شاعیر: سابیری
کتێب: دیوانی سابیری
سەرناو: قەددی یارم سەروی باغی جەننەت و ئازادەیە

قەددی یارم سەروی باغی جەننەت و ئازادەیە
تەلعەتی مانەندی حووری زۆر لەتیف و سادەیە


چاوەکانی دائیمەن مەستی شەراب و بادەیە
بێ بەڵا بێ یاخودا بۆ کوشتنم ئامادەیە


ھەرچی تێفکری پەرێشان و نەخۆش و زامدار
داد و ھاواری لە زوڵم و جەوری ئەو جەللادەیە


سەدھەزار ئەسفەندیار و ڕۆستەمی مازەندەران
ھاتە مەیدان و سەری بێ لەش کرا لەم جادەیە


ھەرکەسێ دەرسی لە کن ئوستادی چاوی وەرگرێ
کەمترین توللابی ئەو ئوستادە ئاخر مادەیە


بوولعەجەب ئەفسوونگەر و چابوکسەوار و سەفشکێن
خەڵکی حەیرانن لە مەکر و نازی ئەو شازادەیە


سابیری ئەڵبەتتە لای ئەو چاوە دەرسی خوێندووە
بۆیە وا سەربەستە لەم بەرقاپییە بەم ڕادەیە

++++++++++++++++++++++