شاعیر: بێکەس
کتێب: کوردایەتی
سەرناو: ستایش

لە کوردا ئەو کەسەی ئێستا بەویجدانە کەوا مەردە
کەسەربەست بێ ئەلەم ڕۆژا ئەمیش بێ میسل و هەم فەردە

نەزیری ئەو لە دنیادا نییە و نابێ هەتا مەحشەر
دڵی دەرحەق بەهاوجینسی بلووری سافی بێ گەردە

بەڕەحم و شەفقەتە دائیم لەبۆ شەخسێ کە بێ دەست بێ
ئەوی حەز بەو نەکا بێ‌شک لەلای خوا ڕووڕەش و زەردە

تەبیعەت حاتەمی تائی لە فیکرا چەشنی لوقمانە
لە حیلم و حەوسەلە و ئیشدا دڵی ڕەق وەکوو بەردە

نیشانەی فەخرە بۆ ئێمە کە زاتێکی وەهامان بێ
ئیلاهی بەرقەراری کەی چراغی میللەتی کوردە

++++++++++++++++++++++