شاعیر: سابیری
کتێب: دیوانی سابیری
سەرناو: سبەینانێ وتم ئەی نازەنین و شاھی لێوئاڵان

سبەینانێ وتم: ئەی نازەنین و شاھی لێوئاڵان
گوناھێکی نەبوو دڵ، داوی زولفانت لە پێ ئاڵان


ھەزار ئیفتادە لەو مەیدانە وریا بوونەوە وتیان: 
ئەمە شوێنی کەڕ و لاڵانە نەک بێ عەقڵ و منداڵان


ھەموو زامار و خامۆشین، ھەموو ھوشیار و سڕ پۆشین
وەگەر نە شوبھی کوێری بێ، عەسا ئەڕمییە نێو چاڵان


ئەگەر تۆ شێخی بەرماڵی، بە ئێمە ناکرێی حاڵی
گەلێ کەس ھات و تاوی دا و زینی ئەسپی داماڵان


ئەگەر خۆ تۆ خوداناسی، وەکوو ماسی کەڕ و کاسی
وە ئیللا وەک سەگی پاسی، چییە ناڵان و دەرماڵان


بە ڕەنگ و ڕیش دەروێشی، بە خوڵق و خوو بەدئەندێشی
عەجەب ئەسپێکی سەرکێشی، خودا بتخاتە ژێر پاڵان


گەلێ کەس سابیری لەم ئاستانی یارە ھات و چوو
بە ھێواشی و بێ دەنگی ئەگریان و ئەیانناڵان


ھەموو کەس سابیری لەم ئاستانە بەھرەوەر نابێ
مەگەر بێ دەنگ و خامۆشان و ڕووت و بێ سەروماڵان

++++++++++++++++++++++