شاعیر: سابیری
کتێب: دیوانی سابیری
سەرناو: برا شێتی بەسە عەقڵێ پەیا کە

برا شێتی بەسە عەقڵێ پەیا کە
لە خوڵق و خوویی حەیوان خۆت جیا کە


دەمێکە وا ئەسیری نەفسی نزمی
وەرە حەربێ لەگەڵ نەفس و ھەوا کە


بە تەییارەی سیام و تۆپی تەقوا
غەزای پاتەختی نەفسی ڕووسیا کە


بە مەترەلۆزی وێردی زیکر و فیکرت
بەرەنگاری ختووری ماسیوا کە


بە غەفڵەت چوو برادەر عومری گەنجی
لەمەولا عومری ڕابردوو قەزا کە


ھەتا کەی لوقمەبادان و چڵێسی؟ 
بەسە تەنپەروەری، ھۆشێ پەیا کە


حەساری شاری دینت ئەی موسڵمان
بە زیکر و فیکری تەسبیحی خودا کە


قسەم بۆ دین و دونیا سوودمەندە
ڕەفیقی چاک و تاعەت بێ ڕیا کە


لە خەڵقی خاکی تێفکرە سبەینان
بە شەو سەیرانی ئەستێرەی سەما کە


لەخەو ھەڵسە بشۆرە دەست و چاوت
تەماشایێکی ئەسراری خودا کە


بە ئیستیغفار و گریانی سبەینان
برین و دەردی عوسیانت دەوا کە


ئەگەر تانەی گوناھت ھاتە سەر چاو
عیلاجی تووتیای پای ئەولیا کە


تەماشاکردنی ئاوێنە یەعنی
لە ڕیش و ئیشی ناڕێکت حەیا کە


ئەسەف بۆ گەنجی، ئەییامی جەوانیت
کە فەوتاندت لە پیریدا ڕەجا کە


سمێڵ و ڕیشی وەک ماش و برنجت
ئەڵێن ئەی خەستە تەرکی زوولبیا کە


چرا و عومر و شەوی سابیر بەسەرچوون
لەمەولا زیکری بێ چوون و چرا کە

++++++++++++++++++++++