شاعیر: سابیری
کتێب: دیوانی سابیری
سەرناو: بە چاوی قەسدی ڕۆحی من دەکا دائیم لە پارێزە

بە چاوی قەسدی ڕۆحی من دەکا دائیم لە پارێزە
خودا یارم لە فیتنە و من لە چاوی ئەو بپارێزە


بە تیری غەمزەکەی یارم پەرێشان و بریندارم
خەریکی نەزم و ئەشعارم ئەگەرچی دەوری ئینگلێزە


لە جێگایێ کە سوڵتانی جەماڵی لەشکرئارا بێ
چ جێگەی سەلم و توور و جامی جەم یا تاجی پەروێزە


لەکن تیغی برۆی بەحسی عەلی و زولفەقاری چی
لەکن موژگانی ئەو بێ عەقڵییە بەحسی ڕم و نێزە


عەجایب دڵڕفێنێکە بە نازی چاوی عەییاری
کە نیمە قیمەتی ئیمایەکی شیرین و شەودێزە


چ یارایێکە تەقدیری بەھا بۆ چاوی مازاغی
کە ئەدنا قیمەتی ڕوم و عەجەم کوردان و تەورێزە


لە دوو جادووی سوخەندانی لە غونچەی لێوی خەندانی
وتی موسا کە: یا عیسی، منی ئاسا بپارێزە


لەکن ئاڕایشی حوسنی زولەیخا دەس بە ئاوێنە
کل و شانەی لەکن لەیلایە ھەم شیرینی پەروێزە


لە ھاوار و فیغانم پێکەنینی دێ چ بێڕەحمە
موسوڵمان ئیشی وا ناکا مەزەننە ڕووس و ئینگلێزە


خودایا چاوی چاوی من لە چاوی بەد بپارێزە
ئەگەرچی چاوەکەم چاوی ڕەش و فەتتان و خوێنڕێزە


غەزەل ببڕێتەوە چاکە بەیانە وەختی ئیمساکە
لەمەولا ڕوو لە مەولا کە زەمانی وەرع و پارێزە


دڵی سابیر برینداری خەدەنگی چاوی دڵدارە
سروشکی چاوی دائیم جارییە مانەندی کارێزە

++++++++++++++++++++++