شاعیر: سابیری
کتێب: دیوانی سابیری
سەرناو: نامیزاج و بێ دەوا خۆم دڵحەزین و ناموراد

نامیزاج و بێ دەوا خۆم، دڵحەزین و ناموراد
تابیعی نەفس و ھەوا خۆم گەنجی عومرم دا بە باد


غافڵ و غەرقی گوناھم، عاسی و نامە سیاھم
ڕووڕەشی دیوانی شاھم، عاجیزی یەومولتەناد


گورگی نەفسم خستە ناو ئەغنامی عومری خۆمەوە
ڕەنجەڕۆ خۆم وا بەجارێ عومری گەنجیم دا بە باد


مووشی نەفس و گەنمی ئەعمال و کوردی دۆنەدیو
عارەب و حەڵوادز و جەردە و خەراپیی و فەساد


نەفسی بەدخوو دائیمەن ھەر پێت ئەڵێ بێنە و بخۆ
چەور و شیرین و تورش، ئەنواعی ئاش و نان و زاد


نە لە قەھری حەق بترسە نە لە گورز و شەق بپرسە
من نەوا بمرم لە برسا، عەیبە بۆ مەردی جەواد


یاخودا دینم قەوی کەی، نەفس نابوود و نەوی کەی
نەفس وەک مێشوولە وا بێتاعەتم مانەندی باد


سابیری نەفسی خەبیس و دزدەستەکی شەیتانی پیس
ڕێوییە گەر تۆ بە شیری صوم بۆی دێیە جیھاد


شیری پیری بەردە بۆ سەر نەفسی ڕێوی سابیری
گەر تۆ سەییادی بزانە ھەم شیکار و ھەم جیھاد!

++++++++++++++++++++++