شاعیر: سابیری
کتێب: دیوانی سابیری
سەرناو: خۆر ڕەنگی نییە عاجیز و داماوە لە کێوا

خۆر ڕەنگی نییە عاجیز و داماوە لە کێوا
ئەڵبەت قەمەری ڕوومەتی تۆی دیوە لە شێوا


لاسوورە مەگەر ڕوومەتی تۆی دیوە لە شەرما
ڕووزەردە وەلی ناسک و نایابە لە سێوا


حەددی چییە نەوغونچەیی گوڵ لێوی دەبزوێ
لەو باغە کە تۆ زەردەخەنە دێنییە لێوا؟ 


بیستوومە زەدەی گورزی دەسی ڕۆستەمی ئەشقت
بێباکە لە نێو جینن و بەنی ئادەم و دێوا


ناحەق نییە سابیر بەخودا وا خەرەفاوە
کێ بێ قەمەری تەلعەتی تۆی دیبێ نەشێوا؟

++++++++++++++++++++++