شاعیر: سابیری
کتێب: دیوانی سابیری
سەرناو: خودا ھاوارە ئەمشەو دولبەرم لێ دابڕا چی بکەم

خودا ھاوارە ئەمشەو دولبەرم لێ دابڕا چی بکەم؟ 
شەرارەی ئاگری دووری لە سینەم ھەڵگڕا چی بکەم؟ 


لەبەر دەرد و غەمی یارم نەخۆش و خانە بێزارم
وەکوو مەجنوون دڵم بۆ چۆڵ و سەحرا ھەڵخڕا چی بکەم؟ 


خودا ڕۆژی ئەجەل گریان و قوڕ پێوانی پێ بەخشیم
بە ئەمری حەق وجوودم ھەڵنەکێشم لە قوڕا چی بکەم؟ 


قەڵەم ڕۆژی ئەجەل بۆ ئێمە ھەر دەرد و غەمی نووسی
ھەموو ڕۆژ گەر نەناڵێنم لە ناو خاک و قوڕا چی بکەم؟ 


قسەی بێ فائیدە و بێ جێ، زەروورەت پێم نەکا نایکەم
ئەگەر گریە و فوغان ناکەم کە ئارامم بڕا چی بکەم؟ 


ھەموو عالەم بە بەرگی جەژنەوە سەرمەست و خۆشحاڵە
ئەگەر قانع نەبم سابیر لە نێو بەرگی شڕا چی بکەم؟ 


نەگەییە دامەنی حوسنی ھەناسەی سابیری یاران
لە دونیادا بە بەدناوی کە من زەنگم زڕا چی بکەم؟

++++++++++++++++++++++