شاعیر: بێکەس
کتێب: شیعری منداڵان
سەرناو: تۆ چیت؟ من کوردم!
سەبارەت: هەڵەبجە ١٩٣٥

تۆ چیت؟ من کوردم
نەتەوەی گوردم

خۆ ترسنۆک نیت؟ 
حاشا نەبەردم

چی تۆی لەناو برد؟ 
دوو دڵی و نیفاق

چۆن ڕزگار ئەبی؟ 
هەر بەئیتتفاق

بڵێ چیت ئەوێ؟ 
بەرزیی وەتەنم

بەخۆڕایی نا، 
بەگیان و تەنم

چیت لە بارایە؟ 
خۆ فیداکردن

بۆچی؟ لە ڕێگای
میللەتا مردن

کوا، چەکت چییە؟ 
سەودای وڵاتم

ئەی پشتیوانت؟ 
عەزم و سەباتم

ڕاستت پێ بڵێم؟ 
فەرموو گوێم لێتە

بەقسەم ئەکەی؟ 
سەرم لە ڕێتە

بەڕاستی و پاکیی
هەوڵ و تێکۆشین

لە کورسی و کینە و 
درۆ چاو پۆشین

ئەمانەت نەبێ
کارت زۆر لەقە

بەشت هەمیشە
نەگبەتی و شەقە

++++++++++++++++++++++