شاعیر: سابیری
کتێب: دیوانی سابیری
سەرناو: ئەی یووسفی گومگەشتە سەرێ دەرکە لە پەردە

ئەی یووسفی گومگەشتە سەرێ دەرکە لە پەردە
ئیحسانە نیشاتێ بە دڵ و جانی بەشەر دە


فەرموو کە بە شمشادی قەد و تەلعەتی بەدرت
پەستی بە سنەوبەر دە شکستی بە قەمەر دە


بەو چاوە حەکیمانە تەماشا کە لە ڕەنگم
بۆچ وایە کە چوارفەسڵە وەکوو پایزی زەردە؟ 


قەند و شەکەرت ھەر بەشی ئەغیارە بە فەرغوون
سەوقات و بەشی ئێمە غەم و دەردە بە فەردە


کێ بێ کە بە شمشێری برۆت سەر نەخەوێنێ
بۆچ چاو و برۆت مائیلی دەعوا و نەبەردە؟ 


شاھم ئەمەگت زۆرە نەوا تووشی زیان بی
شاڕێ بگرە ئەو دزە ڕێی ناحەقە بەردە


تێکەڵ بکە ماچێک و جنێوێک موتەساوی
ماچت شەکەر و لەفز و جنێوت گوڵ و وەردە


سابیر سەری تەسلیمی کە دانا لەبەری پێت
بۆ کوشتنی بەس دامەنی نازک لە کەمەر دە

++++++++++++++++++++++