەستیان، قرتانم، لە بنا دەستڕۆیشتون لە کوشتنا ئێستەش لەناو کینیاکەما لە دارستان و ناو چەما گوللەبارانم ئەکەن هەر منی ڕەش، منی دەربەدەر بەخڕکە بەردی تەکساسیان کەوتوونە دووم بە بەردباران زۆر، ڕووبارم دیوە بە خوڕ لە هاژە هاژا، تاوی گوڕ نیلی بزورگی دڵنیا لەناو قووڵی بێدەنگیا سەرنجی داوم، زۆر بە دڵ جار جار بۆ من هاتۆتە کوڵ ئاوی مسیسپیشم دیوە کە جار جار پێم پێ کەنیوە یان بە دڵ بۆ من گریاوە بە گوڕ لافاوی هەستاوە وەکوو ڕووی ئەو ڕووبارانە لۆچ لۆچ و پیر بوو ئەم گیانە برام من ئینسانم، ئینسان وەکوو ئێوە دەمار و گیان من ئازادیم ئەوێ هەرگیز بۆی بەختە گیانی «قول» بەڕیز من ڕەشم وەکوو کینییا ئەمرم لە ڕێی ئازادییا ++++++++++++++++++++++ سەرناو: میوەی نازدار کات بەیانی... پرشنگی کاڵ پەرشی، گۆنای، گوڵاڵەی ئاڵ کوڕی شۆخ و شەنگی پێست ڕەش چەپکێک گوڵ، ئەگرێتە باوەش دێت، بۆ لای یاری نازەنین دوای سکاڵا و ڕازی شیرین بەڵێن ئەبەستن – بەیانی – بێنەوە، بۆ باخ و کانی لەوێ لەگەڵ جریوەدا تێر تێر لەو چەم و شیوەدا گۆرانی خۆش بڵێن هی خۆش بە بادەی دڵ ببن سەرخۆش! بەیانی، وەک دوێنێ هەر دوو ڕوویان کردە سەر کانی، زوو شاجوانی ڕەشتاڵەی نازدار کراسی مۆر، بریسکەدار وەک گوڵە قەیفەیەکی تەڕ هات، بەرەو ئاو، سێبەری کەڕ یار لەوێ بوو.. بەڵام لەسەر!! درەختێکی زڕی، بێ بەر!! وەکوو میوەیەک سەرە و خوار هەڵواسرا بوو... لاشەی یار شوێنێک، بووبێت، بە پەرستگە بۆ دۆلاری خاوەن «کارگە» تیا، بێ نرخە گیانی هەژار بە تایبەتی «قولی» نازدار ! ++++++++++++++++++++++ سەرناو: پاییزی ڕوو زەرد پاییزی ڕوو زەرد، پاییزی غەمگین دیسان ژیانی باخی کرد بە شین بەرگی بەسامی ماتەمی پۆشی لە خوێنی گوڵی گوێ چەمی نۆشی پۆپەی نەرمی تەڕ شکایە ناو ئاو وەری، تاڵ تاڵی گوڵی زەرد و خاو پەڕەی لالەی ناشت لە توێ توێی خاکا لەگەڵ برووسکە و ناڵەی ناپاکا پەڵەی هەوری ڕەش ئاسمانی پڕ کرد ئەو خونچە جوانەی دوێنێ تەڕ بوو، مرد! ملوانکەی شەونم لە ملی گۆڵا بە بای ڕەنگ زەردی پەشێوی پچڕا گوڵی زەرد و سوور کەوتە لیتەوە پاییز ئەڵێ – دەک هەڵنەسیتەوە – هوزار، خزایە ناو هێلانەی خەم خڵتانی خوێنە، بەری چاوی تەم ئەی بەهار، ئەی گوڵ، ئەی لالەی نازدار ئەی چڵی نەرم، ئەی مەل و هوزار خەم مەخۆن گەرچی ئەمڕۆ ماتەمە پاییزی زەردە، جەخارە، خەمە ئەگەرچی ڕەنگی بەهار پژاوە کاسەی شەونمی شیرین ڕژاوە بەڵام سبەینێ بەهار دێتەوە ئەو تۆوەی ڕژا هەڵەسێتەوە ئەو چڵەی شکا دێتە شنە شن گژوگیا و گوڵزار ئەڕوێ تا گەردن خۆرەتاوی زێڕ لە سەر گوڵی جوان بریسکەی ئەدا لە سنگی ئاسمان ئەی پاییز، بەسە هەڕەشە و ناڵە ئەم ژینەی ئەمڕۆ وا ترش و تاڵە! ناگاتە ئەوەی مردن بخوازین بە هیوای «گەش و ئاڵمان» ئەنازین باخی ژین زۆری دیوە لەم چەشنە بەڵام هەر شادی هاتۆتە شنە من لە ناو دڵما هەر لالەزارە هەمیشە بەهار ڕۆژی بەهارە ئاسۆی دڵ گەشە، ڕووناکە، جوانە پڕ لە ئاهەنگی خۆشی ژیانە! ++++++++++++++++++++++ سەرناو: پەشیمانی وتم! بە گوڵی پاییزی وەریو بە خونچەی وردی ناو شەپۆلی شیو بەو مەلە جوانەی تا مەلابانگدان بۆ عەتری ڕووی گوڵ ئەیکا بە گریان دەمەو بەیانی، خەو، بە بێدەنگی ئەڕژێتە چاوی، ناو دڵی تەنگی کە دێتە ناو چەم، تیشکی خۆرەتاو ئەوسا، هەڵەسێ دەمەو چێشتەنگاو نە عەتری شەونم، نە پرشنگی گوڵ لەسای تووتڕکا، ئەگری زۆر بەکوڵ وتم... ! بەو تیشکەی بەیانی زووزوو هەڵدێ لە ئاسۆی ڕووناکی سوور بوو لەپڕ هەورێکی بێ بەزەیی تاڵ ئەیپۆشێ تاڵیی تیشکی سووری کاڵ وتم! بە شەوبۆ کە مات مات لە دۆڵ نەگەشایەوە، کەژ، بوو بە سەهۆڵ وتم: «پرشنگی نیگای گەرم و خۆش» «بزەی دەمی تۆ، گیانە فەرامۆش» فەرامۆش یادی شیرینی جاران ناوم سڕیوە، لای خوای دڵداران کەچی، لە چاوی کل نە دیوەوە لە دڵی نەرمی هەڵفڕیوەوە هەمیسان، تاسە، ڕژایە دەروون دوو دڵۆپ ئەشکم وەک قەترەی ئاڵتوون گەرم و ئاڵ، لە سەر، ڕووی من، قەتیس مان بۆ هاتیتەوە، ئەی کچۆڵەی جوان؟ ! وەک دڵمت ڕەنجان، بۆ، دیسان بزە هەڵکا چراکەی، ئەم دڵە کزە؟ وتی: ئەی یاری نازداری گیانم توو بی، ئەم دڵە و خورپە و گریانم ببوورە، سامانی منی، فریو، دا منی بە نەختێک ئاڵتوون و زێو دا! دامی، بە کۆشک و، بە تەلاری خەم ئاسمانی شادیی گرتم بە ماتەم من پەشیمانم، ببوورە ئەی یار دڵم مەشکێنە، تۆ دڵی دڵدار «دیسان تەوژمی دڵداری بە جۆش» «وەک کۆرپەی نازدار دڵمی گرتە کۆش». ++++++++++++++++++++++ سەرناو: پەنجەی تەزیو زەردە پەڕی، کاڵی زێڕین ئەتوێتەوە.. دەشتی بەفرین تۆپەڵی بەفر، لە سەر چڵ لەپڕ ئەڕژێتەوە جەرگی گڵ مەلی دەنگ خۆش، وردیلانە ئەگرێتەوە... هێلانە درەختی پیر، ئەڵێ من چیم!! بە سەرمای تیژ ئەڵێ «تەسلیم!!» شاخ و ڕووبار و... دارستان ئەترسن، لە بەفر و باران تاوێک ڕەهێڵەیە بەتین دەمێک بەگوڕ بەفربارین مناڵێکی شەش حەوت ساڵان ئەگەڕێ، ئەگری، لە کۆڵان با... لە ناو، بەفرا ئەتەزێ چرۆی درەختی تەڕ ئەمرێ «هیوا»، ئەنواڕێتە ناو ژوور تەلاری بەردی زەرد و سوور لە پێش بوونیا بوو.. باوکی مرد لەگەڵ دایکی.. سواڵی ئەکرد. دایکیشی سکی پڕ لە ژان ڕایکێشایە ناو گۆڕستان! شەوە... ئاوازە ڕەنگاوڕەنگ لەو ماڵە، بەستەیە، ئاهەنگ لە پاڵ دیوارێکدا، غەمگین دائەنیشێ «هیوا» ی شیرین ئەندامی ورد، لەشی، گەردن هەموو لەگەڵ یەک ئەلەرزن دوای هەناسەیەک دەسگێڕان لە کون و قوژبنی گیرفان نەختێ شقارتە دەردێنێ یەک یەک دایانەگیرسێنێ لە بەر تیشکی گڕی پچووک مناڵی برسیی ئێسکسووک دائەنیشێ تا دوا دەنک ئەگڕێ، بۆ پەنجەی ناسک سەر ئەنێتە سەر لەپی دەس ئەنوێ بەسەزمانی بێکەس!!! دوای هەناسەیەک ڕێبوارێ تێئەپەڕێ و پیا ئەنواڕێ هەڵی ئەگرێ و ئەڵێ «فەرموو!» ئەمشەو، لای مامی خۆت بنوو بەڵام ئاخ، پاش چی!! تازە مرد «چاوەڕێی پرشنگی ئەکرد...» ++++++++++++++++++++++ سەرناو: ڕووبەڕووی مردن سەبارەت: لە ساڵی ١٩٣٦دا لە کاتێکا کە «لۆرکا»ی بوێژی هەرە گەورەی «ئیسپانیا»یان برد بۆ کوشتن «دەستڕێژ». ئەنتونیو ماخادۆی بوێژی گەورەی «ئیسپانیا» کە لە نەفی بوو ئەم هۆنراوەیەی وت! سەرنجماندا، ئەڕۆی بێدەنگ لەم لاو لەو لایەوە... تفەنگ بەرەو دەشتی، پڕ شنە شن لەژێر پەردەی، ئەستێرەچن لەوێ، نزیک ئاسۆی ڕووناک کوژرا، بە تفەنگی... ناپاک چاویان لێکنا، پیاوکوژەکان ملیان کەچ، سەریان دانەوان زاتیان نەبوو، تێی بنواڕن سەرنج بەن، لە چاوی، گەردن بەدەم نوێژەوە، ورتەیان بە پەردەی گوێی، ژینی گەیان – تازە، ڕزگارت ناکا خواش – – تازە، ڕزگارت ناکا خواش – *** ڕوومەت، خوێناوی، گوللەی ڕەش پەراسوویان، گرتە باوەش مرد و، تاوانێکی گران ڕووی دا، لە شاری بەسزمان بەسزمان... «غرناتە»ی شیرین زۆر بەسەزمانە... ئەیزانین!! *** دیمان ئەڕۆی، لەگەڵ مەرگا «ورە»، مەڵاس، لە ناو جەرگا نەترسا، لە داسی مردن لە زەبری، بە تینی کوشتن *** ڕۆژ لە تەلارەوە... دەسگا چەکوش بەگوڕ خۆی پیائەدا دەنگی بەسامی لێ ئەهات – لۆرکا–ش، لە ڕێی مەرگ و خەبات لەگەڵ مردنا... ئەدوا گوێی لێبوو... دەنگی هەڵئەسا «هاوڕێ هەمووی هەر دوێنێ بوو شەماڵ خۆی لە درەخت ئەسوو گەڵای دارخورما ئەیچرپان بوو، بە تەرزە بەستەکەمان بە داسێکی تیژی زیوین دەس و پێی پەژارە – پەڕین» بەم جۆرە – بەستە ئەڵێم من بۆ ئەو لەشەی بردی مردن بۆ ئەو بەژنەی هی تۆ نەبوو هی گەل بوو، ئەی برای زیندوو بۆ ئەو قژەی پەرشی ڕووە بۆ لێوی ئاڵ کە نووستووە بۆ ئەو دەمەی لەمەوپێش دەم ئەیمژی... خۆشەویستەکەم چەند خۆشە، من ئێستە... تەنیا لەگەڵتا بوومایە... برا ئەی گیانی «غرناتە»ی ئازیز بیرمان ناچێتەوە هەرگیز *** دیمانن، ون ئەبوون لە چاو بۆ ناو شەپۆلی خۆرەتاو هاوڕێینە: لە ناو بەردا لە خەوی گەش و بێگەردا قووڵ... لە کۆشکێکی ڕەنگ ئاڵا لە ناو بەردا... لە خەیاڵا لەژێر کانیا... قوڵەقوڵ کە ئاوی ڕوون، ئەگری بە کوڵ گۆڕێک هەڵکەنن، بۆ شاعیر بۆ «لۆرکا»... بۆ گیانی نەمر ئاوی کانی ئەگری بەخوڕ تا ئەبەد ئەڵێ و دڵی پڕ «لە غرناتە جورمی گران وەک درنج هەستایە سەرپێیان!» ++++++++++++++++++++++ سەرناو: ڕەهێڵە لەسەر کوڵمی ناسک... مردن دەسی کرد، بە بەستە وتن پەرچەمی تەڕ، ئاڵا لە مل فرمێسکی ئەڕژا، لەگەڵ... کل شار، پەرۆشی ڕەهێڵەی سەخت «ڕێی گرتەبەر لەگەڵ ناوەخت» پرچی تەڕی پەرش و شیرین بەستەیەکی ئەوت غەمگین با... ئەیدا لە پرچی سەرشان ئەلەرزی وەک تەلی کەمان ئەندامی لەش، گەردن، ناودەم شۆڕ شۆڕ لێی ئەڕژا ئاو و خەم باران ئەچوو، بەگژ... گڕدا لافاو لەناو قەدی پردا زریکو هۆوڕ چرای ڕەنگین ئەگریان بەتاو... ئەلەرزین ژنی بەژن و باڵا نازدار ئەیپێچایەوە... جادەی شار ئەینواڕییە ڕێی گۆڕستان چاوی ژاکاو پڕ لە گریان پووزی ناسک، کەمەری تەنگ بە تکی قوڕاو ڕەنگا و ڕەنگ کپ و غەمگین و مات: کۆڵان لەپڕ، هەورێک، ئەیزریکان!! کارەکەری... جوان، وەکوو گوڵ بەدەم گریانەوە، بە کوڵ وتی: کوڕی کۆشک و تەلار لاوی بێڕەحمی پارەدار دەسی بڕیم و دوای ئەنجام وەختێک کە، گەیشت بە مەرام خۆی و دایکی دەریان کردم وێڵ وێڵ... بەم دەردەیان بردم بێ لانە، بێ کەس، بێ هاودەم ئەی خوای هەور و باران چیبکەم؟ ! پەریی کچێنیمیان... مران بووم بە ژن... منی بەسزمان ئەی کۆرپەی «باوک تاوانبار» لە ئێستەوە بگری بەزار!! *** هەژارێک فریای کەوت... قەشەنگ وتی: ئەی ژنی شۆخ و شەنگ تۆزێ ئاڵتون نەنیشتووە لەم، دڵە پڕ ئارەزووە ها، دڵم، هێلانەی تۆ بێ جێی، ئەو، ڕووە، جوانەی تۆ بێ ++++++++++++++++++++++ سەرناو: کچەکەی خۆی گزنگ، لە گەرووی کەژا وەک ئاڵتوونی خاو، ڕژا کەژاوی، ساردی بەگوڕ ڕژایە، شەخەڵی چڕ پەردەی تەنک، ئاوریشمین بە شەماڵ، کەوتە لەرین لە نوێنا تلایەوە... تا گڕی کوژایەوە... کچی هەژاری بێ نان بەجێی هێشت تەلاری جوان دوای ئەوەی گوڵی... گەنجی لەناو، نوێنێکا وەری *** لە شەوا... دوای پانزە ساڵ کچێکی جوانی چاو کاڵ نیگای، تا بڵێی، شیرین قژی زەردی ئاگرین هەر ئەو کوڕە، ئەو دڵە ئەو دەروونە.. بەکوڵە ئەو شەیتانە، دەسدارە ئەو ڕاوچی، پارەدار کچی گەیانە تەلار ناو ژووری بریسکەدار عروسی ئاوێنەبەن ئینجا کوڕی دەوڵمەن بەرگی شیتاڵ کرد، لەپڕ ماچی ئەکرد... گەرم و گۆڕ لە سنگی شیرینەوە چاوی ئاگرینەوە گڕ هەڵئەسا، بۆ تاسەی گەرم ئەبوو، هەناسەی بەسەری برد، شەوی سوور بە بێ شەرمی، بێ، ... سنوور «بەڵام ئەی پرشنگی کاڵ» «ئاگات لێ بێ لە قەدپاڵ» کچی خۆی بوو... نەیزانی هی دۆستەکەی جارانی! ++++++++++++++++++++++ سەرناو: گریانی خۆش کاتێ زەردەپەڕی شیرین ئەتوایەوە ناو گۆمی شین پەریزادەی دڵی گەشم «خوای جوانیم».. هاتە باوەشم لە پەرچەمی خۆرەتاوی لە دەست و پەنجەی خەناوی لە شەپۆلی نیگای نەرم لە دەمی پڕ تاسەی گەرم ئیلهامی دڵداری و جوانیم بەستەی خۆشی و کامەرانیم ئەمژی و لە ناو دەروونی مەنگ ئەبوو بە گۆرانی و ئاهەنگ هەموو چرۆکانی دەروون بوون بە گوڵی زەرد، وەک ئاڵتوون کاتێ قرچەی هەتاوی سوور ئەیهێنامەوە لە ڕێی دوور گوڵی دڵداریم هەڵوەری کە دیم نازەنینم ئەگری تک تک، دڵۆپی ئەسرینم ڕژا لە چاوی غەمگینم یار و، تەلارێک و، گریان دڵداری و ناسۆڕی و ژیان دوای دوو سێ ساڵ تەماوی شەوی مات و گریاناوی کچێکم دی، نیگاری جوان وەک، نازەنین، پەریی ئاسمان ئەو، ڕووە، ئەو، دەمە گەشە ئو، چاوە، ئەو، برۆ ڕەشە هەر وەک نەخشی ڕووی نازەنین ورد و ناسک، جوان و شیرین دیسان گریام، نەختێ بەکوڵ ڕامچەنانەوە، پەریی دڵ دوای حەوت ساڵی ئازاراوی شەوی ماتەم و خەماوی چوومە، سەر تەرمی، یارەکەم بووکی ناکام، دڵدارەکەم دامە، تاوی، هەنسک، بەگوڕ ئەگریام وەک مناڵ بەخوڕ تێرتێر، گریام، لە سەر تەرمی شینێکم گێڕا، بەگەرمی ئۆخەی کە دڵم تێر گریا بەکوڵ، بەجۆش، بەئاشکرا ئەی فرمێسکی دڵی بێهۆش بۆم بگێڕە، گریانی خۆش ++++++++++++++++++++++ سەرناو: گۆرانیی من با هێلانەم، هەر، تەنگ بێ ئاوازەکەم، بێ دەنگ بێ وەرزم، پاییزی زەرد بێ لێنیشتووی گوڵم گەرد بێ ئەگەر بڵێم کوردم.. من یەکسەر زمانم ببڕن پێوەندەکەی جاران بێ ئەڵقەی ڕەش و گران بێ ئاوا هەژار و لات بم ئاوارەی ناو وڵات بم لێوی خەفەت لێنیشتووم یا، ڕووی ژاکاوی زەرد بووم وەک گەڵای زەرد، دیاری بێ مووچەم، هەر دارکاری بێ ڕێم بە داو، تەنراو بێ دڵم کپ و گوشراو بێ «شەرت بێ پڕ گەرووی هەستم» «ئەم جارەش هەر بۆی هەستم» بەستەیەک بڵێم ئێجگار گەرم و خۆش بێت بۆ هەژار بۆ ژینی کوردەواری بیکەم بە نەغمەی دیاری دەروونە پڕ نەغمەکەم سادەی بەستە گەرمەکەم ++++++++++++++++++++++ سەرناو: هێلانەی ئارام قژی خاو، قژی زەردی کاڵ گەردنی ناسک، کوڵمی ئاڵ چاو، هێلانەی ئارامی دڵ پەنجەی ناسک، دەسی وەک گوڵ لار و لەنجەی ورد و نەرم بزە و سەرنجێکی گەرم بۆچی ون بوون، بوون بە خەیاڵ خەیاڵیش نەیما پەڕ و باڵ!! ئەی پەری ئاسمانی ڕماو چیبکەم، لەگەڵ زێڕی گڵاو تۆی فڕان، بۆ کۆشکی سامان ناتگاتێ، نە ئاخ، نە گریان ناچارم ئەوە بێ پیشەم داوێنی جوانی بەرنەدەم دڵم خۆش کەم بەوەی کە من شەیدام، بۆ ڕوومەت و گەردن ئەی گوڵاڵەی بە خەم تەزیو چاوی کەژاڵی کل نەدیو با بڕێژێت فرمێسکی زۆر وەک نمی ئاورەنگی بەر خۆر ئەی مەلی قەفەزی زێڕین ئەی باڵا بەرزی خوێن شیرین من دڵسۆزی و تۆ یادی دوور هی ڕابوردوویەک، زەرد و سوور با بڕێژین تک تک، لە گیان خوای دڵداری بێتە گریان ئەی زێڕی زەردی سارد و سڕ چۆنت برد دڵی گەرم و گوڕ! ئەی ئاواز ژەنە، مەستەکەم سۆزێک بۆ دڵە پەستەکەم تا ژین وابێ دڵدارییە کوشتەی دەستی زۆردارییە تۆ ڕۆیی خوات لەگەڵ ئازیز دڵت وەکوو گوڵی... پاییز هەڵیوەران، خەزانی خەم چاوی هیوامان گرتی تەم تۆ نەمردووی ئاخ دڵت مرد زێڕ ئابڕووی دڵداریی برد ++++++++++++++++++++++ سەرناو: یاد قژی نەرمت، وەکوو تاڵی خۆرەتاو لەسەر قۆڵ و شانی سپی، پەرش و خاو نەغمەی شیرین، ئاوازی خۆش لە دەنگا ورشەی سەرنج، لە ناو چاوێکی مەنگا خاڵێکی کاڵ، نەخشێکی جوان، لە سەر ڕوو بەژن و باڵات، وردیلە و ڕێک و هەڵچوو زەردەخەنەی ئەو ڕووە، هی ئەو لێوە فریشتەی هەست، هی ئەم دڵە بزێوە وا لێ ئەکات، بێتە سەما و گۆرانی بیلەرزێنی تەلی ئاوازی جوانی درەختەکەی سەر کانییەکەی باخی چەم پێئەکەنێ، گەڵای ئەڵێن، پڕ بە دەم لە بیرمانە مناڵ بوون، لە ناو باخا زەردەی دەمتان، ئەدا بە پشتی داخا تۆ بنواڕە، ئەو کانییە، نازدارە ئێستەش وێنەی هەردووکمانی تیا دیارە تۆم خۆش ئەوێت، بەڵام نابم بە یەخسیر لە تاوی قژ، بۆ دڵم بکەی زەنجیر نە شوانم بە، نە شوانت بم، بە شمشاڵ بۆ دڵێکی وشک، بکەین – پەڕ و باڵ – نە کۆڕنوشت بۆ ئەبەم، نە تۆش بۆ من با لە باخی شادیا، دەست لە گەردن دوو دڵدار بین، بەڕاستی دوو فریشتە ئەو ژیانە بەو جۆرە بێت بەهەشتە لە گوڵی یاد، لە یادی جوانی ڕەنگین پێشکەشت بێت چەپکێک گوڵاڵەی شیرین ++++++++++++++++++++++ سەرناو: ئەی کچە شوان ئەی کچە شوان هەڵاڵەیی ئەی کەنێرەی کەژی کێوستان بە شینەیی نەرم و نیان بە ئاوازی شمشاڵەکەت بە لەرەی لێوە ئاڵەکەت هەستی خۆشیم بێنە فڕین بۆ ناو گۆڵزار چەم و نزار ئاسمانی شین لادە لە خەم ئەی گوڵی چەم ئەی کەنیشکە وردیلەکە ئەی گوڵالە نەشمیلەکە ئەگریجە ڕەش ئەی دیدە گەش ئەی کچە شوان! *** ئەی کچە شوانئەم چەم و دەشتە شیرینە ئەم چیا و دۆڵە ڕەنگینە تا دوێنێ بوو، لیتە و لێشاو بوو، تەپونم گیانی گوڵان بوون ئەوەرین وا تۆوی گوڵ بوژایەوە گوڵی مردوو ژیایەوە لە گوێ ئاوی قەڵبەزی کەڕ دڵۆپ هەڵئەسێ وەکوو پەڕ یا وەک پەپوولەی ناسکۆڵە بە تیشکی گزنگ زەرد و سوور بنواڕە ئەو شەوبۆ وردە لە سەر ئەو تاوێرە بەردە فریشتەی هیوا بگرە کۆش بە ناسۆر تۆ مەبە سەرخۆش با بێ دەنگی شمشاڵەکەت لەرەی بێ لێوە ئاڵەکەت بە ئاوازی کامەرانی نەرم نەرم زۆر بە جوانی گەردن هەتاو ئەگریجە خاو ئەی کچی شوان! *** ئەی بولبولی خۆش ئاوازەگوێ بگرە لە سۆزی تازە: «دیمەنی سروشت ڕەنگاوڕەنگ» جریوەی تۆ زۆر بە ئاهەنگ پەڕی هیوا کەوتە فڕین فڕەی بەکوڵ لە دۆڵەوە بۆ نزاری داوێن ڕەنگین لەگەڵ شەماڵ سەری دەرکرد گوڵاڵەی ئاڵ فرمێسکی ئاڵت بسڕەوە کاتی «تێکۆشانە» و زەردە ئاوی شەونم بخۆرەوە هیوا هەرگیز ئارامی کۆرپەی ژیانە ئەی کەنیشکی جوانی ئازیز گوڵی بەهار کچی نازدار ئەی کچە شوان! ++++++++++++++++++++++ سەرناو: تینوومە ئەمڕۆ تینوومە... زۆرم تینووە، هەر وەک بیابان ملی سووتاوم، تاسەی تاساوم، تینوون، بۆ نەختێک دڵۆپی باران سادەی هەورەکەی ژیان، بارانێ ڕاماڵێت پوشی نائومێدی دڵ -خەندە و گریانێ - شۆڕشی لێشاو با هەستێ بەتاو بۆ سەر قەڵاکەی سەختی، دەروونی، سزا و نەبینی... دەرهێنێ لە بێخ ژاڵەی پەژارە، ژیانم تاڵە ئەمڕۆ تینوومە هەر وەک بیابان ++++++++++++++++++++++