شاعیر: سابیری
کتێب: دیوانی سابیری
سەرناو: جەژن و شادیمانە ئەمشەو ھاتەوە یاری لەزیز

جەژن و شادیمانە ئەمشەو ھاتەوە یاری لەزیز
زیرەک و شیرین زوبان و ماھی ڕوخساری لەزیز


تا بڵێی خوڵقی حەسەن، نازک بەدەن، نادر دەھەن
نیمنیگاھی نازی چاوی مەست و بیماری لەزیز


سوورەتی گوڵ، فێنکی دڵ، چاوی کاڵ و لێوی ئاڵ
گیانی سەرتاپا بلوور و مەیل و ڕەفتاری لەزیز


چاوی بیماری، حەکیمی حازقی دەرد و مەرەز
ھاتن و تەشخیس و فکر و حوبب و ئازاری لەزیز


ناکەسم سەردانەنێم بۆ بەردەبازی ڕێگەکەی
یا نەکەم ڕۆحم فیدای یاری وەفاداری لەزیز


ھاتە باڵینم تەبیبە، تێگەیی دەرد و دەوام
خوا دەوامی دا، دەوامی دا بە گوفتاری لەزیز


دەستی نایە سەردڵم فیلفەور ئازارم نەما
ھیچ کەسێ نەیدیوە بەم دەستوورە دڵداری لەزیز


سابیری جەژنت موبارەک بێ حەکیمت ھاتەسەر
حبذا بوس و کەنار و یار و شەوگاری لەزیز


سابیرا شوکرانە ببژێرە لەسەر ئەم نیعمەتە
بەڵکوو تا ماوی بمێنێ لەززەتی یاری لەزیز

++++++++++++++++++++++