شاعیر: کامەران موکری
کتێب: دیاری
سەرناو: ڕەهێڵە

لەسەر کوڵمی ناسک... مردن
دەسی کرد، بە بەستە وتن


پەرچەمی تەڕ، ئاڵا لە مل
فرمێسکی ئەڕژا، لەگەڵ... کل


شار، پەرۆشی ڕەهێڵەی سەخت
«ڕێی گرتەبەر لەگەڵ ناوەخت»


پرچی تەڕی پەرش و شیرین
بەستەیەکی ئەوت غەمگین


با... ئەیدا لە پرچی سەرشان
ئەلەرزی وەک تەلی کەمان


ئەندامی لەش، گەردن، ناودەم
شۆڕ شۆڕ لێی ئەڕژا ئاو و خەم


باران ئەچوو، بەگژ... گڕدا
لافاو لەناو قەدی پردا


زریکو هۆوڕ چرای ڕەنگین
ئەگریان بەتاو... ئەلەرزین


ژنی بەژن و باڵا نازدار
ئەیپێچایەوە... جادەی شار


ئەینواڕییە ڕێی گۆڕستان
چاوی ژاکاو پڕ لە گریان


پووزی ناسک، کەمەری تەنگ
بە تکی قوڕاو ڕەنگا و ڕەنگ


کپ و غەمگین و مات: کۆڵان
لەپڕ، هەورێک، ئەیزریکان!!


کارەکەری... جوان، وەکوو گوڵ
بەدەم گریانەوە، بە کوڵ


وتی: کوڕی کۆشک و تەلار
لاوی بێڕەحمی پارەدار


دەسی بڕیم و دوای ئەنجام
وەختێک کە، گەیشت بە مەرام


خۆی و دایکی دەریان کردم
وێڵ وێڵ... بەم دەردەیان بردم


بێ لانە، بێ کەس، بێ هاودەم
ئەی خوای هەور و باران چیبکەم؟ ! 


پەریی کچێنیمیان... مران
بووم بە ژن... منی بەسزمان


ئەی کۆرپەی «باوک تاوانبار»
لە ئێستەوە بگری بەزار!!

***

هەژارێک فریای کەوت... قەشەنگ
وتی: ئەی ژنی شۆخ و شەنگ


تۆزێ ئاڵتون نەنیشتووە
لەم، دڵە پڕ ئارەزووە


ها، دڵم، هێلانەی تۆ بێ
جێی، ئەو، ڕووە، جوانەی تۆ بێ

++++++++++++++++++++++