شاعیر: سابیری
کتێب: دیوانی سابیری
سەرناو: کەسێ مانەندی پەروانە نەسووتابێ پەڕ و باڵی

کەسێ مانەندی پەروانە نەسووتابێ پەڕ و باڵی
لە سۆزی جەرگی سووتاو و دڵی من کەی ئەبێ حاڵی


خودا تەوفیق بدا وەختێ مەلائیک دێتە تەختی دڵ
کە تۆ قەلبت لە شەڕ و وەسوەسەی شەیتان بکەی خاڵی


ئەگەر خالیس نەبێ نییەت بەتاڵە زیکر و جەمعییەت
بە ڕەنگ ئەییووب خاسییەت، بە باتین خوویی دەججاڵی


بە ڕەنگ و ڕوو برنجێکی لەسەر سینی بژێراوی
بە تام و بۆی دەروونت تۆ زەخیرەی کۆن و بن چاڵی


تەماشایێکی ڕیشت کە حەیا و شەرمێ لە ئیشت کە
بە ڕیش و عومر باپیری بە ئیش و فیکر منداڵی


ئیتر بەسە خەوی غەفڵەت سەرت خاڵی کە لەو عەقڵەت
ھەتاکەی ھەر لە دووی نەفس و ھەوا ئەوباڵ و عەوداڵی


دڵم ڕەعد و ھەناسەم بەرق و ئەشکم سەیلە، دنیا پڕ
کە تۆ تێناگەیەی بێ سڕ نییە، کوێر و کەڕ و لاڵی


لە ڕستی خێوەتی تۆ عالەمێ شل بوو تەئەممول کە
لە ڕەشماری قیامەت تابەکەی مەغرووری ڕەشماڵی؟ 


حەیا کە سابیری نەفست بناسە خواشوناسێکە
لە پەنجا تێپەڕی عومرت لە خۆت و خوا نەبووی حاڵی!

++++++++++++++++++++++