شاعیر: سابیری
کتێب: دیوانی سابیری
سەرناو: ڕۆژ ھەڵات ئەستێرە ون بوو کوێرە چاوی شەبپەڕە

ڕۆژ ھەڵات ئەستێرە ون بوو کوێرە چاوی شەبپەڕە
عوشرەتی سیمورغ و بازە شینی زاغ و سەرگەڕە


لەو مەقامە جۆششی گریان و زاریی عاشقە
بێ ڕەواجە ئاگری نەمروود و ئاوی باسەڕە


من کە تینووی دولبەرم ئاوی حەیاتم بۆ چییە
دڵ زەعیفم کەی عیلاجم قەند و بادامی تەڕە؟ 


ئەووەلەن تەشخیسی دەرد و بەعد تەرکیبی دەوا
وەرنە کەی ڕاحەی قەوی دەبڕێتەوە پشتی ھەڕە! 


سەبب و ئەسباب و عەلاماتی نەخۆشی تێبگەی
شەربەتی تۆ تیغی بوڕڕان و مەرەز ترپی تەڕە


ئەی مودەڕڕیس تۆ لە دەرسی عەشق تەحسیلێ بکە
تابەکەی زيد علىٰ سطح عەلی حەرفی جەڕە


موعجیزاتی موڕسەلین و مەوعیزەی ئەعلامی دین
زکرییان زاکیر دەگێڕێ وەک تەشیلە و فڕفڕە


یەعنی ئاگاداری دونیا و نەفس و شەیتان بن ھەموو
خەسمی باباتانە ئەم دوونە ئیمارە و بەدفەڕە


ئەو کەسە ئەحواڵی عاشق تێدەگا شەو بێ خەوە
لێوی ویشک و ڕەنگی زەرد و دائیمەن چاوی تەڕە


حاشالله قەند و گوڵ ئەمر و بدا تەسکینی دڵ
چونکی شەوتامە دڵم موشتاقی عەنابی تەڕە

++++++++++++++++++++++