شاعیر: سابیری
کتێب: دیوانی سابیری
سەرناو: نیشانەی عاشقی وایە کە ساتێ یاری لێ ون بێ

نیشانەی عاشقی وایە کە ساتێ یاری لێ ون بێ
دەبێ دەرلەحزە ئەحواڵی بە سەد گوونە مولەوون بێ


دڵی پڕ دەرد و ڕەنگی زەرد و لێوی وشک و چاوی تەڕ
سیاپۆش و جەفانۆش و سەراپا غەرقی ناو خوون بێ


جەفا و لوتف و ھیجر و وەسڵی یار و شیوەن و شادی
لە لای یەکسان و دڵ وەک خانەیی زەنبوور کون کون بێ


کە دولبەر ھات و ڕۆحم چوو کە ڕۆیشت و دڵی بردم
ئیتر جان و دڵی بێچارە چۆن ئیسکان و ساکن بێ


ئەتیبا عاجزن بێ شک لە دەرمانی دڵی سابیر
ئەگەر لوقمان و جالینووس، ئەرەستوو یا فلاتوون بێ

++++++++++++++++++++++