شاعیر: سابیری
کتێب: دیوانی سابیری
سەرناو: یاری کەس نابێ بە یارم حبذا یاری لەزیز

یاری کەس نابێ بە یارم حبذا یاری لەزیز
غیبتەبەخشای حۆریانە ڕەنگ و ڕوخساری لەزیز


دولبەری عیشوەفرۆش و میھرەبان و دڵفەریب
غەمزە و ناز و ئیشارە و چاوی بیماری لەزیز


گوڵعوزارە قامەتی شمشادە ئەندامی بلوور
دست و پەنجەی نازک و کردار و ڕەفتاری لەزیز


تەلعەتی دارالشفایە چاوی بیماری حەکیم
حەببی ئەمساڵیشی وەک مەعجوونەکەی پاری لەزیز


نیوەشەو بوو، چاو لەخەو بوو، لەب بە تەرم و تارەوە
حبذا تۆران و عاجزبوون و ئازاری لەزیز


گوڵشەنی حوسنی شیفابەخشی نەخۆشی بێ دەوا
ئەی خودا حیفزی بکەی یاری وەفاداری لەزیز


سابیری خۆشی لەخۆت ئەمشەو حەکیمت ھاتەسەر
سەر لەبەر پێی دابنێ ئەتوار و ئەفکاری لەزیز


سابیری وەسڵ و فیراق و جەور و لوتف و خار و گوڵ
تۆ ھەمووی یەکسان بزانە جەور و ئازاری لەزیز!

++++++++++++++++++++++