شاعیر: سابیری
کتێب: دیوانی سابیری
سەرناو: ئەلا ئەی پیری ئاخرشەڕ ڕەئیسی قەوم و سەرخێڵی

ئەلا ئەی پیری ئاخرشەڕ ڕەئیسی قەوم و سەرخێڵی
ھەتاکەی غافڵ و مەستی لەسەر تەخت و قەراوێڵی؟ 


شەوی گەنجی نەما ھەڵسە لە خەو، سەیری کە ئاوێنە
ئەڵێ: ئەی پیری نازیرەک ھەتا کەی خوویی جاھێڵی؟ 


ئەجەل ئامادەیە بۆ تەخت و تاراجت، چ عەقڵێکە؟ 
خەریکی گردوکۆی ماڵی، سبەی بۆ خەڵکی جێ دێڵی


لەلات وایە بە شاڕێدا ئەڕۆی و ڕووت لە مەقسوودە
وەڵی ڕێگەی دزانە، ناگەیە مەقسوودی خۆت، وێڵی! 


تەماشا کە لە پانی ئەرز و تەنگی چاوی دونیادار
چ چاوبرسین بە جووتیار ئەمر ئەکەن بۆ ڕێگە ناکێڵی؟ 


زەمینی بێ نیزاع و منبت و ئەعلا ئەگەر مابێ
سەری گۆنایە ئاوی ئەشکی چاوە جەرگە ئەستێڵی


کە زاریع مەردوم و بێڵی موژەی فرمێسکی ئاوی بێ
لە ئەرزی ڕوو ئیرەم پەیدا ئەکەی گەر بێ فڕوفێڵی


ھەتا ماوی عیلاجی ڕێگەیی تووشەی قیامەت کە
چ لازم ماڵ و موڵکت بۆ کوڕی ئەحمەق بەجێ بێڵێ


شەوی پیری وتی سابیر جەوانیی بێوەفا ڕۆیی
وتم تۆش ئاخری عومرم ئەبێ ڕۆژێ بەجێم بێڵی

++++++++++++++++++++++