شاعیر: سابیری
کتێب: دیوانی سابیری
سەرناو: ئەی موسوڵمانان بڵێن بەو دوڵبەرە بۆچ وا دەکا

ئەی موسوڵمانان بڵێن بەو دوڵبەرە بۆچ وا دەکا؟ 
تورفەتولعەینێ ھەزاران فیتنەھا بەرپا دەکا


قەسدی خوێنی بێ گوناھان بۆچ دەکا ڕۆژێ ھەزار
دەست و خەنجەر غەرقی خوێنە و سوور بە سوور حاشا دەکا


ھێندە بێ ڕەحمە لە عەینولفیعلی قەتڵی بێ خەتا
عالەمێ غەوغا دەکا ئەو خەندەیی قاقا دەکا


ڕەحم و ئینسافی نییە دەرحەق بە مسکین و فەقیر
ھیچ نە شەرمێ ئەو لە شێخ و یا لە شاھەنشا دەکا


چۆن نەترسم موفتی و قازی کە چوون بۆ خزمەتی
با قەڵەم مەیلی لەسەر چ شتێکە ئیستیفتا دەکا


تێدەگا بۆ لەرز و تا، عەننابی لێوی شافییە
بۆیە لێوی خۆی گەزیوە دەست و پەنجەی وا دەکا


چوومە کن نەوعی ئەتیببا بۆ عیلاجی لەرز و تا
جوملە فەرموویان کە ھەر عەننابە دەفعی تا دەکا


شەو بە ھێواشی وتی: مەگری بە دایم ئاشکار
ئیش و کاری عاشقی لازم بە ئیستیخفا دەکا


سەد فیغانم کرد و لێی پاڕامەوە سوودی نەبوو
وەرنە سەیری جەوری ئەم سوڵتانە ئیستیغنا دەکا


شەرق و غەربی ئیستیلا کرد و نەما نەوعی بەشەر
زاھیرەن عەزمی گرووھی عالەمی باڵا دەکا


سابیری کێیە لە بەحسی خەت و خاڵی دەم بدا؟ 
جارجارێ شیبھی شانە زولفەکەی تاتا دەکا

++++++++++++++++++++++