شاعیر: سابیری
کتێب: دیوانی سابیری
سەرناو: ئەی دڵ بە بەڵا سابیر و خوشنوود و ڕەزا بە

ئەی دڵ بە بەڵا سابیر و خوشنوود و ڕەزا بە
یاتاغی ھەموو غوسسە و قەڵغانی قەزا بە


بێ یادی خودا عومر بە زایع مەدە سۆفی
شێرانە لەگەڵ ڕێویی نەفسا لە غەزا بە


قاپی ئەگری یەعنی ڕیازەتمە بەڕۆژووم
سەر قاپی پڵاو زیرە و کشمیش و کەبابە


شەو ئێشکی بێشک ئەگری و گریە چ حاسڵ
گریانی کوڕت ڕاستی ئەڵێ: بابە کەزابە


تەسبیحی دەس و وێردی زوبان ناوی خودایە
دونیا بە دەس و دەم مەگرە خوویێ خەرابە


ھەرکەس لە خودا غافڵ و مەغروورە لە دونیا
مەحروومە لە دونیا و قیامەت لە عەزابە


فەرقی چییە ئینسانی دز و شەخسی موبەزیر
ھەردوو لەسەر ئەم چەوتییە بەدنام و کەزابە


سابیر مەکە ئیسراف و مەبە یاری درۆزن
ھەر لەحزە لە خەوف و خەتەری ڕۆژی جەزا بە

++++++++++++++++++++++