شاعیر: سابیری
کتێب: دیوانی سابیری
سەرناو: مەخۆ ئەی پیری تەنپەروەر کەباب و کاڵەکی پردی

مەخۆ ئەی پیری تەنپەروەر کەباب و کاڵەکی پردی
مەخەو ئەی میری بەر سێبەر وەکوو شامی تەپیو بوردی


ئەلا ئەی پیری بێ حاسڵ لەکن خۆت عاقڵ و وردی
خەجاڵەت بی ھەموو ڕەنجت قسووری خۆتە با بردی


سەنەی عومرت لە ھەشتا تێپەڕیی و غافڵی ھێشتا
کە تۆفانی ئەجەل ئەرز و سەمای شێوان و ھاوردی


لە ھەشتا تێپەڕی عومرت قیامەت نایەتە فکرت
جوێن و غەیبەتە زیکرت پیاوێ زیرەک و وردی


گرووھی ئەوەڵین ڕابوردن و ئێمەیش ئەچین ئاخر
ئەگەرچی من تەپۆڵکەم تۆ لە چاوی من وەکوو گردی


سەر و ڕیشت بووە پەمبوو سەراپا عومری تۆ غەم بوو
موسوڵمانیت ھەموو دەم بوو، پەشیمانی و ڕووزەردی


ئەگەرچی من فەقیری شار و تۆ سوڵتانی دەورانی
بەھەر حاڵێ کە من مردم لەناکاوێ ئەتۆش مردی


ئەگەر یارانی ڕابردوو بە خێر بێنیتە یاد ئەمڕۆ
بە خێر یادت ئەکەن خەڵکی، سبە و دوویێ کە ڕابوردی


عەبا و جوببەی سپی و ساف و کەوای زەردت موبارەک بێ
بە سوورەت شەککەری ئەمما بە تام و ڕەنگ گۆگردی


زەمانی زوھد و پارێزکردن و ھەم تەوبەیە سابیر
ئەگەر شێخی عەرەب یاخود ڕەئیسی تائیفەی کوردی


چییە دونیا زمستانە ئەجەل؟ بۆ ڕفت و بارانە
لە ھەوری قیبلەوە سابیر بەتوندی ھات و ھاوردی

++++++++++++++++++++++