شاعیر: سابیری
کتێب: دیوانی سابیری
سەرناو: لە خەودا شەرع و دینم دی دەگریان

لە خەودا شەرع و دینم دی دەگریان
بە دەستوورێ کە مردوو بێ پدەریان


کە چاوم کەوتە شین و باوکەڕۆیان
دڵ و جەرگم لە تاوا بوونە بریان


ئەگەرچی دڵڕەق و غەرقی گوناھم
منیش بوومە شەریکی دەردەسەریان


لەپاش ئەم شیوەن و گریانە پرسیم
کە چی بوو باعیسی دەرد و کەدەریان


جەوابیان دا بە دەنگی نەرم و مەحزوون
لەبەر ئازار و سووتاوی جگەریان


برادەر تەعزییەی شێخ و مەلایە
لە دونیادا نەما شوێن و ئەسەریان


کە ئەھلی دین نەماوە ئەھلی دونیا
ھەموو دوورن لە ئەمری پێغەمبەریان


چرا بکوژێتەوە تاریکە دونیا
پدەر مرد و ھەتیو ما ڕووت و عوریان


ئیتر بێ حورمەتی شێخ و مەلایە
خوسووسەن عالیمی مێزەربەسەریان


ئەوان بوون قەدری شەرع و دین بزانن
نەمان و شەرع و دینمان قوڕ بە سەریان


موسوڵمانی ئەمێستا ئیسم و ڕەسمە
پەرێشانن بە خزمەت گا و کەریان


پەنا بە خوا لە شەڕی ئەم زەمانە
زوبان بگرن نەبن تووشی زەرەریان


لە ئەبنائی زەمان دڵ ھەڵئەشێوێ
نەزیک و دوور حەزەریان تا سەفەریان


بە شەربە و شۆربا ڕازی بە سابیر
بەشەر با بێنە شەڕ دووری لە شەڕیان

++++++++++++++++++++++