شاعیر: سابیری
کتێب: دیوانی سابیری
سەرناو: تۆ بیت و خودا ئەی بوتی سوورەت گوڵ و دڵگەش

تۆ بیت و خودا ئەی بوتی سوورەت گوڵ و دڵگەش
بەندی جگەر و دڵ مەبڕە، مەیخەرە ئاتەش


بەو قەوسی برۆ و چاوی گەش و زولفی سیاھت
زامارم و بیمار و پەرێشان و موشەووەش


ھاتوومە لەبۆ حیسسە زەکاتێ لە خەبەردا
وا ھاتووە، قەت سائیل و مسیکن مەکە بێبەش


باوەڕ بکە ئازاری تۆ وا خۆشە بە گیانم
عومرێکە جەفاکێشم و نابێ لە دڵم غەش


ئیفتادە و بێچارە و میسکین و زەبوونی
سابیر خۆشە لەو یارەوە ئازار و کەشاکەش

++++++++++++++++++++++