شاعیر: سابیری
کتێب: دیوانی سابیری
سەرناو: ئەی جەوان ئەو بەدری حوسنە گەر ببینی شەو لە خەو

ئەی جەوان ئەو بەدری حوسنە گەر ببینی شەو لە خەو
فیکری بیکری نازەنین و ماھ جەماڵت کەی دەبێ؟ 


حەنزەلی دەستی بلوورینت لە شەککەر خۆشترە
باسوق و حەلوا بە زەوقی جوێنی تاڵت کەی دەبێ؟ 


باعیسی ژینم ئومێدی وەسڵی تۆیە بتگەمێ
پێت بڵێم سا بمکوژە خوێنم حەڵاڵت کەی دەبێ؟ 


گەرچی ئومێدی ویساڵت قووەتە بۆ جان و دڵ
ھەم تەرازووی لەززەتی شەرتی بەتاڵت کەی دەبێ؟ 


پادشاھا سابیری عومرێکە دەربانی دەکا
داخیلی خوددامەکەی سەفی نەعالت کەی دەبێ؟ 


دولبەرە مەست و فەلەک کەڕ، بەختی شوومت خەوتووە
سابیری نەفعی شکات و عەرز و حاڵت کەی دەبێ؟

++++++++++++++++++++++