شاعیر: سابیری
کتێب: دیوانی سابیری
سەرناو: بە چاوی مەست و بیماری نەخۆشم

بە چاوی مەست و بیماری نەخۆشم
نەماوە ئیختیار و عەقڵ و ھۆشم


بەزاھیر گەرچی مسکین و فەقیرم
لە باتیندا دوڕ و گەوھەر فرۆشم


دووڕ و مەرجان چییە؟ یەعنی دڵ و جان
بە چاوی تۆ لە چاو ئەڕژێتە کۆشم


ئەگەر تۆ موشتەری مەرجان و دوڕ بی
بە گیانی تۆ وەرە ھەرزان فرۆشم


ئەگەرچی عاجز و بێ دەستەڵاتم
بە جان و دڵ بەقوربان تێدەکۆشم


ھەتاکوو تۆ نەیەی تەسکینی نایێ
بە ڕۆژ و شەو دەمێکە غەم دەنۆشم


گەلێ ناڵاندم و سوودی نەبەخشی
لەمەولا سابیر و مات و خەمۆشم

++++++++++++++++++++++